Buk me Aŋwen pa Moses ma Gilwoŋo Wel 31 - Acoli Baibul

Jo Icrael guculo kwor i kom jo Midian

¹ Rwot owaco bot Moses ni,

² “Doŋ icul kwor pa jo Icrael i kom jo Midian; lacen doŋ ibito, idok bot lutuwu.”

³ Ci Moses owaco ki lwak ni, “Wumi lumony ma gitye i kinwu gurukke ki jami lwenygi, wek gucit ka lweny i kom jo Midian, gucul kwor pa Rwot i komgi.

⁴ Wucwal dano alip acel mua ki i kaka acel acel ma i Icrael gucit i lweny.”

⁵ Kit meno ginoŋo dano alip apar wiye aryo ma gurukke pi lweny mua ki i lwak doggola mapol mada ma i Icrael, dano alip acel mua ki i kaka acel acel.

⁶ Moses ocwalogi woko ka lweny, kacel ki Finekaci wod pa ajwaka Eleajar ma omako jami maleŋ pa Lubaŋa ki tum me goyo oduru.

⁷ Gulwenyo i kom jo Midian macalo Rwot ociko ki Moses, ci guneko co megi ducu.

⁸ Luker abic pa jo Midian onoŋo tye i kin dano ma ginekogi; nyiŋgi Evi, Rekem, Jur, Kur ki Reba. Dok guneko Balaam wod pa Beor bene ki pala lucwan.

⁹ Jo Icrael guyako mon ki litino pa jo Midian, gutero woko; dok gumayo limgi makwo madito ki matino ducu, ki jamigi ducu.

¹⁰ Gaŋigi ducu i kabedo mapatpat ma gin gibedo iye, ki gonygi ducu, guwaŋo woko ki mac,

¹¹ ci gutero jami ducu ma guyako nyo gumayo, dano wa ki lee-gu, gucito kwede,

¹² gukelo bot Moses ki ajwaka Eleajar ki bot lwak jo Icrael, i gonygi ma i lobo aroo me Moab i ŋet Jordan, ma cok ki Jeriko.

Lonyo jami ma giyako

¹³ Moses ki ajwaka Eleajar ki lutel wi lwak ducu gucito woko ka rwatte kwedgi i ue gony.

¹⁴ Ci kiniga omako Moses i kom ludito me mony, i kom lulo dano alip ki lulo dano miya ma gudwogo ki ka tero dano i mony.

¹⁵ Moses owaco botgi ni, “Man wuweko mon ducu gudoŋ makwo piŋo?

¹⁶ Nen, mon-ni aye yam gulubo tam pa Balaam ci gumiyo jo Icrael guŋayo waŋ Rwot i lok i kom jok Peor ca, mumiyo two gemo opoto i kom lwak pa Rwot.

¹⁷ Kombeddi doŋ wunek litino co woko ducu ma i kin litinogi, dok wunek mon ducu ma doŋ otyeko ŋene ki co.

¹⁸ Ento litino anyira ducu ma peya gubuto ki co wugwokgi makwo gubed mewu.

¹⁹ Koŋ wubut woko i ne gony pi nino abiro. Jo ducu ma i kinwu ma guneko dano, ki jo ducu ma gugudo kom dano muto myero wulonnye kekenwu, kacel ki dano ma wuyakogi, i nino me adekke ki i nino me abirone.

²⁰ Wulony boŋŋi aruka ducu, gin ducu ma gitiyo ki laa, nyo ma gicweyo ki yer dyegi, ki jami ducu ma gitiyo ki bao nyo ki yat.”

²¹ Ajwaka Eleajar owaco bot lulweny ma onoŋo gucito i mony ni, “Man aye cik ma giketo, ma yam Rwot ociko ki Moses:

²² Jami ma obedo jabu, nyo ryal, nyo mola, nyo nyonyo, nyo koc, nyo racac keken,

²³ gin ducu ma mac pe balo, wubimiyo wok kato ki i mac ci bilony woko. Ento kadi bed kumeno, pud dok gibilonyo ki pii me lwoko kwer; ci gin ducu ma mac balo woko wubimiyo wok kato ki i pii.

²⁴ Myero wulwok bonniwu i nino me abirone, ci doŋ wubibedo ma wulony; ka lacen wubibino i gony.”

