Nwoyo Cik 12 - Acoli Baibul

Woro Lubaŋa myero obed i kabedo acel keken

¹ “Magi gin aye cik ki oŋon me cik ma wubimako matek kun wulubogi i lobo ma Rwot Lubaŋa pa kwarowu bimiyowu obed mewu, pi kare ducu ma wubibedo iye i wi lobo-ni.

² Wubibalo kabedo ducu liweŋ ka ma yam rok ducu ma ubigamo lobogi giworo iye lubaŋagi, ma gitye malo i wi godi mabocone ducu ki i wi cere ki i waŋ ayweya ma i te yadi ma potgi oluk.

³ Wumuk keno jogigi woko ducu, wuŋid wir jogi megi woko matitino, wuwaŋ yadi ma gicomo i ŋom pi woro jok ma dako ma gilwoŋo Acera, wutoŋ cal lubaŋa apaya-gi woko ducu, wunek nyingi woko ki i kabedo meno.

⁴ Pe wubitimo kit meno i kom Rwot Lubaŋawu,

⁵ ento wubipenyo dog Rwot Lubaŋawu i kabedo ma en biyero ki i kin kakawu ducu pi keto iye nyiŋe wek obed pacone.

⁶ Kenyo aye wubicito iye, kenyo en aye wubitero iye gitum awaŋa ki gitum mewu ducu, ki dul acel me apar, ki gityer mapatpat ma wubimiyo, gityer me cobo kwoŋ, ki gityer ma iwu opwoyo, ki litino kayo pa dyaŋiwu ki pa romi ki dyegiwu.

⁷ Wubicamone ki kunnu i nyim Rwot Lubaŋawu, ci cwinywu bibedo yom, wun ki jo ma i odiwu ducu, i kom gin ducu ma wubiketo iye ciŋwu, ma onoŋo Rwot Lubaŋawu omiyowu iye gum.

⁸ “Pe wubitimo kunnu kit ma watye ka timo kany i kare-ni, ma dano acel acel tye ka tiyo gin ducu ma en tamo ni tye atir;

⁹ pien peya wuo i kabedo me yweyowu, i lobo ma wubileyo, ma Rwot Lubaŋawu bimiyowu.

¹⁰ Ento ka doŋ wukato loka Jordan, ma wubedo i lobo ma Rwot Lubaŋa bimiyo me aleyawu, ka doŋ omiyo wuywe ki i lweny i kom lumerokwu ma gurumowu dyere-ni, ci doŋ wubibedo ma piny okwe mot.

¹¹ Rwot Lubaŋawu biyero kabedo ka ma en biketo iye nyiŋe bedo iye; kenyo en aye wubikelo iye gin ducu ma acikowu-ni: gitum awaŋawu ki gitum mukene ducu, ki dul acel me apar, ki gityer mapatpat ma wubimiyo, ki gityer me cobo kwon ducu ma wukwono me miyogi bot Rwot.

¹² Ci cwinywu bibedo yom i nyim Rwot, wun ki awobewu ki anyirawu, opiiwu ki aŋecawu ducu, ki Lulevi ma tye i gaŋiwu, pien gin Lulevi pe gibipokogi dul lobo mo nyo kabedo mo i kinwu me aleyagi.

¹³ Gwokke wek pe ityer gitum awaŋani i kabedo mo ma ineno;

¹⁴ ento ibityerone ki i kabedo ma Rwot biyero ki i kakawu mo acel. Ibityero gitum awaŋani ducu kunnu, dok ibitiyo gin ducu ma aciki-ni ki kunnu.

¹⁵ “Ento wutwero neko lee me acamawu ki i gaŋiwu ducu kit ma cwinywu mito, muporo gum ma Rwot Lubaŋawu omiyowu. Dano ma kome ki keni twero camo, ki dano ma olony, macalo gicamo riŋo abur nyo til.

