Buk me Aŋwen pa Moses ma Gilwoŋo Wel 26 - Acoli Baibul

Kwano Wel jo Icrael i Moab

¹ I ŋe two gemo Rwot owaco bot Moses ki ajwaka Eleajar wod pa Aron ni,

² “Kwan Wel jo Icrael ducu, cakke ki i kom jo ma ditogi romo mwaka pyeraryo dok kwede malo, kun ilubo dog odi pa kwarogi, jo Icrael ducu ma romo cito ka lweny.”

^3-4 Ci Moses ki ajwaka Eleajar guloko ki ludito i lobo aroo me Moab i ŋet Jordan ma cok ki Jeriko ni, “Wukwan Wel dano cakke ki i kom jo ma ditogi romo mwaka pyeraryo dok kwede malo,” macalo Rwot ociko ki Moses. Jo Icrael ma yam gua ki i lobo Ejipt gubedo jo magi:

⁵ Jo me kaka pa Reuben ma obedo latin kayo pa Yakobo ma nyiŋe mukene Icrael-li gin ene: Likwayo pa Kanok, Pallu,

⁶ Kejeron ki Karmi,

⁷ Meno aye doggola pa jo pa Reuben; welgi ducu oromo alip pyeraŋwen wiye adek, ki miya abiro ki pyeradek.

⁸ Likwayo pa Pallu gin aye Eliab,

⁹ ki awobene Nemuel, Datan ki Abiram, Magi aye Datan ki Abiram ma lwak guyero ma gupyem ki Moses ki Aron kun gibedo i kin lwak pa Kora i kare ma gujem i kom Rwot.

¹⁰ Lobo oŋamo doge omwonyogi woko ci guto kacel ki Kora i kare ma mac owaŋo dano miya aryo ki pyerabic, otyekogi woko, ci nyiŋgi odoko lok aboka me juko dano.

¹¹ Ento awobe pa Kora pe guto.

¹² Jo me kaka pa Cimeon gin ene: likwayo pa Nemuel, Jamin, Jakin,

¹³ Jera ki Caul.

¹⁴ Meno aye doggola pa jo pa Cimeon; welgi ducu oromo alip pyeraryo wiye aryo, ki miya aryo.

¹⁵ Jo me kaka pa Gad gin ene: likwayo pa Jepon, Kagi, Cuni,

¹⁶ Ojini, Eri,

¹⁷ Arod ki Areli,

¹⁸ Meno aye doggola pa jo pa Gad; welgi ducu oromo alip pyeraŋwen, ki miya abic,

¹⁹ Kaka pa Juda, Er ki On an ma awobe pa Juda yam guto con i lobo Kanaan.

²⁰ Doŋ jo me kaka pa Juda gin ene: Likwayo pa Cela, Perej ki Jera,

²¹ ki pa Kejeron ki Kamul ma awobe pa Perej.

²² Meno aye doggola pa jo pa Juda; welgi ducu oromo alip pyerabiro wiye abicel ki miya abic.

²³ Jo me kaka pa Icakar gin ene: likwayo pa Tola, Puwa,

²⁴ Jacub ki Cimron.

²⁵ Meno aye doggola pa jo pa Icakar; welgi ducu oromo alip pyerabicel wiye aŋwen, ki miya adek.

²⁶ Jo me kaka pa Jabulon gin ene: likwayo pa Cered, Elon ki Jaleel.

²⁷ Meno aye doggola pa jo pa Jabulon; welgi ducu oromo alip pyerabicel, ki miya abic.

²⁸ Jo me kaka pa Yucepu gin aye likwayo pa Manace ki Epraim,

²⁹ Kaka pa Manace. Makir wod pa Manace onywalo Gilead.

³⁰ Jo pa Gilead gin ene; likwayo pa Iejer, Kelek

³¹ Aciriel, Cekem,

³² Cemida ki Keper.

³³ Jelopekad wod pa Keper onywalo anyira keken, awo bene pe, Nyiŋ anyirane Makala, Noa, Kogla, Mirika ki Tiŋa.

³⁴ Meno aye doggola pa jo pa Manace; welgi ducu oromo alip pyerabic wiye aryo, ki miya abiro.

