Nwoyo Cik 22 - Acoli Baibul

¹ “Ka ineno dyaŋ nyo romo pa omeru ma orwenyo woko ata, ci pe ikwer miyo kony; dwokgi cen bot omeru.

² Ka ce en pe bedo cok kwedi, nyo ka pe iŋeye, ibitero lee-nu paco ci bibedo boti nio ka wonne oyenyo, ka doŋ ibidwokone bote.

³ Kanane bene ibitimo kit meno, ki boŋone nyo kit jami mo keken pa omeru ma orwenyo ki bote ma in inoŋo; pe ikwer miyo kony.

⁴ “Ka inoŋo kana pa omeru nyo dyaŋŋe ma opoto piny i ŋet yo, pe inen anena; kony omeru ki tiŋone malo.

⁵ “Dako pe oruk ginaruka pa co, dok laco bene pe oruk ruk pa mon, pien dano ma otimo kumeno bedo me kwer bot Rwot Lubaŋawu.

⁶ “Ka ce icob i kom ot winyo mo ma tye i wi yat nyo piny i nom, ma litino tye iye, nyo toŋe, ki minne bene oumo wi litinone nyo obuto i wi toŋe, pe ibimako minne kacel ki litinone,

⁷ Ibiweko minne tuk cito, ento ibicoko litino icito kwede, wek ariya mo pe onen i nyimi ento ibed kwo pi kare malac.

⁸ “Ka ce igero ot manyen, ibigoyo wi ot meri irumo woko, wek pe ikel bal me oyo remo lodi, ma noŋo ŋat mo obut opoto piny ki i wiye.

⁹ “Pe ibicoyo poto olokki ki kit kodi mapatpat aryo, miyo gin ducu ma ocek iye myero giter i ot pa Lubaŋa, gin ma icoyo iye wa ki nyig olok bene.

¹⁰ Pe ibitweyo dyaŋ ki kana kacel me ywayo kweri dyaŋ.

¹¹ Pe ibiruko boŋo ma gicweyo ki uci yer romo kacel ki uci camanini.

¹² “Ibikwoyo jira aŋwen i twok boŋo ma iume kwede-ni.

Cik ma mako cot

¹³ “Ka laco mo onyomo nyako ce obedo kwede, ka iye okwere woko,

¹⁴ ci otoŋo doge ki lok me lewic ma obalo nyiŋ nyako woko marac kun waco ni, ‘Anyomo nyako man ci ka anyiko bote cok pe anoŋo gin ma nyuto atir ni peya ocodo co,’

¹⁵ won latin dako-nu ki minne gibikelo boŋo ma nyuto atir ni latin dako-nu peya ocodo co bot ludoŋo ma i gaŋ meno ka ma gicokke iye i dog gaŋ,

¹⁶ Ci won latin dako-nu biwaco bot ludoŋo ni, ‘Amiyo nyara o ot laco man ci onyomo ka dok okwero en woko.

¹⁷ Ci, nen, okelo lok me lewic i kome kun waco ni pe enoŋo gin ma nyuto atir ni nyara peya ocodo co, Koŋ wunen, man en aye gin ma nyuto atir ni nyara peya ocodo co.’ Ci biyaro bone-nu i nyim ludoŋo ma i gaŋ meno.

¹⁸ Ludoŋo gibitero laco-nu gigoyo,

¹⁹ giŋolle cul me cekel me ryal miya acel. Gibimiyo limme bot won nyako, pien laco-nu obalo nyiŋ nya jo Icrael ma peya ocodo co. Ci bibedo dakone, pe biryeme woko matwal pi kare me kwone ducu.

²⁰ Ento ka lokke ada ni, gin mo pe ginoŋo ma nyuto atir ni latin dako-nu peya ocodo co,

²¹ ci jo ma i gaŋ meno gibicele ki got gineko woko, pien otimo gin ma pe myero i Icrael pi codo co ki i ot pa wonne. Wubijwero tim marac woko ki i kinwu kit meno.

²² “Ka ginoŋo laco mo obuto ki dako pa laco mukene, gin aryo ducu gibito, laco ma obuto ki dako, ki dako bene. Kit meno miyo wubijwero gin marac woko ki i kinwu.

²³ “Ka tye nyako mo ma peya oŋeyo laco, ma gitoŋo keny i kome ce laco mo oromo kwede i dye gaŋ ka obuto kwede,

²⁴ ci wubitero gin aryo ducu woko i dog gaŋ, wucelogi ki got wunekogi woko, latin dako-nu pien pe ogoyo oduru kadi onoŋo tye i dye gaŋ, dok laco bene pi mako dako pa lawote ki tek. Kit meno miyo wubijwero tim marac woko ki i kinwu.

²⁵ “Ento ka laco mo orwatte ki nyako mo ma gitoŋo keny i kome i dye tim ce omake tektek obuto kwede, ci laco ma obuto kwede-ni aye bito.

²⁶ Pe wubitimo gin mo i kom nyako, pien en pe ki bal mo ma romo keto can me to i kome. Lok man rom ki pa laco mo ma olwenyo i kom lawote ci oneke woko.

²⁷ Laco-nu obino i kom nyako-nu i dye tim ci kadi bed en ogoyo oduru noŋo ŋat mo pe kunnu ma lare.

²⁸ “Ka laco mo orwatte ki nyako mo ma peya gitoŋo keny i kome ce omake tektek obuto kwede, ka gimakogi,

²⁹ ci laco ma obuto kwede-ni bimiyo lim me luk bot won nyako ma romo cekel pyerabic, ci nyako-nu bidoko dakone, pien omake ki tek; pe biryeme woko matwal pi kare me kwone ducu.

³⁰ “Laco mo pe obed ki ci-wonne, pe oket lewic i kom wonne kumeno.