¹⁶ Remone keken aye pe wubicamo; wubionyo woko piny i ŋom, macalo pii.

¹⁷ Pe myero wucam dul acel me apar me kalwu, nyo me koŋo vinowu nyo me moo jeituniwu ki i gaŋiwu, kadi litino kayo pa dyaŋiwu nyo pa romi ki dyegiwu, nyo gityer me cobo kwoŋwu ma wukwoŋo, nyo gityer mewu ma cwinywu opwoyo, nyo gityer mo ma wumiyo.

¹⁸ Ento wubicamo ki i nyim Rwot Lubaŋawu i kabedo ma en biyero, in ki wodi ki nyari, ki opiini, ki aŋecani, ki Lulevi ma i gaŋwu; dok cwinyi bibedo yom i nyim Rwot Lubaŋani pi gin ducu ma ibiketo iye ciŋi.

¹⁹ Gwokke pe ibwot Lulevi ata i kare ducu ma ibedo i lobowu-ni.

²⁰ “Ka Rwot Lubaŋawu doŋ oyabo waŋ lobowu obedo malac, kit ma yam ocikke kwede botwu, ce iwacci, ‘Abicamo riŋo,’ pien onoŋo itye ki miti iye, ci itwero camo riŋo kit ma cwinyi mito.

²¹ Ka ce kabedo ma Rwot Lubaŋawu biyero me keto iye nyiŋe tye ka mabor ki ka ma itye-ni, ci itwero neko dyaŋŋi nyo romoni ma Rwot omiyo boti, macalo doŋ aciki; itwero camo ki i gaŋŋi kit ma cwinyi mito.

²² Itwero camone kit ma gicamo riŋo abur ki til; kadi wa dano ma kome ki keni twero camone kacel ki dano ma olony.

²³ Cuŋ matek i man keken ni, pe icam remone, pien remo en aye kwo; pienno pe ibicamo kwo kacel ki riŋone.

²⁴ Pe ibicamone, ibionyo woko i ŋom macalo pii.

²⁵ Pe ibicamone, wek nyimi obed leŋ, in kacel ki litinoni ma bilubi, ka ce ibedo ka tiyo gin ma nen atir i waŋ Rwot.

²⁶ Ento jamini maleŋ ducu ma myero imi, ki gityer me cobo kwoŋ, ibikwanyo icito kwede i kabedo ma Rwot biyero.

²⁷ Ibityero gitum awaŋani ducu, riŋone ki remone, i wi keno tyer pa Rwot Lubaŋani; remo me gitummi ducu gibionyo woko i kom keno tyer pa Rwot Lubaŋani, ento riŋone ibicamo.

²⁸ Gwokke wek ilub lok magi ducu ma aciki kwede-ni, wek nyimi obed leŋ nakanaka, in ki likwayi ma bilubi, ka ce itiyo gin ma nen maber ki ma atir i waŋ Rwot Lubaŋani.

Juk i kom woro jogi

²⁹ “Ka Rwot Lubaŋawu doŋ otyeko lurok woko ki i nyimwu ma wucito ka camo lobogi-ni, ma doŋ wucamo lobogi, wubedo iye,

³⁰ myero wugwokke wek pe wumok i owic pi lubo kitgi, i kare ma doŋ gityekogi woko ki i nyimwu. Dok pe wubed ka penyo lok i kom lubaŋagi, kun wuwacci, ‘Rok man yam giworo lubaŋagi niŋniŋ? wek an bene aworgi kit meno.’

³¹ Pe ibitimo kumeno i kom Rwot Lubaŋawu, pien gibedo ka timo gin me kwer ducu ma Rwot dagi pi woro lwak lubaŋagi; giwaŋo wa awobegi ki anyiragi ki mac macalo gitum me woro lubaŋagi.

³² “Gin ducu ma acikowu kwede myero wugwokke ka lubone; pe wubimedo wiye nyo wukwanyo mogo woko.