Nwoyo Cik 21 - Acoli Baibul

Tyeko kop i kom nek ma pe ŋene

¹ “Ka ce ginoŋo dano mo gineko i lobo ma Rwot Lubaŋawu bimiyowu me bedo mewu, kun kome obuto i tim ata, ci pe giŋeyo ŋat ma oneke,

² ci ludoŋowu ki luŋolkopwu gibibino kunnu, gibiporo bor piny nio wa i gaŋi ma orumo kom dano ma gineko-ni.

³ Ludoŋo ma i gaŋi ma cok ki kom dano ma gineko-ni gibikelo roya ma peya otiyo tic mo, ma peya oywayo kweri dyaŋ.

⁴ Gibitero roya wa i nota kulu mo ma piine mol kare ducu, i kabedo mo ka ma yam peya gipuro, ma pe gicoyo iye kodi. Gibituro ŋut roya woko ki i nota kunnu;

⁵ ci ajwagi ma gin likwayo pa Levi gibinyiko cok, pien yam Rwot Lubaŋawu oyerogi pi tic bote ki me lamo gum i nyiŋ Rwot, gin bene myero gutyek lok ducu me pido ki me bwami.

⁶ Ludoŋo me gaŋ meno ma cok ki ka ma ginoŋo iye kom dano ma gineko-ni gibilwoko ciŋgi malo i wi kom roya ma gituro nute i ŋota-ni,

⁷ ci gilamo doggi kun giwacci, ‘Ciŋwa pe ooyo remo pa dano man, waŋwa bene pe oneno ka gineke.

⁸ Ai Rwot, tim kica ki jo Icrael ma gin aye joni ma yam ikokogi-ni, pe iket alii me remo pa dano man ma pe ki bal-li i dye lwakki Icrael, ento itimgi kica pi bal me to man.’

⁹ Wubilwoko alii me remo ma pe ki bal woko ki i kinwu kit meno, ka ce wutiyo gin ma nen atir i waŋ Rwot.

Mon ma gimakogi i lweny

¹⁰ “Ka wucito ka lweny i kom lumerokwu, ce Rwot Lubaŋawu omiyogi i ciŋwu ci wuyakogi wutero obedo dano alimawu,

¹¹ gwok nyo ibineno dako mo mamwonya i kin jo ma iyakoni ci cwinyi mare matek kun imito ni ikwany odok dakoni.

¹² Ka tye kumeno ci ibitere paco wa i odi. En koŋ bilyelo wiye ki ŋolo Lwete,

¹³ ci lunyo boŋone woko ma imake kwede me bedo opii, ruko mukene; ci bibedo i odi kun koko wonne ki minnne dwe acel kulu, ka lacen itwero bedo kwede macalo cware, ci en doŋ bibedo dakoni.

¹⁴ Ka inen cwinyi pe mare twatwal ci ibiweko en cito gire mot ka ma en bimito; ento pe ibicato woko giwilo ki lim, pe ibitime macalo aŋeca, pien noŋo ityeko lanye woko.

Lim aleya pa latin kayo

¹⁵ “Ka laco mo tye ki mon aryo, acel dako ma gimaro ki acel ma pe gimaro, ci gin mon aryo ducu ginywalo litino ka latin kayo obedo wod pa dako ma en pe maro-ni,

¹⁶ i kare ma laco-ni poko lim me aleya ki awobene, pe omi bot latin kayo pa dako ma gimaroni dullim muporo dit pa latin kayo ma ka miyo bot latin kayone kikome ma wod pa dako ma en pe maro-ni,

¹⁷ Ento en bituco ni latin kayo en aye pa dako ma pe gimaro-ni, ci bimiye lim ma dodo dul aryo ma i kom jamine ducu ma en tye kwede; en acakki kero kome, dit me bedo latin kayo aye mere gire.

Awobi ma lajemo

¹⁸ “Ka dano mo tye ki wode ma ŋute nwaŋ dok lajemo, ma pe winyo dog wonne ki minne, kadi bed gijuye matek, pe winyogi,

¹⁹ ci wonne ki minne gibimake gitere wa i dog gaŋ bot Ludoŋo me gaŋ meno ma en bedo iye-ni,

²⁰ Ci gibiwaco bot ludoŋo ma i gaŋgi-nu ni, ‘Latin awobiwa man ŋute nwaŋ dok lajemo, pe winyo dogwa, en lacarcar dok lamero koŋo matek.’

²¹ Ci dano ducu me gaŋ meno gibicele woko ki got nio ka oto. Kit meno miyo wubijwero gin marac woko ki i kinwu; jo Icrael ducu gibiwinyo ci miyo gilworo.

Cik mogo mapatpat

²² “Ka dano mo otimo bal ma romme noŋo can me to ci gineke woko, ma giŋabe malo i wi yat,

²³ ci pe gibiweko kome bedo i wi yat dyewor. Wubiyiko kome i nino meno kikome, pien dano ma giŋabo i wi yat bedo dano ma Lubaŋa ceno; pe wubinyobo lobo ma Rwot Lubaŋawu bimiyowu me aleyawu.