Buk me Aŋwen pa Moses ma Gilwoŋo Wel 33 - Acoli Baibul

Kit ma jo Icrael gukobo ki wotgi nia i Ejipt o kwede i Moab

¹ Jo Icrael yam guwoto kun gikobo ki wotgi kit man, i kare ma gua woko ki i lobo Ejipt ki bucagi kun Moses ki Aron gitelo wigi.

² Yam Moses obedo ka coyo nyiŋ kabedo acel acel i kare ma gua ki iye, macalo Rwot ociko, Nyiŋ kabedo ki kit ma gukobo ki wotgi en ene:

³ Jo Icrael gua woko ki i Ramcec i nino dwe apar wiye abic me dwe mukwoŋo, i nino ma lubo nino madit me Kato (Paska), Gua gucito woko ki wayu kun jo Ejipt ducu gineno.

⁴ Noŋo jo Ejipt gitye ka yiko litino kayogi ma onoŋo Rwot ogoyo oneko woko, ocobo kwede kop ma oŋolo i kom lubaŋa ducu pa jo Ejipt.

⁵ Kit meno jo Icrael gua ki i Ramcec, gugony i Cukot.

⁶ Gua ki i Cukot, gugony i Etam ma tye i dog tim.

⁷ Gua ki i Etam, ci gulokke gudok cen i Piakirot ma yo tuŋ wokceŋ me Baaljepon; ci gugony i nyim Migdol.

⁸ Gua ki i Pi-akirot guwok gukato i dye nam, guo i tim. Guwoto wot me nino adek i dye tim me Etam, ci gugony i Mara.

⁹ Gua ki i Mara, gubino i Elim. I Elim yam tye iye waŋ it apar wiye aryo, ki otit pyerabiro; ci gugony kunnu.

¹⁰ Gua ki i Elim, gugony i ŋet Nam Makwar,

¹¹ Gua ki i ŋet Nam Makwar, gugony i tim Cin.

¹² Gua ki i tim Cin, gugony i Dopka,

¹³ Gua ki i Dopka, gugony i Aluc,

¹⁴ Gua ki i Aluc, gugony i Repidim ka ma pii amata pa dano obedo pe,

¹⁵ Gua ki i Repidim gucito wa i te got Kor. Ka pud gitye i yo me cito kunnu gugony i kabedo magi: tim Cinai,

¹⁶ Kibrot-atava,

¹⁷ Kajerot,

¹⁸ Ri tma,

¹⁹ Rimmon-perej,

²⁰ Libna,

²¹ Rica,

²² Keelata,

²³ got Ceper,

²⁴ Karada,

²⁵ Makelot

²⁶ Takat

²⁷ Tera

²⁸ Mitka

²⁹ Kacimona,

³⁰ Mocerot,

³¹ Bene-jaa-kan,

³² Kor-agidgad.

³³ Jotibata,

³⁴ Abrona,

³⁵ Ejion-geber,

³⁶ tim me Jin, en aye Kadec

³⁷ lacen gugony i te got Kor, i dog waŋ lobo me Edom.

³⁸ Ajwaka Aron oito malo i wi got Kor kit ma Rwot ociko, ci oto woko kunnu, i mwaka me pyeraŋwenne nia ma jo Icrael gua ki i lobo Ejipt, i nino mukwoŋo me dwe me abic,

³⁹ onoŋo Aron doŋ tye ki mwaka me ditte miya acel ki pyeraryo wiye adek i kare ma en oto ki i wi got.

⁴⁰ Ci kabaka me Arad, ma en Lakanaan ma bedo i Negeb i lobo owinyo pi bino pa jo Icrael.

⁴¹ Ka gua ki i te got Kor gugony i kabedo magi: Jalmona,

⁴² Punon,

⁴³ Obot,

⁴⁴ Iye-abarim ma i lobo Moab,

⁴⁵ Dibon-gad,

⁴⁶ Almon-Diblataim.

⁴⁷ Gua ki i Almon-diblataim gugony i dye godi Abarim, i nyim got Nebo.

⁴⁸ Gua ki kunnu, gugony i lobo aroo me Moab i ŋet Jordan ma cok ki Jeriko.

⁴⁹ Guguro kemagi i ŋet Jordan cakke i Bet-jecimot o kwede wa Abelcitim i bar aroo me Moab,

Lubaŋa ociko jo Icrael ma peya guŋolo Jordan

⁵⁰ I lobo aroo me Moab i ŋet Jordan ma cok ki Jeriko Rwot owaco bot Moses ni,

⁵¹ “Cik jo Icrael ni, Ka wuŋolo kulu Jordan wukato i lobo Kanaan,

⁵² ci wubiryemo jo ma gibedo i lobo meno woko ducu ki i nyimwu; wubibalo got megi ducu ma gigoro cal i komgi, ki cal jogigi me nyonyo ma giliyo aliya, dok wubimuko waŋ jogigi ma i wi godi,

⁵³ Wubicamo lobo-nu, wubibedo iye, pien atyeko miyo botwu ni obed mewu.

⁵⁴ Wubilimo lobo me aleyawu kun gipoko ki bolo kwir ma lubo kit ma doggolawu tye kwede, Wubimiyo dul lobo malac bot kaka maditone ki dul lobo manok bot kaka matino. Ka ma kwir opoto iye i kom dano mo, en aye bedo mere; wubilimo lobo me aleyawu kun lubo kaka pa kwarowu.

⁵⁵ Ento ka pe wuryemo jo ma gibedo i lobo-nu woko ki i nyimwu, ci gin jo meno ma wuwekogi gudoŋŋi gibibedo macalo atero mabit me cobo waŋwu ki okuto me cobo lakŋetwu, ci gibiyelowu i lobo ka ma wubibedo iye-ni,

⁵⁶ Ci abitimo i komwu kit ma onoŋo atamo ni abitimo i komgi.”