Buk me Aŋwen pa Moses ma Gilwoŋo Wel 10 - Acoli Baibul

Tum me ryal

¹ Rwot owaco bot Moses ni,

² “Yub tum aryo me ryal ma ibitetogi ki nyol, ci ibitic kwedgi me lwoŋo lwak ki pi cako wot.

³ Ka gikuto tum aryo ducu, ci lwak ducu gibicokke kacel boti i doggola kema me rwatte,

⁴ Ento ka gikuto tum acel keken, ci lutel wic, ma gin ludito ma i kaka ducu pa jo Icrael, gibicokke kacel boti.

⁵ Ka wukuto okok maloŋo kicel, ci gony ma yo tun wokceŋ gibicako wot.

⁶ Ka wukuto okok maloŋo tyen me aryone, ci gony ducu ma yo tun acuc gibicako wot. Gibikuto tum kok maloŋo me cako wot anyim.

⁷ Ento ka wumito coko lwak kacel wubikuto, ento pe wukut okok maloŋo,

⁸ Awobe pa Aron, ma gin aye ajwagi, gibikuto tumo Cik me kuto tum bibedo botwu cik matwal nio wa i kare pa likwayowu ducu.

⁹ Ka wucito i mony ka lweny ki lukworwu ma gidiyowu i lobowu, ci wubimiyo oduru mony kok kun wukuto tum, wek Rwot Lubaŋawu opo piwu ci olarwu ki bot lukworwu.

¹⁰ I nino ma cwinywu yom iye bene, ki i nino madito ma gicikowu pigi, ki i kare me por dwe ducu, wubikuto iye tum i wi gitum awaŋa mewu, ki i wi gitum mewu me gityer lakwecwiny; gibikutogi wek Lubaŋa opo piwu; an a Rwot Lubaŋawu.”

Jo Icrael gua woko ki i Cinai

¹¹ I mwaka me aryone, i dwe me aryone, i kom nino dwe pyeraryo, pol ocako warre woko ki i wi kema lok me caden,

¹² omiyo jo Icrael gucako wot, gua woko ki i tim Cinai kun giwoto, gikobo; ci pol ocito ocuŋ wa i tim Paran.

¹³ Gudak tyen man mukwoŋo kit ma Rwot yam ociko ki Moses.

¹⁴ Bendera me gony pa jo pa Juda aye gutelo yo ki buca monygi ducu; lawimonygi aye Nakucon wod pa Aminadab.

¹⁵ Lawimony me kaka pa Icakar obedo Natanel wod pa Juar,

¹⁶ ki lawimony me kaka pa Jabulon obedo Eliab wod pa Kelon.

¹⁷ Ka kema pa Rwot doŋ giputo, ci likwayo pa Gercon ki likwayo pa Merari ma gitiŋo kema, gucako wotgi.

¹⁸ Ki bendera me gony pa jo pa Reuben ocako wot ki buca monygi ducu; lawimonygi obedo Elijur wod pa Cedeur

¹⁹ Lawimony me kaka pa Cimeon obedo Celumiel wod pa Juricadai.

²⁰ Lawimony me kaka pa Gad obedo Eliacap wod pa Deuel.

²¹ Dok jo pa Kokat gucako wot, kun gitiŋo jami maleŋ ducu; kema onoŋo doŋ giguro ocuŋ ma peya guo.

²² Ka dok bendera me gony pa jo pa Epraim ocako wot ki buca monygi ducu; lawimonygi obedo Elicama wod pa Amikud.

²³ Lawimony me kaka pa Manace obedo Gamaliel wod pa Pedajur.

²⁴ Lawimony me kaka pa Benjamin obedo Abidan wod pa Gideoni.

²⁵ Lacen bendera me gony pa jo pa Dan ocako wot ki buca monygi ducu, kun gicoko ŋe gony ducu; lawimony megi obedo Akiejer wod pa Amicadai,

²⁶ Lawimony me kaka pa Acer obedo Pagiel wod pa Okoran,

²⁷ Lawimony me kaka pa Naputali obedo Akira wod pa Enan.

²⁸ Man aye onoŋo kit wot pa jo Icrael, ma lubo buca monygi, i kare ma gimol me cako wot.

²⁹ Moses owaco bot Kobab wod pa Reuel ma Lamidian, won dakone, ni, “Wan wacako wot wadak i kabedo ma Rwot cen owaco pire ni ebimiyowa-ni. Ber iwot kwedwa, ci wabitimi maber.”

³⁰ Ento Kobab owacce ni, “An pe abicito; abidok i lobo tuwa ki bot lutuwa.”

³¹ Moses ogamo ni, “Alegi, pe iwekwa, pien in iŋeyo ni wabigony i tim, ci ibibedo botwa ma ka wanwa.

³² Dok ka ibiwoto kwedwa, gin maber ducu ma Rwot bitimo i komwa, wan bene wabitimi kit meno.”

³³ Gucako a woko ki i nyim got pa Rwot, ci gutiŋo wot me nino adek; ci canduk me gicikke pa Rwot owoto otelo yo nyimgi wot me nino adek pi yenyo kabedo me yweyogi,

³⁴ kun pol pa Rwot woto lamalo ka wigi ki i dyeceŋ, i kare ducu ma gicako wot nia ki i gonygi.

³⁵ Kare ducu ka canduk cako wot, ci Moses waco ni, “Doŋ ia malo, ai Rwot imi lumerok meri guket woko ata; wek jo ma dagi gurin woko ki i nyimi.”

³⁶ Ka doŋ ocun ka yweyo, ci en dok waco ni, “Doŋ idwog cen, ai Rwot, bot lwak doggola mapol mada ma i Icrael.”