Buk me Aŋwen pa Moses ma Gilwoŋo Wel 5 - Acoli Baibul

Gicwalo jo ma komgi ki keni woko i ŋe gony

¹ Rwot owaco ki Moses ni,

² “Cik jo Icrael gucwal ludobo ducu gua woko ki i gony, ki dano acel acel ma kome cwer tut, ki dano acel acel ma odoko keni pi gudo kom dano muto.

³ Wubicwalo co wa ki mon bene, kun wucwalogi woko ki i gony, wek pe gubal gonygi ma an abedo iye-ni odok keni.”

⁴ Jo Icrael gutiyo kit meno, ci guryemogi woko i ŋe gony; macalo Rwot con owaco bot Moses, jo Icrael gutiyo kit meno.

Cik ma mako culo waŋ jami

⁵ Rwot owaco bot Moses ni,

⁶ “Wac ki jo Icrael ni, Ka ce laco mo nyo dako mo otimo bal mo ma dano timo kun ginayo waŋ Rwot, ce otiŋo alii,

⁷ en bituco bal mere ma otimo-ni; ka dok en biculo waŋ gin marac ma otimo; bimedo iye acel me abic, ci miyo bot dano ma en otimo marac-ci.

⁸ Ento ka dano meno watte mo pe ma myero giculle waŋ gin marac-ci, ci giculo Waŋ gin marac meno bot Rwot pi ajwaka, kun gibamo i kom nyok romo me kwanyo bal ma gitimo kwede gin lakwany bal ki i kome.

⁹ Gityer ducu, nyo jami ducu maleŋ pa jo Icrael ma gikelo bot ajwaka bibedo mere.

¹⁰ Jami maleŋ ma dano acel acel okelo bibedo mere; gin ducu ma dano mo omiyo bot ajwaka bibedo mere.”

Cik ma mako nyeko

¹¹ Rwot owaco bot Moses ni,

¹² “Wac ki jo Icrael ni, Ka dako pa laco mo waŋe olal, ci otimo kir i kom cware,

¹³ ka laco-mo obuto kwede, ce cware pe oneyo, ma dako ojerre kekene kun lokke okanne woko, dok pe tye caden mo ma moko lok kom dako-nu, pien pe ginoŋe iye;

¹⁴ ka cwiny me nyeko omako laco, kun nyeko omake i kom dakone ma ojerre kekene-ni, nyo ka cwiny me nyeko omako laco, kun nyeko omake i kom dakone, kadi bed dako pe ojerre kekene,

¹⁵ ci laco bitero dakone bot ajwaka, kun tero gityer ma gimito pi dakone, agwata moko kwon acel me moko cayiri; pe bionyo moo i kome, pe biketo iye odok luban, pien meno gityer me moko kwon me nyeko, en gityer me moko kwon me lapo wic, ma bimiyo gipo pi bal meno.

¹⁶ “Ajwaka bikelo dako cok, ci cibo i nyim Rwot.

¹⁷ Ka dok ajwaka bitero pii maleŋ ki otako, ci jobo apwa ma i dye ot me kema, onyo i pii.

¹⁸ Ka ajwaka bicibo dako i nyim Rwot, bigonyo yer wi dako wek oket ata lijayi, ci keto gityer me moko kwon me lapo wic i cinŋ, ma en aye gityer me moko kwon me nyeko. Ajwaka bimako pii makec me ceno dano i ciŋe.

¹⁹ Ka ajwaka bimiyo dako-nu kwoŋo kwoŋ, kun waco ni, ‘Ka laco mo pe obuto kwedi, ka pe iŋak woko, kun ijerre kekeni ma it ye i te twero pa cwari, ci gin marac mo pe otimi pi pii man makec me ceno dano-ni,

²⁰ Ento ka ce waŋi olal woko, ma pud it ye i te twero pa cwari, ka ijerre kekeni, ci laco mo ma pe cwari obuto kwedi,

²¹ ci (ajwaka bimiyo dako-nu kwoŋo kwoŋ ma kelo ceno dano kun waco ki dako-nu ni,) Rwot omi in idok ŋat ma giceno ki dano, kun dano gikwoŋo akwoŋa ki nyiŋi i kin lutuwu, i kare ma Rwot bitweyo nyodoŋi woko ci miyo ii bene deŋ woko;

²² wek pii man me ceno dano ocit i cin ii, omi ii odeŋ, ci otwe nyodoŋi woko.’ Dako bigamo ni, ‘Amen, Amen.’

²³ “Lacen ajwaka bicoyo lok me ceno dano-ni i karatac, ka dok lwoko vinone woko ki pii makee-ci,

²⁴ ci bimiyo dakonu mato pii makec ma giceno ki dano-ni, ci pii me ceno dano bidonyo i iye, miyo iye mwode matek.

²⁵ Ka dok ajwaka bikwanyo gityer me moko kwon me nyeko woko ki i cin dako-nu, ci kwato gityer me moko kwon i nyim Rwot, tero i keno tyer.

²⁶ Ka ajwaka bijobo moko me gityer poŋ ciŋ acel obed gin me po i kome, biwaŋo i wi keno tyer; ka dok lacen en bimiyo dako-nu mato pii.

²⁷ Ka doŋ omiyo omato pii, ka ce onoŋo en otyeko jerre kekene kun otimo kir i kom cware, ci pii me ceno dano bidonyo i iye, miyo iye mwode matek; iye biden woko, nyodoŋe bitwene woko, dako-ni bidoko ŋat ma giceno dano ki nyiŋe i kin lutugi.

²⁸ Ento ka dako-nu pe ojerre kekene, ma bal mo pe i kome, gin marac mo pe bitimo, ci en binywalo litino.

²⁹ “Man aye cik ma mako lok me nyeko, ka dako ma tye i te twero pa cware noŋo wage olal, ci ojerre kekene,

³⁰ nyo ka cwiny me nyeko omako laco mo, kun nyeko omake i kom dakone; en bicibo dako i nyim Rwot, ci ajwaka bitiyo i kom dako kun lubo cik man ducu.

³¹ Laco pe bibedo ki bal mo, ento bal bidok i wi dako ka obalo.”