Buk me Aŋwen pa Moses ma Gilwoŋo Wel 28 - Acoli Baibul

Tyer me nino ducu

¹ Rwot owaco not Moses ni,

² “Cik jo Icrael kun iwaco botgi ni, ‘Myero wunen ni wukelo bota gityerra i kare ma giciko, en aye camma me gityer ma giwaŋo ki mac me bedo gin ma ŋwece kur ma yomo cwinya.’

³ “Dok iwac botgi ni, Man aye gityer ma giwaŋo ki mac ma wubityero bot Rwot: litino nyogi romi aryo ma ditogi mwaka acel acel ma komgi pe ki mwonyo, i nino acel acel, obed gitum awaŋa me nino ducu.

⁴ Wubityero latin romo acel odiko, ki latin romo mukene wubityero otyeno,

⁵ kacel ki moko kwon mapwotte ma romo agwata acel ma girubo ki moo nyig jeituni ma giodo aoda ma romo cupa aryo ki nucu pi gityer me moko kwon.

⁶ Meno aye gitum me nino ducu ma yam giciko pire i wi got Cinai obed gin ma ŋwece kur, gityer ma giwaŋo ki mac bot Rwot.

⁷ Gityer amata mutike bibedo koŋo vino ma romo cupa aryo ki nucu pi latin romo acel acel; wubiliyo koŋo vino makec me gityer amata i kabedo maleŋ i nyim Rwot.

⁸ Latin romo mukene wubityero otyeno kacel ki gityer me moko kwon ki gityer amata kit macalo wutimo ki gityer me odiko; bibedo gityer ma giwaŋo ki mac, gin ma ŋwece kur me yo mo cwiny Rwot.

Gityer me nino me cabit

⁹ “I kom nino me cabit wubityero nyogi romi aryo ma ditogi mwaka acel acel, ma komgi pe ki mwonyo, ki moko kwon mapwotte ma romo agwata aryo, ma girubo ki moo pi gityer me moko kwon, ki gityer amata mutike.

¹⁰ Man aye gitum awaŋa me nino me cabit acel acel ma wubimedo i kom gitum awaŋa me nino ducu ki gityer amata mutike.

Gityer me por dwe

¹¹ “I acakki dwe ducu en aye wubityero iye gitum awaŋa bot Rwot: litino twoni aryo, nyok romo acel ki litino nyogi romi abiro ma ditogi mwaka acel acel, ma komgi pe ki mwonyo;

¹² kacel ki moko kwon mapwotte ma girubo ki moo ma romo agwata adek pi twon acel acel, agwata aryo pi nyok romo acel-li

¹³ ki agwata acel pi latin romo acel acel; bibedo gitum awaŋa ma ŋwece kur me yo mo cwiny, gityer ma giwaŋo ki mac bot Rwot.

¹⁴ Gityer amata mutikogi bibedo koŋo vino ma romo cupa abic pi twon, cupa adek pi nyok romo, ki cupa aryo ki nucu pi latin romo. Man aye gitum awaŋa me dwe acel acel tyeko kwede dwe ducu ma i mwaka,

¹⁵ Dok bene wubityero nyok dyel acel bot Rwot pi gitum me bal; wubimedo i kom gitum awaŋa me nino ducu ki gityer amatane,

Gityer me nino madito me Mugati ma Tobi Pe Iye

¹⁶ “I nino dwe apar wiye aŋwen me dwe mukwoŋo en aye nino madit me Kato (Paska) pa Rwot.

¹⁷ Dok i kom nino dwe apar wiye abic me dwe acel-lu en aye nino madit; wubicamo mugati ma tobi pe iye pi nino abiro.

¹⁸ I kom nino mukwoŋone wubibedo iye ki gurre maleŋ; pe wuti iye tic mo matek.

¹⁹ Ento wubityero iye gityer ma giwaŋo ki mac, gitum awaŋa bot Rwot: litino twoni aryo, nyok romo acel, ki litino nyogi romi abiro ma ditogi mwaka acel acel; wunen ni komgi pe ki mwonyo,

²⁰ Wubityero bene gityer me moko kwon mapwotte ma girubo ki moo. Wumi ma romo agwata adek pi twon acel acel, agwata aryo pi nyok romo,

²¹ ki agwata acel pi latin romo acel acel.

²² Wubityero bene nyok dyel acel bot Rwot pi gitum me bal me kwanyo bal ki i komwu.

²³ Wubityero gitum magi kun wumedo ki gitum awaŋa me odiko, ma en gitum awaŋa me nino ducu.

²⁴ Wubityero cam me gityer ma giwaŋo ki mac, gin ma ŋwece kur me yo mo cwiny Rwot, kit meno pi nino abiro ki piny maru; wubityero kun wumedo ki gitum awaŋa me nino ducu ki gityer amata mutike.

²⁵ I nino me abirone wubibedo ki gurre maleŋ: pe wuti iye tic mo matek.

Gityer me nino madit me pwoyo kac

²⁶ “I kom nino me tyero cam me wi mwaka, ma wukelo iye gityer me moko kwon kai manyen bot Rwot i ninowu madit me’ kwero agikki cabit abiro, wubibedo iye ki gurre maleŋ. Pe wuti iye tic mo matek,

²⁷ ento wutyer iye gitum awaŋa, gin ma ŋwece kur me yo mo cwiny Rwot: litino twoni aryo, nyok romo acel, ki litino nyogi romi abiro ma ditogi mwaka acel acel;

²⁸ kacel ki gityer me moko kwon mapwotte ma’ girubo ki moo, Wumi ma romo agwata adek pi twon acel acel, agwata aryo pi nyok romo,

²⁹ ki agwata acel pi latin romo acel acel.

³⁰ Wubityero bene nyok dyel acel pi kwanyo bal ki i komwu.

³¹ Wubityerogi kacel ki gityer amata mutikogi kun wumedo ki gitum awaŋa me nino ducu. Wunen ni komgi pe ki mwonyo.