Buk me Aŋwen pa Moses ma Gilwoŋo Wel 17 - Acoli Baibul

Odoo pa Aron

¹ Rwot owaco bot Moses ni,

² “Lok ki jo Icrael ci igam odoo ki botgi, odoo acel pi dog ot pa kwarogi acel acel. Gam ki bot lutel wigi ducu, ma oporo dog odi pa kwarogi, odoo ducu apar wiye aryo. Co nyiŋ dano acel acel i kom odoone,

³ ci ico nyiŋ Aron i kom odoo pa likwayo pa Levi; pien ludito wi kaka ki i dog odi pa kwarogi gibibedo ki odoogi acel acel.

⁴ Ibicibogi i kema me rwatte i nyim canduk lok me caden ka ma arwatte iye kwedwu-ni.

⁵ Ci odoo pa dano ma abiyero en aye bilot. Meno aye abinoŋo iye yo me juko jo Icrael ma gibedo ka nur i koma-ni.”

⁶ Moses oloko ki jo Icrael, ci lutel wigi ducu gukelo odoo bote, odoo acel pi lutel wigi acel acel, ma oporo wel odi pa kwarogi, odoo apar wiye aryo; odoo pa Aron bene onoŋo tye i kin odoogi.

⁷ Ci Moses ocibo odoo ducu i nyim Rwot i kema lok me caden.

⁸ Orwone Moses odonyo i kema lok me caden; ci, nen, odoo pa Aron ma ocuŋ pi dog ot pa Levi-ni aye olot woko, ocako kico bolo olaŋ, ci oturo ture onyako nyig yaa mucek.

⁹ Ka Moses okelo odoo ducu nia ki i nyim Rwot, otero bot jo Icrael ducu, guneno, ci dano acel acel okwanyo odoone.

¹⁰ Rwot owaco bot Moses ni, “Dwok odoo pa Aron i nyim canduk lok me caden kakare, wek gigwok obed lanyut pi jo mujemo, wek ijuk ki nurgi atata i koma, ogik woko, wek pe to opot i komgi.”

¹¹ Moses otimo kit ma Rwot ocike kwede.

¹² Ci jo Icrael guwaco bot Moses ni, “Nen ba, watum woko do, keckom opoto i komwa omiyo wato, wato woko.

¹³ Jo ducu ma gibino cok, ma gibino cok ki kema pa Rwot, gito woko. Wan ducu myero wato woko bo?”