Buk me Aŋwen pa Moses ma Gilwoŋo Wel 4 - Acoli Baibul

Tic pa Lulevi

¹ Rwot owaco bot Moses ki Aron ni,

² “Kwan wellikwayo pa Kokat ma i kin likwayo pa Levi, kun ilubo doggolagi ki dog odi pa kwarogi,

³ cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic ma i kema me rwatte.

⁴ Man aye tic ma likwayo pa Kokat gibitiyo i kema me rwatte: gibitic i kom jami maleŋ makato.

⁵ Ka gony doŋ bicako wot, Aron ki awobene bidonyo i kema ka kwanyo boŋo kicika, ci giumo kwede canduk lok me caden,

⁶ Ka dok gibiumo wiye ki laa dyel, lacen gibiyaro boŋo ma bulu i kom meno, ka doŋ gibirwako talle iye.

⁷ Gibipeto boŋo ma bulu i kom meja me mugati me aketa i nyim Rwot, ka doŋ gibiketo caani i wiye, ki atabo me odok eceta, ki weer, ki cupa me onyo gityer amata; mugati ma gicano i nyim Rwot jwijwi bene obed i wiye.

⁸ Lacen gibiyaro boŋo makwar i wiye, ci meno gibiumo ki laa dyel laumme, ka doŋ gibirwako talle iye.

⁹ Ka dok gibikwanyo boŋo ma bulu, ci giumo ki okarmac, kacel ki laputte, ki magacce, ki caanine’ ki atabo moone ducu ma gitiyo kwede ticce;

¹⁰ ci gibiboyo en ki jami ticce ducu ki laa dyel laumme, ka doŋ gibipyelo i wi tal latiŋŋe.

¹¹ Gibiyaro boŋo ma bulu i kom keno tyer me jabu, ka dok gibiumo kome ki gin ma gikwoyo ki laa dyel, ka doŋ gibirwako talle iye.

¹² Gibikwanyo jami tic ducu ma gitiyo kwedgi i kabedo maleŋ, gibiboyogi ducu ki boŋo ma bulu, ka doŋ gibiumogi ki gin ma gikwoyo ki laa dyel, ci gibipyelo i wi tal latingi.

¹³ Gibijobo buru mac ma i keno me tyer woko, gibiyaro boŋo ma lamar lamar i wiye;

¹⁴ ka dok gibiketo iye jami tic ducu me keno tyer, ma gitiyo kwede tic i kome, weer lawaŋ mac, gin lacob riŋo, akwaya latokke ki becen, jami tic ducu me keno tyer; ka dok gibiyaro i kome laa dyel laumme, lacen gibirwako talle.

¹⁵ Ka Aron ki awobene doŋ gutyeko umo kabedo maleŋ ki jami ma i kabedo maleŋ ducu i kare ma giputo gony, lacen likwayo pa Kokat doŋ gibibino ka tinogi, ento pe gugud kom jami maleŋ ducu, wek pe guto. Magi aye jami me kema me rwatte ma likwayo pa Kokat gibitiŋo.

¹⁶ “Eleajar wod pa Aron aye biloyo moo tara, ki odok eceta ma ŋwece kur, ki gityer me moko kwon me nino ducu, ki moo wir, kun dok loyo kom kema ducu ki lwak jami ducu ma bedo iye, en aye kabedo maleŋ kikome ki jami ticce.”

¹⁷ Rwot owaco bot Moses ki Aron ni,

¹⁸ “Pe iwek doggola ducu me kaka pa jo pa Kokat guto gutum woko ki i kin jo pa Levi,

¹⁹ ento ber itimgi kit mau wek gubed makwo, ma pe guto i kare ma gibino cok ki jami maleŋ makato-ni: Aron ki awobene aye bidonyo ka nyutogi tic pa ŋat acel acel ki yec ma gibitiŋo,

²⁰ ento gin pe bidonyo iye ka neno kom jami maleŋ kadi matidi mo, wek pe guto.”

²¹ Rwot owaco bot Moses ni,

²² “Kwan wellikwayo pa Gercon bene, kun ilubo doggolagi ki dog odi pa kwarogi;

²³ ibikwano welgi cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic i kom kema me rwatte.

