Buk me Aŋwen pa Moses ma Gilwoŋo Wel 30 - Acoli Baibul

Cik ma mako kwon

¹ Moses owaco bot ludito wi kaka pa jo Icrael ni, “Man gin ma Rwot ociko,

² ni, Ka laco mo okwoŋo kwoŋ mo bot Rwot, nyoocikke pi lok mo kun olamme kekene otwene kene ki cikke me timo gin mo-ni, myero pe otur cikkene, ento myero ocob kakare kit ma owaco kwede.

³ “Nyo ka nyako mo okwoŋo kwoŋ mo bot Rwot, otwene kwede ki cikke me timo gin mo-ni ma kun tye i paco pa wonne i kare ma pud tidi.

⁴ Ce wonne owinyo pi kwoijne ki cikke ma otwene kwede kekene, ci pe omedo ki waco iye lok mo bote, ci kwon ducu ma en okwono ki cikke ducu ma otwene kwede kekene bimoko i kome matwal.

⁵ Ento ka ce wonne ojuke woko i nino ma owinyo iye lokke-ni, ci kwoŋ pa nyako-nu ki lok ma otwene kwede ke kene pe bimoko i kome; Rwot bene bitimme kica, pien onoŋo wonne ogeŋo woko.

⁶ “Ka ce ginyomo nyako mo ma noŋo okwoŋo kwon nyo otwene kekene ki cikke kun oloko laboŋo tamo tere,

⁷ ce cware owinyo pire, ci pe omedo ki waco iye lok mo bote i nino ma owinyo iye-ni, ci kwoŋŋe ki cikke ma otwene kwede kekene bimoko i kome matwal.

⁸ Ento ka ce cware ojuke woko i nino ma owinyo iye lokke-ni, ci cware bikwanyo kwoŋ meno woko ki i kome, nyo lok mo ma onoŋo otwene kwede kekene kun oloko laboŋo tamo tere; Rwot bene bitimme kica.

⁹ “Ka ce daa-to nyo dako ma cware oryemo okwoŋo kwoŋ, ci lok ducu ma en otwene kwede kekene bimoko i kome,

¹⁰ “Ka dako mo okwoŋo kwoŋ nyo otwene kekene ki cikke ma doŋ ginyomo woko,

¹¹ ce cware owinyo pire ci pe omedo ki waco iye lok mo bote, dok pe ojuke, ci kwoŋ ducu ma en okwoŋo, ki cikke ducu ma otwene kwede, bimoko i kome.

¹² Ento ka ce cware ogeno woko i nino ma owinyo pire-ni, ci lok ducu ma dako-nu oloko ma mako kwoŋ ma okwoŋo nyo cikke ma otwene kwede pe bimoko, pien cware doŋ ogeŋo woko: Rwot bene bitimme kica iye.

¹³ Kwoŋ ducu ma dako okwoŋo nyo ma otwene kwede me keto aroma i kome kekene, cware twero moko, dok cware twero geŋo woko.

¹⁴ Ento ka cware pe owaco lok mo bote, obedo ka liŋ aliŋa nino ducu, miyo en moko kwede kwoŋ pa dakone ducu ki cikke ducu ma otwene kwede kekene, pien pe owaco lok mo bote i nino ma owinyo iye pire-ni.

¹⁵ Ento ka ori ma pe ogeno woko oyotoyot, ci bal pa dakone bidok i wiye ka pe ocobo.”

¹⁶ Meno aye cik ma Rwot ociko ki Moses ma mako Laco ki dakone ka okwono kwon, ki won nyako ki nyare ka okwoŋo kwoŋ i kare ma en pud tidi, ma noŋo pud tye i paco pa wonne.