Buk me Aŋwen pa Moses ma Gilwoŋo Wel 11 - Acoli Baibul

Jo Icrael gukok pi riŋo

¹ Dano gubedo ka lok ki akeca pi can ducu ma gitye iye, ci Rwot owinyo; ka Rwot otyeko winyone, kiniga omake, ci mac pa Rwot opoto, olyel i kingi, owaŋo kabedo mogo ma i ŋet gony.

² Lwak gukok bot Moses, ci Moses olego Rwot, ka mac ocako pye.

³ Mumiyo nyiŋ kabedo meno gilwoŋo ni, Tabera, pien mac pa Rwot olyel i kingi.

⁴ I kare meno lwak jo a ta ma gitye i kingi cwinygi opukke matek, omiyo jo Icrael bene gucako koko doki, kun giwaco ni, “Lutuwa, aŋa ma bimiyowa riŋo me acamawa?

⁵ Pud wapo pi rec ma yam wacamo nono i Ejipt, ki pi okwer ki okono ki kituŋgulu maboco ki kituŋgulu matino ki kituŋgulu matikki;

⁶ ento i kare-ni kero komwa doŋ peke, dok gin mo bene doŋ peke, kono nyo manna man ma waneno keme-ni.”

⁷ Onoŋo manna nen macalo nyig koo, dok bene nen macalo odok yat ma gilwoŋo bedola.

⁸ Dano gicito ka jobone, ka girego ki kidi nyo giodo ki pany, ka gitedo ki agulu, nyo gitimo ki capatine; ka gicamo, mitte rom ki mit pa capat ma gitedo ki moo.

⁹ Ka toyo oluk i dye gony ki i dyewor, ci manna bene poto piny.

Moses oyero ludoŋo pyerabiro

¹⁰ Moses owinyo ka dano gikok i doggolagi ducu, kun gat acel acel tye i dog kemane; ci kiniga omako Rwot matek, Moses bene cwinye pe obedo yom.

¹¹ Moses owaco bot Rwot ni, “Piŋo itima marac kuman? Piŋo an pe anoŋo gum mo i nyimi, mumiyo in doŋ iketo peko pa lwak man ducu i koma?

¹² Onoŋo an aye abedo min lwak man ducu bo? An aye yam anywalogi bo, mumiyo Iwaco bota ni atiggi i kora, macalo lapidi tiŋo latin ma pud dot, atergi i lobo ma yam ikwoŋo pire ni ibimiyo bot kwarogi?

¹³ Ni kono abinoŋo riŋo kwene me amiya ki lwak dano man ducu? Pien gibedo ka kok i nyima kun giwaco ni, ‘Miniwa riŋo wek wacam.’

¹⁴ An pe atwero tigo lwak dano man pira kena; yecce pek mukato kare.

¹⁵ Ka ibedo ka tima kit man, ci ber ineka woko magicel, ka anoŋo gum mo i nyimi, wek pe abed ka neno can kuman.”

¹⁶ Rwot owaco bot Moses ni, “Cokka jo pyerabiro ki i kin ludoŋo pa jo Icrael, ma igeyo ni gin ludoŋo ki i kin lwak ki ludito ma loyogi; ci ikelgi i kema me rwatte, wek gucuŋ kunnu kacel kwedi.

¹⁷ An abilor piny abino ka lok kwedi kunnu; ci abikwanyo cwinya mo ma tye i komi-ni, abiketo i komgi; miyo gibinywako tigo peko pa lwak kacel kwedi, wek in pe doŋ ibed ka tinone piri keni.

¹⁸ Wac bot lwak ni, ‘Wulonnye kekenwu wubed maleŋ pi nino ma diki, ci wubicamo riŋo; pien wubedo ka kok i it Rwot kun wuwaco ni, “Aŋa ma bimiyowa riŋo me acamawa? Pien yam onoŋo watye maber giwa i Ejipt.” Pi meno Rwot bimiyowu riŋo ci wubicamo.

