Buk me Aŋwen pa Moses ma Gilwoŋo Wel 19 - Acoli Baibul

Buru roya makwar

¹ Rwot owaco bot Moses ki Aron ni,

² “Man en cik ma an Rwot aye aciko: Cik jo Icrael ni gukel boti roya makwar maberre ma kome pe ki mwonyo, ma peya gitiyo kwede me pur.

³ Ibimiyo bot ajwaka Eleajar ci gibitero woko i ŋe gony, ka doŋ gibineko i nyim Eleajar.

⁴ Ajwaka Eleajar bigwelo remone ki lwet cine, ci kiro remone tyen abiro mukemo nyim kema me rwatte.

⁵ Gibiwaŋo kom roya woko ma kun en neno; pyene ki riŋone ki remone ki cete, gibiwaŋone ducu.

⁶ Dok ajwaka bikwanyo yat cedar ki anyero ki uci makwar ci bibologi i dye mac ma waŋo riŋo roya-ni.

⁷ Ka dok ajwaka bilwoko boŋŋine ki pii, lwoko kome ki pii, ka doŋ lacen bidok i gony; ci ajwaka bibedo keni nio wa otyeno.

⁸ Ŋat ma onoŋo owano roya-ni bene bilwoko boŋŋine, lwoko kome ki pii, ci bibedo keni nio wa otyeno.

⁹ Ci dano mo ma olony, ma pe kome ki keni aye bijobo buru roya-ni, ci biketo i kabedo mo ma olony, woko ki i ŋe gony, Gibikano pi lwak jo Icrael pi yubo pii me lwoko kwer; meno gitimo pi kwanyo bal.

¹⁰ Ŋat ma ojobo buru bene bilwoko boŋŋine ci bedo keni nio wa otyeno. Man bibedo cik matwal bot jo Icrael ki bot Lurok ma bedo i kingi.

Ŋat ma odoko keni pi gudo kom dano muto

¹¹ “Ŋat ma ogudo kom dano mo ma oto bibedo keni pi nino abiro.

¹² Bilonynye kekene i ki pii me lwoko kwer i nino me adekke ki i nino me abiro miyo bibedo ma olony. Ento ka pe olonnye kekene i nino me adekke ki i nino me abiro, ci pe doŋ bibedo ma olony.

¹³ Dano mo-ni ma ogudo kom dano muto, ce pe olonnye kekene, noŋo obalo kema pa Rwot, omiyo odoko keni. Dano meno waŋe birwenyo woko ki i kin jo Icrael. En bedo keni pien pii me lwoko kwer peya gionyo i kome, miyo keni mere pud tye i kome.

¹⁴ “Ka dano oto i kemawu mo cik tye kit man: dano acel acel ma donyo i kema meno, ki dano ducu ma gubedo iye ka dano-nu oto, gibibedo keni pi nino abiro.

¹⁵ Dok agulu nyo atabo-gu ducu ma i kema ma pe giumo wigi bedo keni.

¹⁶ Dano mo ka tye i tim ce ogudo kom dano ma gineko ki pala Lucwan, nyo kom dano mo ma oto kene, nyo cogo dano mo, nyo lyel ma giyiko iye dano, bibedo keni pi nino abiro,

¹⁷ Pi lonyo dano ma odoko keni kit meno gibikwanyo buru mo i kom buru roya ma yam gineko me kwanyo bal, gibiketo i otako, ci gimedo iye pii ma mol.

¹⁸ Dano mo ma olony bikwanyo anyero ci luto i pii-nu, kiro i kom kema ki i kom jami ducu ma tye iye, ki i kom dano ducu ma onoŋo gitye kenyo. Gibitimo kumeno bene pi ŋat ma ogudo cogo-ni nyo ma ogudo kom dano ma gineko nyo ma oto kene, nyo ma ogudo lyel ma giyiko iye dano.

¹⁹ Dano ma olony bikiro pii meno i kom dano ma keni i nino me adekke ki i nino me abiro, En bilonyo dano ma keni-ni i nino me abirone, dok dano-nu bilwoko boŋŋine, lwoko kome ki pii, ci otyeno noŋo en doŋ olony.

²⁰ “Ento ka dano mo onoŋo tye keni, ce pe olonnye kekene, dano meno waŋe birwenyo woko ki i dye lwak pa Lubaŋa, pien noŋo obalo kabedo maleŋ pa Rwot omiyo odoko keni, En bedo keni pien pii me lwoko kwer noŋo pe gionyo i kome,

²¹ Meno bibedo cik botwu matwal. Ŋat ma okiro pii me lwoko kwer bilwoko boŋŋine; ki ŋat mo ma ogudo pii me lwoko kwer bibedo keni nie wa otyeno.

²² Gin ducu ma dano ma keni-ni ogudo bibedo keni; ŋat ma ogudo jami-nu bene bibedo keni nie wa otyeno.”