Buk me Aŋwen pa Moses ma Gilwoŋo Wel 1 - Acoli Baibul

K wano wel jo Icrael i tim Cinai

¹ Rwot oloko ki Moses i tim Cinai; i kema me rwatte, i kom nino dwe mukwoŋo me dwe me aryo, i mwaka me aryone nia i kare ma doŋ gua woko ki i lobo Ejipt. Owacci,

² “Kwan wel lwakjo Icrael ducu, kun ilubo doggolagi ki dog odi pa kwarogi kit ma Wel nyiŋgi tye kwede, kun ikwano co ducu ki acel acel,

³ cakke ki i kom jo ma ditogi romo mwaka pyeraryo dok kwede malo, jo Icrael ducu ma romo cito ka lweny; wubikwanogi wun ki Aron ki bucagi.

⁴ Dok wubibedo ki dano acel ma oa ki i kaka acel acel, ma ŋat acel acel bibedo ladit wi kaka ki i ot pa kwarogi,

⁵ Man gin aye nyiŋ jo ma gibicuŋ ka konyowu: Jo pa Reuben, Elijur wod pa Cedeur;

⁶ jo pa Cimeon, Celumiel wod pa Juricadai;

⁷ jo pa Juda, Nakucon wod pa Aminadab;

⁸ jo pa Icakar, Netanel wod pa Juar;

⁹ jo pa Jabulon, Eliab wod pa Kelon;

¹⁰ i awobe pa Yucepu, jo pa Epraim, Elicama wod pa Amikud, jo pa Manace, Gamaliel wod pa Pedajur;

¹¹ jo pa Benjamin, Abidan wod pa Gideoni;

¹² jo pa Dan, Akiejer wod pa Amicadai;

¹³ jo pa Acer, Pagiel wod pa Okoran;

¹⁴ jo pa Gad, Eliacap wod pa Deuel;

¹⁵ jo pa Naputali, Akira wod pa Enan,”

¹⁶ Man gin aye dano ma giyero ki i lwak, ma gin aye lutel wi kaka pa kwarogi, gin ludito ma i kaka pa jo Icrael.

¹⁷ Moses ki Aron gukwanyo jo meno ma doŋ gikwano nyiŋgi-ni,

¹⁸ ci i kom nino mukwoŋo me dwe me aryo gucoko lwak ducu kacel. Gin gunyuto watgi kun gilubo doggolagi ki dog odi pa kwarogi, kit ma wel nyiŋgi tye kwede, cakke ki i kom jo ma ditogi romo mwaka pyeraryo dok kwede malo, ki acel acel,

¹⁹ macalo Rwot ociko ki Moses. En okwanogi i tim Cinai kit meno, Welgi ene:

²⁰ Jo pa Reuben, latin kayo pa Icrael. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

²¹ wel jo ma i kaka pa Reuben oromo alip pyeraŋwen wiye abicel, ki miya abic.

²² Jo pa Cimeon. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

²³ wel-jo ma i kaka pa Cimeon oromo alip pyerabic wiye aboŋwen, ki miya adek.

²⁴ Jo pa Gad. Ka gikwano wel likwayo ne kun gicoyo nyiŋgi ki acel acel ma lubo doggolagi ki dog odi pa kwarogi co ducu cakke ki i kom jo ma mwaki me ditogi romo pyeraryo dok kwede malo, jo ducu ma giromo cito ka lweny,

²⁵ wel jo ma i kaka pa Gad oromo alip pyeraŋwen wiye abic, ki miya abicel ki pyerabic.

²⁶ Jo pa Juda. Ka gikwano wel likwayo ne kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

²⁷ wel jo ma i kaka pa Juda oromo alip pyerabiro wiye aŋwen, ki miya abicel.

²⁸ Jo pa Icakar. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

²⁹ Wel jo ma i kaka pa Icakar oromo alip pyerabic wiye aŋwen, ki miya aŋwen.

³⁰ Jo pa Jabulon. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

³¹ wel jo ma i kaka pa Jabulon oromo alip pyerabic wiye abiro, ki miya aŋwen.

³² Jo pa Yucepu, jo pa Epraim. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

³³ wel jo ma i kaka pa Epraim oromo alip pyeraŋwen, ki miya aŋwen.

³⁴ Jo pa Manace. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

³⁵ wel jo ma i kaka pa Manace oromo alip pyeradek wiye aryo, ki miya aryo.

³⁶ Jo pa Benjamin. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki I kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

³⁷ wel jo ma i kaka pa Benjamin oromo alip pyeradek wiye abic, ki miya aŋwen.

³⁸ Jo pa Dan. Ka gikwano wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

³⁹ wel jo ma i kaka pa Dan oromo alip pyerabicel wiye aryo, ki miya abiro.

⁴⁰ Jo pa Acer. Ka gikwano Wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

⁴¹ wel jo ma i kaka pa Acer oromo alip pyeraŋwen wiye acel, ki miya abic.

⁴² Jo pa Naputali. Ka gikwano Wel likwayone kun gicoyo nyiŋgi ki acel acel ma lubo doggolagi ki dog odi pa kwarogi, co ducu cakke ki i kom jo ma mwaka me ditogi romo pyeraryo dok kwede malo, jo ducu ma giromo cito ka lweny,

⁴³ Wel jo ma i kaka pa Naputali oromo alip pyerabic wiye adek, ki miya aŋwen.

⁴⁴ Meno gin aye jo ma gikwano welgi, ma yam Moses ki Aron gukwano, kun lutel wi Icrael gukonyogi, jo apar wiye aryo, ma ŋat acel acel ocuŋ pi ot pa kwarogi,

⁴⁵ Kit meno wel jo Icrael ducu ma gikwano kun gilubo odi pa kwarogi, nia ki i kom jo ma ditogi romo mwaka pyeraryo dok kwede malo, jo Icrael ducu ma romo cito ka lweny,

⁴⁶ welgi ducu onoŋo oromo alip miya abicel ki adek, ki miya abic ki pyerabic noŋo.

Giketo jo pa Levi ka loyo kema pa Lubaŋa

⁴⁷ Ento jo pa Levi pe gikwano welgi kacel kwedgi kun gilubo kaka pa kwarogi,

⁴⁸ pien onoŋo Rwot owaco ki Moses ni,

⁴⁹ “Wel kaka pa Levi aye pe ikwan, pe ibikwano welgi i kin jo Icrael;

⁵⁰ ento ket jo pa Levi gubed ludito ma loyo tic i kema lok me caden, gulo jamine ducu, wa gin ducu ma tye iye. Gin aye bitiŋo kema ki jami ma tye iye ducu, gibitic iye, dok gibiguro kema me butogi rumo kema pa Lubaŋa,

⁵¹ Ka kema bicako wot, ci gin Lulevi aye gibiputo woko; dok ka gibiguro kema, Lulevi aye gibigurone. Ka ce dano mo ata onyiko cok ki kema, gibineko woko.

⁵² Jo Icrael gibiguro kemagi ki dog buca monygi, dano acel acel ki dog gonygi, ki dano acel acel i te benderane.

⁵³ Ento jo pa Levi gibiguro kemagi rumo kema lok me caden, wek akemo pe opot i kom lwak jo Icrael; jo pa Levi gibigwoko kema lok me caden.”

⁵⁴ Jo Icrael gutimo kit meno gutiyo gin ducu kit ma onoŋo Rwot ociko ki Moses.