Buk me Aŋwen pa Moses ma Gilwoŋo Wel 36 - Acoli Baibul

Cik ma mako nyom pa anyira ma guleyo lobo pa wongi

¹ Ludito kaka pa kwarogi ma i doggola pa Gilead wod pa Makir ma wod pa Manace ma i doggola pa Yucepu gubino cok, ci guloko i nyim Moses ki ludito kaka mukene.

² Guwaco ni, “Laditwa, Rwot yam ociki ni imi lobo me aleya bot jo Icrael kun gibolo kwir; ci yam ociki ni imi ginaleya pa ominwa Lyel Jelopekad bot anyirane,

³ Ento ka ce awobe ma i kaka mukene gunyomogi ki i kin jo Icrael ata, ci miyo lobogi gi bi kwanyo woko ki i kom ginaleya pa kwarogi, gimedo i kom lobo pa kaka ma anyirane doŋ tye iyeni; meno miyo gibijwiko lobowa woko ma yam gipoko botwa ki kwir.

⁴ Dok ka kare me jubili pa jo Icrael oromo, ci lobogi gibimedo i kom lobo pa kaka ma anyira gitye iye-ni matwal, ci miyo lobowa me aleya bijwik woko.”

⁵ Moses ociko jo Icrael kit man, kun cikke oa ki bot Rwot, ni, “Lok me kaka pa likwayo pa Yucepu tye atir.

⁶ Doŋ man aye cik ma Rwot omiyo ma okemo kom anyira pa Lyel Jelopekad, ni, ‘Wek gin gunyomme ki dano ma gitamo ni ber, tekke ka ginyomogi i doggola mo ma i kaka pa kwarogi.

⁷ Lobo ma gimiyo bot jo Icrael me aleyagi pe gibilokone nia i kaka man dok i kaka mukene; pien dano acel acel ma i kin jo Icrael bimoko matwal i kom ginaleya ma i kaka pa kwarogi.

⁸ Dok ka nyako mo oleyo dul lobo mo ma i kaka mo ma i kin jo Icrael, ci en binyomme ki dano mo ma i doggola mo ma i kaka pa kwarogi, wek dano acel acel ma i kin jo Icrael obed ki lobone ma oleyo ki bot kwarone.

⁹ Kumeno, pe gibiloko ginaleya mo nia ki i kaka mo-ni dok i kaka mukene, ento kaka acel acel pa jo Icrael bimoko gire i lobo me ginaleyane kikome.’ ”

¹⁰ Anyira pa Jelopekad gutimo kit ma Moses ocikogi kwede.

¹¹ Makala, Tiŋa, Kogla, Mirika ki Noa, ma gin aye anyira pa Jelopekad, gunyomme ki awobe pa omegi wongi.

¹² Ginyomogi i doggola pa jo pa Manace wod pa Yucepu, omiyo lobo me aleyagi obedo i kaka me doggola pa wongi, pe gikobo woko.

¹³ Meno ducu aye gin lok ma Rwot ociko ki ma oŋolo ki i dog Moses bot jo Icrael i lobo aroo me Moab i ŋet kutu Jordan ma okemo Jeriko.