Buk me Aŋwen pa Moses ma Gilwoŋo Wel 12 - Acoli Baibul

Miriam ki Aron guloko lok akeca i kom Moses

¹ Onoŋo Moses onyomo dako mo ma nya jo Kuc, ci Miriam ki Aron gucako loko lok akeca i kom Moses pi dako-nu.

² Gubedo ka waco ni, “Rwot obedo ka lok ki dog Moses kene bo? Pe obedo ka lok ki dogwa bene?” Ci Rwot owinyo yo.

³ Moses onoŋo yam mwol matek, mwol makato dano ducu ma onoŋo yam gitye i wi lobo-ni,

⁴ Cutcut Rwot owaco bot Moses ki Aron ki Miriam ni, “Wukat woko, wun adek ducu, wubin i kema me rwatte.” Gin adek ducu gukato woko.

⁵ Ci Rwot olor piny ki wir me pol, ocuŋ i dog kema me rwatte, ka olwoŋo Aron ki Miriam. Gin aryo ducu gukato anyim.

⁶ Ci owacci, “Wuwiny lokka. Ka ce tye lanebi mo i kinwu, an Rwot aweko en neya ki i ginanyuta, aloko kwede ki i waŋ lek.

⁷ Ento bot laticca Moses pe bedo kit meno; pien atyeko keto oda ducu i ciŋe,

⁸ Abedo ka lok kwede waŋ ki waŋ, ka maleŋ atyer, pe agoŋo lok; en neno kit ma Rwot cal kwede, Piŋo pe wulworo loko lok akeca i kom laticca Moses?”

⁹ Kiniga omako Rwot i komgi, ci ocito woko.

¹⁰ Ka pol owarre woko ki i wi kema me rwatte, ci nen, kom Miriam orugo woko cut, okwor matar macalo pee. Ka Aron olokke yo tuŋ bot Miriam, oneno kome orugo woko matar

¹¹ ci owaco bot Moses ni, “Ai, laditta, pe iket can i komwa pien watimo lok me miŋo, doŋ wabalo.

¹² Pe iwek en obed macalo latin ma ginywalo ma doŋ oto, ma riŋo kome nucune doŋ oballe woko ma pud oa aaya ki i minne.”

¹³ Moses okok bot Rwot ni, “Caŋe ba, ai Lubaŋa, abako doga boti do.”

¹⁴ Ento Rwot owaco bot Moses ni, “Ka nene wonne aye onoŋo oŋulo laa i waŋe keken, kono pe en obedo ki lewic pi nino abiro? Wek koŋ gitweye woko i ŋe gony pi nino abiro, ka lacen gibikele doŋ i gony.”

¹⁵ Kit meno gitweyo Miriam woko i ne gony pi nino abiro; ci lwak pe gumedo ki dak ka mo nio waŋ ma gimiyo Miriam odwogo woko i gony,

¹⁶ Ka doŋ lacen dano gucako wot nia ki i Kajerot, ci gugony i tim Paran gubedo iye.