³⁵ Jo me kaka pa Epraim gin ene: likwayo pa Cutela, Beker, Takan,

³⁶ ki pa Eran ma wod pa Cutela.

³⁷ Meno aye doggola pa jo pa Epraim; welgi oromo alip pyeradek wiye aryo, ki miya abic. Meno ducu gubedo Likwayo pa Yucepu.

³⁸ Jo me kaka pa Benjamin gin ene: likwayo pa Bela, Acibel, Akiram,

³⁹ Cepupam, Kupam,

⁴⁰ ki pa Arud ki Naaman ma awobe pa Bela.

⁴¹ Meno aye doggola pa jo pa Benjamin; welgi ducu oromo alip pyeraŋwen wiye abic, ki miya abicel.

⁴² Jo me kaka pa Dan gin ene: likwayo pa Cukam,

⁴³ Doggola ducu pa likwayo pa Cukam Wel danogi oromo alip pyerabicel wiye aŋwen, ki miya aŋwen,

⁴⁴ Jo me kaka pa Acer gin ene: likwayo pa Imna, Icivi ki Beria,

⁴⁵ ki pa Keber ki Malkiel ma awobe pa Beria.

⁴⁶ Nya pa Acer nyiŋe obedo Cera.

⁴⁷ Meno aye doggola pa jo pa Acer; welgi ducu oromo alip pyerabic wiye adek, ki miya aŋwen.

⁴⁸ Jo me kaka pa Naputali gin ene: likwayo pa Jajeel, Guni,

⁴⁹ Jejer ki Cilem.

⁵⁰ Meno aye doggola pa jo pa Naputali; welgi ducu oromo alip pyeraŋwen wiye abic, ki miya aŋwen.

⁵¹ Wel jo Icrael ducu oromo alip miya abicel ki acel, ki miya abiro ki pyeradek.

⁵² Ci Rwot owaco bot Moses ni,

⁵³ “Ibipoko lobo i kin kaka magi obed me aleyagi kun ilubo wel nyiŋgi ma gicoyo.

⁵⁴ Ibimiyo dul lobo malac bot kaka maditone ki dul lobo manok bot kaka matino; dul lo bo me aleyagi gibipoko ma oporo wel dano ma i kaka mo-ni.

⁵⁵ Lobo gibipoko ki bolo kwir kun lubo kaka pa kwarogi.

⁵⁶ Gibilimo lobo me aleyagi muporo dit pa kaka acel acel kun lubo kit ma kwir opoto kwede.”

Kaka pa Levi

⁵⁷ Jo me kaka pa Levi gin aye doggola pa Gercon, Kokat ki Merari,

⁵⁸ kacel ki likwayo pa Libni, Kebron, Makali, Muci ki Kora, Kokat onywalo Amram,

⁵⁹ ma dakone obedo Yokobedi nya pa Levi ma onywalo i Ejipt. Yokobedi onywalo Aron ki Moses ki lam ingi Miriam ki Amram,

⁶⁰ Aron onywalo Nadab, Abiu, Eleajar ki Itamar,

⁶¹ ento Nadab ki Abiu guto woko i kare ma gutyero mac mapat i nyim Rwot, kit mac ma yam pe ocikogi kwede.

⁶² Gikwano wel jo Levi ducu ma co, cakke i kom jo ma ditogi romo dwe acel dok kwede malo, Welgi oromo alip pyeraryo wiye adek: ento welgi yam pe gikwano i kin jo Icrael, pien pe gipoko botgi dul lobo mo me aleyagi i kin jo Icrael.

Kaleb ki Yocwa aye gudog makwo

⁶³ Meno gin aye jo ma Moses ki ajwaka Eleajar gukwanogi i lobo aroo me Moab i ŋet Jordan, ma cok ki Jeriko.

⁶⁴ Ento pe tye ŋat mo acel i kingi ki i kin jo ma yam Moses ki ajwaka Aron gukwanogi i kare ma gukwano wel jo Icrael i tim me Cinai ca.

⁶⁵ Onoŋo yam Rwot owaco pigi bot Moses ni, “Gibito woko i tim,” ci dano mo pe odoŋ ki i kingi, kono nyo Kaleb wod pa Jepune ki Yocwa wod pa Nun keken aye gudoŋ.