²⁴ Man en aye dog tic ma doggola pa Gercon ducu gibitiyo, me tiyo tic ki me tino yec:

²⁵ gibitiŋo boŋo cuka me kema, ki kema me rwatte ki laum wiye, kilaa dyel ma giumo kwede wiye malo,

²⁶ ki boŋo cuka me anaba me rumo dyekal, ki boŋo laum doggaŋ me dyekal ma orumo kema ki keno tyer, ki lwak tol lacikgi, ki jami tic ducu ma gitiyo kwedgi iye; gibitiyo tic ducu ma mitte i kom jami magi.

²⁷ Tic pa likwayo pa Gercon ducu gibitiyo kit ma Aron ki awo bene gicikogi i kom jami ducu ma gibitinone, ki i kom gin ducu ma gibitiyone; dok in aye ibipoko yecgi ducu botgi me agwoka,

²⁸ Man en aye tic pa doggola ducu pa likwayo pa Gercon ki i kema me rwatte; dog ticgi bibedo i te loc pa Itamar wod pa ajwaka Aron.

²⁹ “Likwayo pa Merari ibikwano welgi kun ilubo doggolagi ki dog odi pa kwarogi;

³⁰ ibikwano welgi cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic i kema me rwatte.

³¹ Magi aye gin ma gimiyo botgi me atiŋa, ma en aye ticgi ducu ki i kema me rwatte: lwak guti me kema, ki riine, ki lwak wirre ki lwak tedi tere,

³² ki wir ducu ma orumo dyekal, ki tedi tergi ducu, ki lwak teke lagurgi ki tol lacikgi, ki lwak jami ticgi ducu ki gin ma okemo tic ducu. Ibipoko botgijami ma gimito ni gutiŋ kun inyuto ki nyiŋgi,

³³ Man aye tic pa doggola ducu pa likwayo pa Merari, en aye dog ticgi ducu ki i kema me rwatte; bibedo i te loc pa Itamar wod pa ajwaka Aron.”

³⁴ Moses ki Aron ki lutel wi lwak gukwano wel likwayo pa Kokat, kun lubo doggolagi ki dog odi pa kwarogi,

³⁵ cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte;

³⁶ welgi ma gikwano kun lubo doggolagi oromo alip aryo, ki miya abiro ki pyerabic.

³⁷ Meno aye wel doggola ducu pa jo pa Kokat, jo ducu ma gutiyo tic i kema me rwatte, ma Moses ki Aron gukwano welgi, macalo Rwot ociko ki i dog Moses.

³⁸ Man wel likwayo pa Gercon ma gikwano welgi kun lubo doggolagi ki dog odi pa kwarogi,

³⁹ cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte;

⁴⁰ welgi ma gikwano kun lubo doggolagi oromo alip aryo, ki miya abicel ki pyeradek.

⁴¹ Meno aye Wel doggola ducu pa likwayo pa Gercon, jo ducu ma gutiyo tic i kema me rwatte, ma Moses ki Aron gukwano welgi, macalo Rwot ociko ki i dog Moses,

⁴² Man wel likwayo pa Merari ma gikwano welgi kun lubo doggolagi ki dog odi pa kwarogi,

⁴³ cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic, pi tiyo tic i kema me rwatte:

⁴⁴ welgi ma gikwano kun lubo doggolagi oromo alip adek, ki miya aryo.

⁴⁵ Meno aye jo me doggola pa likwayo pa Merari ma gikwanogi, ma Moses ki Aron gukwano welgi, macalo Rwot ociko ki i dog Moses.

⁴⁶ Jo ducu ki i kin jo pa Levi ma gikwano welgi, ma Moses ki Aron ki lutel wi Icrael gukwanogi kun lubo doggolagi ki dog odi pa kwarogi

⁴⁷ cakke ki i kom jo ma ditogi romo mwaka pyeradek o wa i kom jo ma ditogi romo mwaka pyerabic, jo ducu ma giromo donyo i dog tic pi tiyo tic mapatpat ki pi tiŋo yec i kema me rwatte

⁴⁸ jo ma i kingi ma gikwano welgi guromo alip aboro, ki miya abic ki pyeraboro.

⁴⁹ Macalo Rwot yam ociko kun wok ki i dog Moses ci gimiyogi ticgi kit meno, ŋat acel acel i dog ticce me tiyo tic nyo me tiŋo yec; gikwano welgi kit meno, macalo Rwot ociko ki Moses,