Nwoyo Cik 26 - Acoli Baibul

Kwero wi mwaka ki tyero dul acel me apar

¹ “I kare ma doŋ wuo i lobo ma Rwot Lubaŋawu bimiyowu me aleyawu, ma doŋ wucamo lobo wubedo iye,

² ibikwanyo dul mo i kom gin mukwoŋo cek i kom kit cam ducu ma ikayo ki i lobo ma Rwot Lubaŋawu omii, ibiketo i aduku icito kwede i kabedo ma Rwot Lubaŋawu biyero ka ma biketo nyiŋe bedo iye.

³ Ibicito bot ajwaka pa Lubaŋa ma tye ka tic i kare meno, iwacce ni, ‘Tin atuco bot Rwot Lubaŋana ni atyeko o i lobo ma yam Rwot okwoŋo pire bot kwarowa ni ebimiyo botwa.’

⁴ Ci ajwaka bigamo aduku ki i ciŋ, ci keto piny i nyim keno tyer pa Rwot Lubaŋawu,

⁵ “Ci ibidok iye ki i nyim Rwot Lubaŋawu ni, ‘Kwarowa yam dano me lobo Aram, ma lamal gaŋ ata. Yam olak ocito wa i Ejipt obedo kunnu ma welgi nok mo; ki kunnu en odoko rok madit ki matek munya mapol.

⁶ Jo Ejipt gubedo ka timowa magwa marac twatwal, ma giunowa, giketowa i tic matego me opii.

⁷ Ka yam wakok bot Rwot Lubaŋa pa kwarowa, ci Rwot owinyo dogwa, oneno kit ma giunowa kwede, ki aroma ticwa, ki atwomwa.

⁸ Rwot okwanyowa woko ki i Ejipt pi twero me bade, ki ciŋe ma oryeyo, ki tim ma okelo lworo madwoŋ, ki lwak lanyut ki taŋo.

⁹ Okelowa wa i kabedo man, omiyowa lobo-ni, en lobo ma mol cak ki moo kic.

¹⁰ Ci doŋ inen ka tin akelo wi mwaka mua i poto ma imiyo bota; ai Rwot.’ Ka doŋ iketo aduku piny i nyim Rwot Lubaŋani, ci iryebbe piny iwore.

¹¹ Cwinyi bibedo yom pi jami mabeco ducu ma Rwot Lubaŋani omiyo boti ki bot jo me odi; ci ibimiyo Lulevi ki lubedo ma gibedo i kinwu bene cwinygi obed yom kacel kwedwu.

¹² “I mwaka me adekke, ma en aye mwakame miyo dul acel i kom apar, ibimiyo dul acel me apar me kit cam ducu ma ocek i potoni bot Lulevi, lubedo, litino kic ki mon-to wek gin bene gubed ki cam ma romogi i gaŋiwu ducu. Ka doŋ ityeko miyone botgi,

¹³ ci ibiwaco bot Rwot Lubaŋani ni meno, ‘Doŋ atyeko kobo jami maleŋ woko ki i oda, amiyo woko bot Lulevi, lubedo, litino kic ki mon-to kun alubo cikki ducu ma imiyo bota. Pe aturo cikki mo, pe bene wiya owil i komgi.

¹⁴ Pe acamo gin mo i kom dul acel me apar i kare ma atye ka kwero cola, pe akobo gin mo ki i oda ma onoŋo koma ki keni, pe atyero mogo bot tipo pa lato mo; doŋ aworo dogi, in Rwot Lubaŋana, atyeko tiyo gin ducu kit ma yam icika kwede,

¹⁵ Nen piny ki i kabedoni maleŋ-ŋi, nia ki i polo, ci imi gum i kom joni Icrael ki i kom lobo ma imiyowa kit ma yam ikwoŋo kwede bot kwarowa, en lobo ma mol cak ki moo kic.’

Jo Icrael gin rok maleg pa Rwot

¹⁶ “Tin Rwot Lubaŋawu ociko ni wulub cik magi ki gin ma en oŋolo ducu, mumiyo wubigwokke mada ka lubogi ki cwinywu ducu ki tipowu ducu.

¹⁷ Tin doŋ wutuco lok i kom Rwot ni en aye Lubaŋawu, dok ni wubilubo yone ducu kun wugwoko cikke ki gin ma en ociko ducu, dok wubiworo doge.

¹⁸ Dok tin Rwot otuco lok i komwu ni wun aye wu jone kikome,

¹⁹ dok en bipilo wiwu makato rok ducu ma yam en oketo; gibipake piwu, nyiŋe biywek piwu, en bilimo deyo i komwu, dok otuco ni wun wubibedo rok maleŋ pi Rwot Lubaŋawu,” kit ma yam owaco ni.”