Buk me Aŋwen pa Moses ma Gilwoŋo Wel 20 - Acoli Baibul

Pii mua i pata got

¹ Jo Icrael ki lwakgi ducu guo i tim Jin i dwe mukwoŋo, ci gutiro i Kadec, gubedo iye. Miriam oto kenyo, giyike bene kenyo.

² Pii onoŋo pe tye me amata pa lwak, ci gucokke kacel i kom Moses ki Aron.

³ Gukeco i kom Moses kun giwacci, “Kono yam wato woko i kare ma utmegiwa guto i nyim Rwot-ti, kono ber,

⁴ Piŋo nene ikelo lwak pa Rwot i tim ata kany, wek wato woko, wan kacel ki limwa?

⁵ Piŋo nene imiyo waa woko ki i Ejipt, ikelowa i kabedo man marac-ci? Pe kabedo ma ceko bel, kadi wa oduro nyo olok nyo okwer pomegranat; pii mo bene pe me amata.”

⁶ Moses ki Aron gua woko ki i nyim lwak, gucito doggola kema me rwatte, gupoto piny iryeba cwiny. Ci deyo pa Rwot onen botgi,

⁷ Rwot owaco ki Moses ni,

⁸ “Kwany odoo ki i nyim canduk lok le caden, ci igur lwak kacel, wun ki meru Aron, ci iwac ki pata got ki i nyim lwak ni owek piine okatti woko. Kit meno ibikelo pii pigi nia ki i pata got wek lwak gumati, ki limgi bene.”

⁹ Moses okwanyo odoo woko ki i nyim Rwot kit macalo ocike kwede.

¹⁰ Moses ki Aron gucoko lwak kacel i nyim pata got, ci Moses owaco botgi ni, “Doŋ wuwiny ba, wun lujemo-ni. Wumito ni wan wakel pii nia ki i pata got man piwu?”

¹¹ Ci Moses oti;mo ciŋe malo, ogoyo pata got ki odoone tyen aryo kulu; ci pii ocorre limayi, lwak gumato, ki limgi makwo bene,

¹² Ento Rwot owaco bot Moses ki Aron ni, “Pien wun pe wuye an, kun pe wunyuto ki i nyim jo Icrael ni an aleŋ, pi meno wun pe doŋ wubitero lwak man i lobo ma abimiyogi-ni.”

¹³ Man en aye pii me Meriba, ka ma jo Icrael gukeco iye i kom Rwot ci en onyutte kene ni eleŋ i kingi-ni.

Jo Edom gukwero ni jo Icrael pe guwok ki i lobogi

¹⁴ Moses ocwalo lukwena ma gicito bot kabaka me Edom nia ki i Kadec ci guwacci, “Omeru Icrael owaco kuman ni, In iŋeyo can madito ducu ma opoto i komwa:

¹⁵ kit ma yam kwarowa guwoto kwede i Ejipt, ma wabedo i Ejipt pi kare malac, ci jo Ejipt gutimowa magwa, wan ki kwarowa ducu.

¹⁶ Ka yam wakok bot Rwot, en owinyo dwanwa, ocwalo lamalaika, okwanyowa woko ki i Ejipt. Ci kombeddi watye doŋ i Kadec, i gaŋ ma doŋ cok ki waŋ lobowu.

¹⁷ Ber wuwek wawok ki i lobowu. Pe wabiŋak wawok ki i poto mo, nyo i poto olok, pe wabimato pii ma i waŋ it, Wabimol ma walubo gudo madit-ti pa Kabaka, pe wabiŋak wadok yo tun acuc nyo tuŋ acam, nie ka wawok wakato waŋ lobowu.”

¹⁸ Ento jo Edom guwaco ni, “Pe wubiwok ki i lobowa, mi yo wan aye wabino i komwu ki pala lucwan.”

¹⁹ Jo Icrael gugamo ni, “Wabiwok i gudo madit keken. Ka wamato piiwu mo, wan nyo limwa makwo, wabiculo wane. Wek wawok wakat ki tyenwa keken, lok mo mukene pe.”

²⁰ Jo Edom dok guwacci, “Pe wubiwok ki i lobowa.” Ci jo Edom gubino ka lweny i komgi ki lwak co mapol ki mony matek.

²¹ Kit meno jo Edom gukwero miyo jo Icrael kato kun giwok ki i lobogi; omiyo jo Icrael gua gulokke, guceyo yo mukene.

Aron oto i wi got Kor

²² Lwak jo Icrael ducu gua ki i Kadec, gubino i te got Kor.

²³ Rwot owaco bot Moses-ki Aron i te got Kor, i waŋ lobo Edom, ni,

²⁴ “Aron aye doŋ bito, bidok bot lutugi; en pe bidonyo i lobo ma amiyo bot jo Icrael, pien yam wujemo i kom cikka i dog pii me Meriba.

²⁵ Ter Aron ki wode Eleajar, icit kwedgi malo i wi got Kor,

²⁶ iluny boŋo tic pa Aron ducu ki i kome, ci iruk ki wode Eleajar, pien Aron doŋ bidok bot lutugi, en bito ki kunnu.”

²⁷ Moses otiyo kit ma Rwot ocike kwede, Guito malo i wi got Kor kun lwak ducu gineno.

²⁸ Moses olunyo bone tic pa Aron woko ducu, ci oruko kwede wode Eleajar, Aron oto woko ki kunnu i wi got. Lacen Moses ki Eleajar gulor woko piny ki i wi got,

²⁹ Ka lwak jo Icrael ducu guneno ni Aron doŋ oto, ci gukoke nino pyeradek.