Poko jami ma giyako i mony

²⁵ Rwot owaco ki Moses ni,

²⁶ “Doŋ ikwan wel jami ma giyako ki i mony, dano ki lee bene; wukwan ki ajwaka Eleajar ki ludito kaka ma i ot pa kwarogi ma i kin lwak.

²⁷ Ci ipok jami ma giyako i mony i dul aryo, tuŋ cel pi lulweny ma gucito i mony, tuŋ cel pi lwak ducu.

²⁸ Dok ijog ajog pa Rwot ki bot lulweny ma gucito i mony kun ikwanyo acel i kom miya abic ki i kom dano, ki twoni, ki kana, ki romi ki dyegi.

²⁹ Kwany ki i kom nucu ma megi, ci imi bot ajwaka Eleajar obed gityer bot Rwot.

³⁰ I kom nucu ma tuŋ bot jo Icrael ibikwanyo iye acel i kom pyerabic ki kom dano, ki twoni, ki kana, ki romi nyo dyegi, ki i kom lim makwo ducu, ci imi bot Lulevi ma gigwoko kema pa Rwot.”

³¹ Ci Moses ki Eleajar gutiyo kit ma Rwot ociko ki Moses.

³² Jami ma lulweny guyako, ma odoŋ, onoŋo obedo romi alip miya abicel ki pyerabiro wiye abic,

³³ dyaŋi alip pyerabiro wiye aryo,

³⁴ kana alip pyerabicel wiye acel,

³⁵ ki dano alip pyeradek wiye aryo ma gin ducu aye anyira ma peya gubuto ki co.

³⁶ Nucune ma gipoko bot jo ma gucito i mony obedo romi alip miya adek ki pyeradek wiye abiro, ki miya abic;

³⁷ romi ma gijogo pi Rwot guromo miya abicel ki pyerabiro wiye abic.

³⁸ Dyaŋi guromo alip pyeradek wiye abicel; dyaŋi ma gijogo pi Rwot guromo pyerabiro wiye aryo.

³⁹ Kana gubedo alip pyeradek, ki miya abic; gin ma gijogo pi Rwot guromo pyerabicel wiye acel.

⁴⁰ Dano guromo alip apar wiye abicel; dano ma gijogo pi Rwot guromo pyeradek wiye aryo,

⁴¹ Moses omiyo dul ma gijogo me gityer pa Rwot bot ajwaka Eleajar, macalo Rwot ocike.

⁴² Nucu ma gipoko ki jo Icrael, ma Moses opoko pat ki maca pa jo ma yam gucito i mony,

⁴³ wek obed pi lwak, obedo romi alip miya adek ki pyeradek wiye abiro, ki miya abic,

⁴⁴ dyaŋi alip pyeradek wiye abicel,

⁴⁵ kana alip pyeradek, ki miya abic,

⁴⁶ ki dano alip apar wiye abice!’

⁴⁷ I kom nucu man ma obedo pi lwak Moses okwanyo iye acel ki i kom pyerabic, i kom dano ki i kom lee, ci omiyogi bot Lulevi ma gigwoko kema pa Rwot, macalo Rwot ocike kwede.

⁴⁸ Ka doŋ ludito ma giloyo lumony ducu, lulo dano alip ki lulo dano miya, gubino bot Moses.

⁴⁹ Guwacci, “Wan luticci watyeko kwano Wel lumony ma gitye i te locwa, ci onen ni pe tye dano acel mo ma orwenyo ki i kingi.

⁵⁰ Ci doŋ wakelo gityerwa bot Rwot, gin ma dano acel acel onoŋo i lweny, jami me jabu, mola bad, atego ŋut ciŋ, agit ciŋ ki tiko nut, pi kwanyo bal ki i komwa i nyim Rwot.”

⁵¹ Moses ki ajwaka Eleajar gugamo jabu meno ki botgi; gin ducu obedo jami me deyo kom ma gitiyo ki diro

⁵² Jabu ducu ma lulo dano alip ki lulo dano miya gutyero bot Rwot pekke oromo makato ratili miya aŋwen,

⁵³ Onoŋo lulweny ducu guyako jami, ŋat acel acel pire kene.

⁵⁴ Moses ki ajwaka gugamo jabu ki bot ludito wi mony, gutero i kema me rwatte obed gin me poyo wi Rwot i kom jo Icrael.