Buk me Aŋwen pa Moses ma Gilwoŋo Wel 22 - Acoli Baibul

Balak ocwalo lukwena ka lwoŋo Balaam

¹ Jo Icrael dok gucako wot ci guguro kemagi i lobo aroo me Moab loka Jordan mukemo Jeriko.

² Balak wod pa Jipor oneno gin ducu ma jo Icrael gutimo i kom jo Amor.

³ En kacel ki jo Moab gubedo ki lworo madwoŋ i kom jo Icrael, pien gipol mada, mumiyo lworo oloco kom jo Moab woko.

⁴ Ci jo Moab guwaco ki ludoŋo pa jo Midian ni, “Lwak jo man gibijwerowa woko ki gin ma orumowa ducu, macalo twon dyaŋ ma camo lum ki i bar tyeko woko.” Pienno Balak wod pa Jipor ma onoŋo obedo kabaka me Moab i kare meno,

⁵ ocwalo lukwena bot Balaam wod pa Beor i Petor ma cok ki kulu Euprate i lobo Amau ka Lwoŋe kun giwaco ni, “Nen, rok mo gubino ma gua ki i Ejipt, guumo lobo woko lipuk; kombeddi doŋ gubedo ma gukemo lobowa.

⁶ Tim ber ibin wek icen jo-ni woko pira, pien gitek gikata woko. Gwok nyo miyo abitwero loyogi, aryemogi woko ki i lobo kany; pien aŋeyo ni ŋat ma ilego gum kome, kome bedo gum, ki ŋat ma iceno doŋ giceno.”

⁷ Kit meno ludoŋo me Moab ki ludoŋo me Midian gucako wot ki lim me tyet i ciŋgi, Gucito bot Balaam, gutitte lok me kwena ma Balak ocwalo,

⁸ En owaco ki gin ni, “Tin wubut kany, ci abidwoko lok botwu kit ma Rwot biloko bota.” Kit meno ludito pa jo Moab gubedo bot Balaam.

⁹ Ci Lubaŋa obino bot Balaam, owaco ni, “Jo mene ma gitye boti-ni?”

¹⁰ Balaam owaco ki Lubaŋa ni, “Balak wod pa Jipor, ma kabaka me Moab, en aye ocwalla kwena ma kun waco ni,

¹¹ ‘Nen, rok mo gubino ma gua ki i Ejipt, ci guumo lobo woko lipuk. Tim ber ibin wek icen jo-ni woko pira; miyo gwok nyo abitwero lweny kwedgi ci aryemogi woko.’ ”

¹² Lubaŋa owaco ki Balaam ni, “In pe ibiwot kwedgi; pe ibiceno jo meno, pien gin jo ma gimiyogi gum con.”

¹³ Ka Balaam oa malo odiko, ci owaco ki ludito pa Balak ni, “Wudok giwu i lobowu; pien Rwot otyeko kwero ni pe acit kwedwu.’

¹⁴ Mumiyo ludito pa jo Moab gua gudok bot Balak, guwaco ni. “Balaam okwero bino kwedwa woko.”

¹⁵ Balak dok omedde ki cwalo ludito jo mapol makato gin ca, ki dano ma giŋene makato jo ma gukwoŋo ca.

¹⁶ Gin gucito bot Balaam, guwaco bote ni, “Balak wod pa Jipor owaco kuman ni, ‘Pe iwek gin mo ogeŋi bino bota;

¹⁷ pien ada abiketti deyo madit, dok gin ducu ma ibiwacca abitiyo.’’’

¹⁸ Ento Balaam odok iye ki lutic pa Balak ni, “Kadi bed Balak onoŋo omiya ryal ki jabu ducu ma i ode, pe atwero kalo wi cik pa Rwot Lubaŋana pi tiyo gin mo matidi nyo madit.

¹⁹ Doŋ alegowu ni wun bene tin wubed kany wek aŋe gin ma Rwot dok biwacca.”

²⁰ Ci Lubaŋa obino bot Balaam i dyewor meno owaco bote ni, “Ka jo meno gubino ka lwoni, ci ia malo icit kwedgii ento gin ma aciko boti aye ibitiyone.’