¹⁹ Pe wubicamo pi nino acel keken, nyo nino aryo, nyo abic, nyo apar, nyo pyeraryo,

²⁰ ento wubicamo pi dwe acel kulu, nio ka bikatti woko ki i umwu, nio ka ocido cwinywu woko, pien wutyeko kwero Rwot ma bedo i kinwu-ni kun wukok i nyime ki pig waŋwu, wuwaco ni, “Piŋo yam waa woko ki i Ejipt?”’”

²¹ Ento Moses ogamo ni, “Jo ma abedo i kingi welgi romo alip miya abicel, co ma giwoto ki tyengi, ci in iwaco ni, ‘Abimiyogi riŋo wek gucam pi dwe kulu!’

²² Myero ginek lwak lim makwo, romi ki dyani-gu, wek oromgi? Nyo lwak rec ducu ma, tye i nam gibicoko kacel pigi, wek oromgi?”

²³ Rwot ogamo dog Moses ni, “Cin Rwot aye doŋ odoko cek bo? Ibineno tin ka ce lokka bicobbe boti kakare nyo pe.”

Ludoŋo guloko macalo lunebi

²⁴ Moses okato woko ka tito ki dano lok ma Rwot owaco; ci ocoko jo pyerabiro ki i kin ludoŋo pa jo Icrael, oketogi gurumo kema me rwatte.

²⁵ Ka Rwot olor piny ki pol, ci oloko kwedgi, okwanyo cwinye mo ma tye i kom Moses, oketo i kom ludoŋo pyerabiro. Ka cwiny pa Lubaŋa opoto i komgi, ci gucako lok macalo lunebi. Ento pe dok gumedde ki timo kit meno.

²⁶ Onoŋo jo aryo gudoŋ cen i gony, acel nyiŋe Eldad ki mukene nyiŋe Medad, ci cwiny pa Lubaŋa opoto i komgi. Onoŋo gitye i kin jo ma yam gicoyo nyiŋgi-ni, ento pe gukato woko gucito i kema me rwatte, mumiyo gubedo ka lok macalo lunebi i dye gony.

²⁷ Latin awobi mo oriŋo otito bot Moses ni, “Eldad ki Medad gitye ka lok macalo lunebi i dye gony.”

²⁸ Ci Yocwa wod pa Nun, ma onoŋo obedo lakeny pa Moses cakke wa i tinone, owacci, “Moses, laditta, jukgi woko.”

²⁹ Ento Moses owaco bote ni, “In nyeko omaki pira ce? Kono jo pa Rwot ducu gubedo lunebi, kono ber mada, wek Rwot oony cwiny mere i komgi!”

³⁰ Ci Moses ki ludoŋo pa jo Icrael gudok i gony.

Rwot ocwalo aluru

³¹ Ka Rwot omiyo yamo okodo, ci okelo lwak aluru nia ki i nam, ci gupoto piny i ŋet gony. Lacce romo wot me nino acel ki tuŋcel, dok ki tuŋ mukene bene lacce romo wot me nino acel ma orumo gony ducu, opoŋo piny ma romo futi adek kulu.

³² Dano gutwarre ka cokogi i nino meno dyeceŋ ki dyewor benebene, ki orwone bene. Jo ma gucoko manok keken gucoko muromo guniya pyeradek; ci gucako moyone murumo gony.

³³ I kare ma riŋone pud omoko i kin lakgi, ma peya gucamo otum, kiniga omako Rwot i kom dano, ci opwodo lwak ki two gemo mapek.

³⁴ Mumiyo nyiŋ kabedo meno gulwoŋo ni, Kibrot-atava, pien jo ma kecgi dwoŋ giyikogi kunnu.

³⁵ Nia ki i Kibrotatava lwak gutiŋo wot me cito Kajerot, ci gutiro gubedo kunnu.