Buk me Aŋwen pa Moses ma Gilwoŋo Wel 34 - Acoli Baibul

Waŋ apokki me lobo Kanaan

¹ Rwot owaco bot Moses ni,

² “Cik jo Icrael kun iwaco botgi ni, Ka wudonyo i lobo Kanaan, ma en aye lobo ma gibimiyowu obed mewu me aleyawu, waŋ apokki me lobowu bibedo k it man:

³ Wan lobowu yo tuŋ acuc bicakke i tim me Jin ci rabo ŋet lobo Edom. Bia ki tuŋ agikki nam me Kado ma tuŋ wokceŋ,

⁴ ka doŋ bilokke dok tuŋ acuc ka ma giito iye malo i Akrabim, ka dok kato kwede wa i Jin, ki agikkine bibedo i ŋet Kadec-bamea yo tuŋ acuc, Ka dok bicito medde kwede nio wa i Kajar-adar, ka kato cito kwede i Ajimon,

⁵ Ka waŋ lobo cako lokke ki i Ajimon cito wa i nota ora me Ejipt; ci wane bigik i dog nam,

⁶ “Waŋ lobo ma yo tuŋ potoceŋ bibedo Nam Madit; dog namme bibedo waŋ lobowu ma yo tuŋ potoceij.

⁷ “Man aye bibedo waŋ lobowu ma yo tuŋ acam: bia ki i Nam Madit ci bicito atir o wa i kom got Kor.

⁸ Nia ki i kom got Kor bicito atir wa i yo ma donyo i Kamat, ci cito wa i Jedad;

⁹ ka dok bimedde cito wa i Jipron, ka bigik i Kajar-enan, Man aye bibedo waŋ lobowu ma yo tuŋ acam.

¹⁰ “Waŋ lobowu ma yo tuŋ wokceŋ bicakke ki i Kajar-enan cito atir o wa i Cepam.

¹¹ Ka waŋ lobo bilor dok tuŋ piny nia ki i Cepam o kwede wa i Ribla ma i ŋet Ain yo tuŋ wokceŋ. Ka dok bilor piny cito o kwede i kor got me nam me Kineret yo tuŋ wokceŋ,

¹² Ka dok bilor piny wa i Jordan, ka bigik i nam me Kado, Meno aye bibedo lobowu, ki waŋ apokkine ma orumo ducu.”

¹³ Moses dok ociko jo Icrael kun waco ni, “Man aye lobo ma wubileyo kun gipoko ki bolo kwir, ma yam Rwot ociko ni gimi bot kakawu aboŋwen ki nucu;

¹⁴ pien kaka pa Reuben ki kaka pa Gad gutyeko gamo ginaleyagi kun lubo dog odi pa kwarogi, kacel ki nucu kaka pa Manace bene,

¹⁵ Gutyeko gamo lobogi loka Jordan mukemo Jeriko, yo tuŋ wokceŋ, ka ma ceŋ tuc ki iye-ni.”

¹⁶ Rwot owaco bot Moses ni,

¹⁷ “Man aye nyiŋ dano ma gibipoko botwu lobo me ginaleyawu: ajwaka Eleajar ki Yocwa wod pa Nun.

¹⁸ Dok wubikwanyo latel wic acel ki i kaka acel acel wek gupok lobo me aleyawu.

¹⁹ Magi aye nyiŋ lutel; pi kaka pa Juda, Kaleb wod pa Jepune.

²⁰ Pi kaka pa Cimeon, Cemuel wod pa Amikud.

²¹ Pi kaka pa Benjamin, Elidad wod pa Kicion,

²² Pi kaka pa Dan, Buki wod pa Jogli.

²³ Pi likwayo pa Yucepu, pi kaka pa Manace, Kaniel wod pa Epod;

²⁴ ki i kaka pa Epraim, Kemuel wod pa Ciptan,

²⁵ Pi kaka pa Jabulon, Elijapan wod pa Pamak.

²⁶ Pi kaka pa Icakar, Paltiel wod pa Ajan.

²⁷ Pi kaka pa Acer, Akiud wod pa Celomi.

²⁸ Pi kaka pa Naputali, Pedael wod pa Amikud.

²⁹ Magi aye dano ma Rwot ociko ni gupok lobo me aleya pa jo Icrael ki i lobo Kanaan.’