Buk me Aŋwen pa Moses ma Gilwoŋo Wel 29 - Acoli Baibul

Gityer pi acakki mwaka manyen

¹ “I nino dwe acel me dwe me abiro wubibedo iye ki gurre maleŋ; pe wuti iye tic mo matek. En aye nino ma wubimiyo gwara kok iye,

² dok wubityero iye gitum awaŋa, gin ma ŋwece kur me yomo cwiny Rwot: wod twon acel, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo;

³ kacel ki gityer me moko mapwotte ma girubo ki moo mutikogi, agwata adek pi wod twon, agwata aryo pi nyok romo

⁴ ki agwata acel pi latin romo acel acel.

⁵ Wubityero bene nyok dyel acel pi gitum me bal me kwanyo bal ki i komwu.

⁶ Meno ducu wubityero kun wumedo ki gitum awaŋa me por dwe ki gityer me moko kwon mutike, ki gitum awaŋa me nino ducu ki gityerre me moko kwon, ki gityer amatagi kit ma cikgi tye. Gibibedo gin ma ŋwece kur ma yomo cwiny, gityer ma giwaŋo ki mac bot Rwot.

Gityer pi nino madit me Kwanyo Bal

⁷ “I nino dwe apar me dwe me abiro wubibedo ki gurre maleŋ, kun wukumo iye ki toncwiny; pe wuti iye tic mo,

⁸ ento wutyer gitum awaŋa bot Rwot, gin ma ŋwece kur me yomo cwinye: wod twon acel, nyok romo acel ki litino nyogi romi abiro ma ditogi mwaka acel acel; wunen ni komgi pe ki mwonyo.

⁹ Wumi bene gityer me moko kwon mapwotte ma girubo ki moo, agwata adek pi wod twon, agwata aryo pi nyok romo,

¹⁰ ki agwata acel pi latin romo acel acel.

¹¹ Wubityero bene nyok dyel acel pi gitum me bal ma gimedo ki gitum me bal me lakwany bal, ki gitum awaŋa me nino ducu, ki gityer mere me moko kwon, ki gityer amata mutikogi ducu,

Gityer pi nino madito me Bolo

¹² “I nino dwe apar wiye abic me dwe me abiro wubibedo ki gurre maleŋ; pe wuti iye tic mo matek. Wubikwero nino madito me woro Rwot pi nino abiro.

¹³ Wubityero gitum awaŋa i nino man mukwoŋo-ni, gityer ma giwaŋo ki mac wek obed gin ma ŋwece kur me yomo cwiny Rwot: litino twoni apar wiye adek, nyogi romi aryo ki litino nyogi romi apar wiye aŋwen ma ditogi mwaka acel acel; gubed ma komgi pe ki mwonyo.

¹⁴ Wubimiyo gityer me moko kwon mutikogi, moko mapwotte ma girubo ki moo ma romo agwata adek pi twoni apar wiye adek ki acel acel, agwata aryo pi nyogi romi aryo pi acel acel,

¹⁵ ki agwata acel pi litino romi apar wiye aŋwen pi acel acel.

¹⁶ Wubityero bene nyok dyel acel pi gitum me bal ma gimedo ki gitum awaŋa me nino ducu, ki “gityer me moko kwon ki gityer amata mutike.

¹⁷ “I nino me aryone wubimiyo litino twoni apar wiye aryo, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo,

¹⁸ kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye.

¹⁹ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon mere ki gityer amata mutikogi ducu.

²⁰ “I nino me adekke wubimiyo litino twoni apar wiye acel, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo,

²¹ kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye.

²² Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

²³ “I nino me aŋwenne wubimiyo litino twoni apar, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo,

²⁴ kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye.

²⁵ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

²⁶ “I nino me abicce wubimiyo litino twoni aboŋwen, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo,

²⁷ kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye.

²⁸ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

²⁹ “I nino me abicel wubimiyo litino twoni aboro, nyogi romi aryo ki litino nyogi romi apar wi ye aŋwen ma ditogi mwaka acel acel ma komgi pe ki mwonyo,

³⁰ kacel pi gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye,

³¹ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

³² “I nino me abiro wubimiyo litino twoni abiro, nyogi romi aryo ki litino nyogi romi apar wiye aŋwen ma ditogi mwaka acel acel, ma komgi pe ki mwonyo,

³³ kacel ki gityer me moko kwon ki gityer amata pi twoni ki nyogi romi ki litino romi ma lubo welgi, macalo cik tye.

³⁴ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

³⁵ “I nino me aborone wubibedo iye ki cokke madit me woro Lubaŋa; pe wuti iye tic mo matek,

³⁶ ento wutyer iye gitum awaŋa, gityer ma giwaŋo ki mac wek obed gin ma ŋwece kur me yomo cwiny Rwot: twon acel, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo,

³⁷ kacel ki gityer me moko kwon ki gityer amata pi twon ki nyok romo ki litino romi ma lubo welgi, macalo cik tye,

³⁸ Wubityero bene nyok dyel acel pi gitum me bal ma gimedo ki gitum awaŋa me nino ducu, ki gityer me moko kwon ki gityer amata mutike.

³⁹ “Meno aye gin ma wubityero bot Rwot i ninowu madito ma giciko, kun wumedo iye gityerwu me cobo kwon ki gityer mu kene ma iwu opwoyo, pi gitumwu me awaŋa, gityer me moko kwon ki me amata, dok pi gityerwu me lakwecwiny.”

⁴⁰ Moses otito ki jo Icrael lok ducu ma Rwot ocike kwede,