Balaam ki kanane

²¹ Kit meno Balaam oa malo odiko con, otweyo del kom kanane, ocito ki ludito pa jo Moab.

²² Ento kiniga omako Lubaŋa pi citone; ci lamalaika pa Rwot ocuŋ woko i yo macalo lamerokke. Balaam onoŋo oito i wi kana, ki luticce aryo onoŋo gitye kwede.

²³ Ci kana oneno lamalaika pa Rwot kun ocuŋ i dye gudo, kun noŋo owoto pala lucwanne, omako i cine, Kana olokke, oa woko ki i gudo, ocito i poto. Balaam ogoyo kana omiyo odok woko i yo gudo.

²⁴ Ci lamalaika dok ocuŋ i yo ka mo madiŋ ma i kin poto olok ma gigeŋo ki cel got tuŋŋi ki tuŋŋi.

²⁵ Ka dok kana oneno lamalaika pa Rwot, ci oyokke ki cel got, odiyo tyen Balaam i kom cel, omiyo en dok ogoye aye.

²⁶ Ka dok lamalaika pa Rwot omedde ki wot anyim ci ocuŋ tuŋ lacuc nyo tuŋ acam

²⁷ Ka kana oneno lamalaika pa Rwot, obuto woko piny ka tyen Balaam, ci kiniga omako Balaam, ogoyo kana ki odoone.

²⁸ Ka doŋ Rwot oyabo dog kana ci owaco bot Balaam ni, “An atimo gin aŋo i komi mumiyo igoya tyen adek kulu-ni?”

²⁹ Ci Balaam owaco ki kana ni, “Pien ibedo ka nywara. Kono atye ki pala i ciŋa, kono aneki kwede woko.”

³⁰ Ci kana owaco ki Balaam ni, “An pe a kanani ma ibedo i koma kare me kwoni ducu nio wa onyoo? Onoŋo yam koŋ anyebbe ka timo kit man i komi?” En ogamo ni, “Pe.”

³¹ Lacen Rwot oyabo waŋ Balaam, ci oneno lamalaika pa Rwot ka ocun i dye yo ma omako pala lucwan i ciŋe; ci Balaam okulo wiye piny, opoto piny aryeba cwiny,

³² Lamalaika pa Rwot owaco bote ni, “Piŋo igoyo kanani tyen adek kulu? Nen, an abino anyim ka juki, pien wotti akaka-ni pe oyomo cwinya.

³³ Kana onena ci olokke aa woko ki i nyima tyen adek kulu. Kono en pe onoŋo olokke oa woko ki bota, kono onoŋo doŋ aneki woko tin ada, kun aweko en makwo.”

³⁴ Ci Balaam owaco bot lamalaika pa Rwot ni, “Doŋ abalo, pien onoŋo pe aŋeyo ni icuŋ i yo pi lweny i koma. Mumiyo ka ce otimme marac ma pe ipwoyo, ci abidok cen ki ŋeya.”

³⁵ Ento lamalaika pa Rwot ogamo dog Balaam ni, “In doŋ icit ki jo meno; ento gin ma aciki aye ibiloko.” Pienno Balaam omedde ki wot kacel ki ludito pa Balak.

Balak ojolo Balaam

³⁶ Ka Balak owinyo ni Balaam doŋ obino, ci ocito ka romo kwede i gaŋ me Moab ma i waŋ lobo ma kulu Amon opoko, wa i waŋ lobo kikome.

³⁷ Ka Balak owaco bot Balaam ni. “An yam pe acwalo kwena ka lwoŋi? Piŋo pe nene ibino bota? An pe atwero keto deyo i komi?”

³⁸ Balaam ogamo ni, “Nen doŋ abino boti. Kombeddi an atye ki twero me loko gin mo boti? Lok ma Rwot biketo i doga, en aye myero aloki.”

³⁹ Balaam ocito gin ki Balak, ci gucito i Kiriat-kujot.

⁴⁰ Ka Balak ocako tumo twoni ki romi opoko riŋo ocwalo bot Balaam ki ludito ma yam gitye kwede,

Balaam olamo gum i kom jo Icrael

⁴¹ Orwone Balak otero Balaam ocito kwede malo wa i Bamot-baal, ci Balaam oneno jo Icrael ma gitye cok ki kunnu.