Nwoyo Cik 10 - Acoli Baibul

Kidi ma apada me aryone

¹ I kare meno Rwot owacca ni, ‘Muk kidi ma apada aryo, ipagi macalo mukwoŋo ca; ci ibin bota i wi got malo, dok ipa canduk me bao.

² Abicoyo i kom kidi ma apada-nu lok ma yam tye i kom kidi ma apada mukwoŋo ma yam ityero woko ca, ci ibiketogi i canduk.’

³ Kit meno atimo canduk ki bao yat lalwii, ci amuko kidi ma apada aryo, apayo ma rom ki macon ca, aito malo i wi got kun amako kidi ma apada aryo-nu i ciŋa.

⁴ Rwot ocoyo i kom kidi-nu macalo yam okwoŋo coyo, gin cik apar ma yam oloko ki wun i wi got ki i dye mac i nino ma yam wucokke iye ca; ci Rwot omiyogi bota,

⁵ Lacen alokke, alor piny ki i wi got, ci aketo kidi ma apada aryo-nu i canduk ma yam apayo-ni; gin pud gitye ene, kit ma yam Rwot ocika kwede.

⁶ (Jo Icrael gua ki i Beerot Benejaakan, guo Mocera. Aron oto ki kunnu, giyike bene kunnu; ci wode Eleajar oleyo ka tyene i tic me bedo ajwaka pa Lubaŋa.

⁷ Gua ki kunnu, guwoto guo i Gudugoda, ki nia ki i Gudugoda guo Jotibata, en aye lobo ma tye iye lwak nota ora ma igi ki pii.

⁸ I kare meno en aye Rwot ocako poko kaka pa Lulevi pat, gubed lutiŋ canduk me gicikke pa Rwot, gucuŋ i nyim Rwot kun gitiyo bote, dok gulam gum i nyiŋe, nio wa i nino man.

⁹ En gin mumiyo jo pa Levi pe gitye ki dul lobo mo nyo ginaleya mo i kin omegigi; Rwot aye ginaleyagi, kit macalo Rwot Lubaŋawu yam owaco botgi.)

¹⁰ “Yam abedo i wi got macalo i kare mukwoŋo ca, abedo nino pyeraŋwen dyeceŋ ki dyewor; ci Rwot dok owinya i kare meno bene, omiyo Rwot pe dok mito tyekowa woko.

¹¹ Lacen Rwot owacca ni, ‘A malo, imed wotti kun itelo wi lwak, wek gudony, gucam lobo ma yam akwoŋo pire bot kwarogi ni abimiyogi.’

Gin ma Lubaŋa mito ki botwa

¹² “Doŋ kombeddi, wun jo Icrael, gin ma Rwot Lubaŋawu mito ki botwu en ene keken ni, wulwor Rwot Lubaŋawu ki cwinywu ducu ki tipowu ducu,

¹³ dok wugwok gin ducu ma en ociko ki cik mapatpat ma acikowu kwede tin wek wubed doŋ maber.

¹⁴ Nen, Rwot Lubaŋawu aye rwot me polo, ki polo ma malo makato ducu, ki lobo ki jami ma tye ducu liweŋ.

¹⁵ Ento kadi bed kumeno, Rwot oketo cwinye i kom kwarowu, omarogi, oyero likwayogi ma gulubogi, ma gin aye wun, ki i kin rok ducu macalo wa i kare man,

¹⁶ Pienno, wubed jo ma gulirre wa i cwinygi, pe wubed jo ma ŋutgi tek,

¹⁷ Pien Rwot Lubaŋawu aye Lubaŋa pa lubaŋa ducu ki Rwot pa rwodi. En Lubaŋa madit, ma tye ki tek, ma ryaŋo kom dano; pe dworo kor dano mo, pe giwilo ki lim.

¹⁸ En ŋolo kop pa litino kic atir, ki pa mon to, dok maro lubedo bene, miyogi cam ki boŋŋi,

¹⁹ Wun bene myero wumar lubedo, pien yam wubedo lubedo i lobo Ejipt.

²⁰ Wulwor Rwot Lubaŋawu; wuti bote kun wumoko i kome matek, dok wukwoŋ kwoŋwu ki nyiŋe keken.

²¹ En aye ma myero wupake; en Lubaŋawu ma yam otimo botwu tim man ducu madito ki ma ryano kom dano, ma waŋwu doŋ oneno-ni.

²² Kwarowu yam gucito i Ejipt kun gin jo pyerabiro keken; ci tin Rwot Lubaŋawu doŋ omiyo wunya mapol macalo lwak lakalatwe me polo.