Buk me Aŋwen pa Moses ma Gilwoŋo Wel 25 - Acoli Baibul

Jo Icrael guworo jok Baal me Peor

¹ I kare ma jo Icrael gubedo i Citim, gucako timo abor i kom anyira Moab.

² Anyira Moab gubedo ka lwoŋo jo Icrael ka ma gitumo iye gitum bot jogigi, ci jo Icrael gucamo riŋo ma gityero dok guryebbe i nyim jogigi.

³ Kit meno jo Icrael guribbe kengi ki jok Baal me Peor, cikiniga omako Rwot i komgi,

⁴ Rwot owaco bot Moses ni, “Kwany ludito ducu ma i kin lwak, idegi i wi yat malo i dyeceŋ i nyim Rwot, wek kiniga pa Rwot mager-ri oa woko i kom jo Icrael.”

⁵ Mumiyo Moses owaco ki luŋolkop pa jo Icrael ni, “ŋat acel acel ma i kinwu onek jo me kakane ma guribbe kekengi ki jok Baal me Peor.”

⁶ Dano mo i kin jo Icrael obino ki nya jo Midian otero i gaŋgi, kun Moses ki lwak jo Icrael ducu gineno, kun onoŋo gitye ka koko i nyim doggola kema me rwatte,

⁷ Ka Finekaci wod pa Eleajar ma wod pa ajwaka Aron oneno, en oa malo, oweko lwak, omako toŋ,

⁸ ocito olubo kor Laicrael wa i kicika ma i tyelo, ci ocobo gin aryo ducu, Laicrael ki dako-nu, ocobo igi pii. Kit meno omiyo two gemo oa woko ki i kom jo Icrael.

⁹ Ento onoŋo jo ma two gemo onekogi guromo alip pyeraryo wiye aŋwen.

¹⁰ Ci Rwot owaco bot Moses ni,

¹¹ “Finekaci wod pa Eleajar ma wod pa ajwakana Aron otyeko doŋ dwoko akecana cen ki i kom jo Icrael, pien nyeko ma omaka omako wa en bene ki i kingi, omiyo nene pe atyeko jo Icrael woko pi nyekona.

¹² Pi meno in iwac bote ni, atyeko miyo bote gicikkena me kuc.

¹³ En kacel ki Likwaye ma bilube gibibedo i tic me bedo ajwakana matwal pi gicikke man ma aketo kwedgi, pien nene nyeko omake pi Lubaŋane, ci otimo gin lakwany bal ki i kom Jo Icrael.”

¹⁴ Nyiŋ Laicrael ma gineko kacel ki nya jo Midian obedo Jimri wod pa Calu, ma ladit wi kaka i ot pa kwarogi i kin jo pa Cimeon.

¹⁵ Nyiŋ dako ma nya jo Midian ma gineko-ni Kojibi nya pa Jur ma yam ladit wi kaka i ot pa kwarogi i kin jo Midian.

¹⁶ Ci Rwot owaco bot Moses ni,

¹⁷ “Cit doŋ magwa i kom jo Midian, ilweny i komgi;

¹⁸ pien gin gupoto i komwu magwa pi bwolowu kun gimiyo wupoto i bal i lok pa jok me Peor, ki i lok pa Kojibi nya pa rwot ma i kin jo Midian ma lamingi i kare ma two gemo opoto pi lok pa jok me Peor.”