Buk me Aŋwen pa Moses ma Gilwoŋo Wel 9 - Acoli Baibul

Kwero nino madit me Kato (Paska)

¹ Rwot oloko ki Moses i tim Cinai i dwe mukwoŋo me mwaka me aryone ma onoŋo doŋ gua woko ki i lobo Ejipt kun wacce ni,

² “Jo Icrael myero gukwer nino madit me Kato i kare ma giciko.

³ I nino dwe apar wiye aŋwen me dwe man otyeno, i kare ma giciko, en aye wubikwero iye; wubikwero kun wulubo cikke ducu ki lok ducu ma giciko i kome.”

⁴ Kit meno Moses ociko jo Icrael ni gukwer nino madit me Kato.

⁵ Ci gukwero nino me Kato i dwe mukwono, i nino dwe apar wiye aŋwen, otyeno i tim Cinai; kit ducu ma yam Rwot ociko ki Moses, jo Icrael bene gutimo kit meno.

⁶ Onoŋo tye jo mogo ma gudoko keni pi gudo kom dano muto, mumiyo pe gitwero kwero nino madit me Kato i nino meno. Gucito bot Moses ki Aron i nino meno;

⁷ ci jo meno guwacce ni, “Wan doŋ wadoko keni pi gudo kom dano muto; piŋo gigenowa pe watyer gityer pa Rwot i kin jo Icrael i kare ma giciko?”

⁸ Moses owaco botgi ni, “Koŋ wukur wek koŋ awiny gin ma Rwot biciko i komwu.”

⁹ Rwot owaco bot Moses ni.

¹⁰ “Wac bot jo Icrael ni, Kadi bed ŋatti mo i kinwu, nyo i kin likwayowu, odoko keni pi gudo kom dano muto, nyo otiŋo wot mabor, en pud twero kwero Kato pa Rwot.

¹¹ Gibikwero i dwe me aryo, i nino dwe apar wiye aŋwen, otyeno; gibicamo iye mugati ma tobi pe iye ki dek mogo makec.

¹² Pe gibiweko gin mo doŋ nio odiko, cogone mo pe gibituro; gibikwero kun gilubo cik ducu ma mako nino me Kato.

¹³ Ento dano ma olony, ma pe ocito ka wot mo, ento dok oweko kwero nino madit me Kato, dano meno waŋe birwenyo woko ki i kin lutugi, pien onoŋo pe otyero gityer pa Rwot i kare ma giciko; dano meno balle bidok i wiye.

¹⁴ Ka larok mo obedo i kinwu, ka en kwero Kato pa Rwot, en bitiyo kun lubo cik me nino me Kato ki gin ma giciko iye. Wubibedo ki cik acel pi labedo ki pi anywalli me lobo.”

Pol i wi kema

¹⁵ I kom nino ma giguro iye kema pa Lubaŋa, en aye pol obino, oboyo kom kema woko, en kema lok me caden; otyeno oumo wi kema ma nen macalo mac nio wa odiko.

¹⁶ Ci obedo kwede kit meno jwijwi; pol umo wiye dyeceŋ, ki gin macalo mac umo dyewor.

¹⁷ Ka ce pol owarre woko ki i kema, ci jo Icrael gicako wot anyim; i kabedo ka ma pol ocuŋ iye, jo Icrael giguro iye kemagi.

¹⁸ Jo Icrael gicako wot pi cik pa Rwot, dok pi cik pa Rwot giguro kemagi; ka ce pol pud oumo wi kema pa Rwot, ci gin bene pud gibedo i gonygi.

¹⁹ Ka pol omedde ki umo wi kema lwak nino mapol, jo Icrael bene gimedde ki gwoko cik ma mako tic pa Rwot kun pe gidak.

²⁰ I kare mukene pol umo wi kema pi nino mo manok, ci pi lubo cik pa Rwot gin bene gibedo i gony megi-nu kit meno; dok pi lubo cik pa Rwot miyo gidak.

²¹ I kin mukene pol bedo cakke otyeno nio wa odiko; ka odiko pol owarre woko ki i wiye, ci gicako wot; nyo ka omedde ori pi nino acel ki dywor acel, kare ma pol owarre iye-ni, en aye gicako iye wot bene.

²² Kadi bed ori i wiye pi nino aryo, nyo dwe acel, nyo pi kare mo malac, ka ce pol pud omedde ki umo wi kema, kun bedo kenyo, ci jo Icrael bene koŋ gibedo i gonygi kun pe gidak; ento ka owarre woko, ci gin bene gicako wot.

²³ Pi lubo cik pa Rwot miyo giguro kemagi, dok pi lubo cik pa Rwot miyo gidak, kun gigwokocik ma mako tic pa Rwot kit ma yam Rwot ociko ki i dog Moses.