Nekemia 6 - Acoli Baibul

Piro lok i kom Nekemia

¹ Ka Canbalat, Tobia, Gecem, kacel ki jo ducu ma gin lukworwa guwinyo ni atyeko gero cel woko, dok ni ka mo ma omuk ma twolone doŋ pe, i kare meno onoŋo pud peya aketo rii me doggola me loro dog gaŋ ducu,

² ci Canbalat ki Gecem gucwalo lok bota, kun giwacci, “Bin wek wabed kacel i gaŋ mo ma i bar me Ono.” Ento gin onoŋo gimito timma marac.

³ An acwalo kwena botgi kun awaccigi ni, “An atye ka tiyo tic mo ma pire dit mada, pe atwero bino kunnu ka rwatte kwedwu. Pe atwero weko tic man Ccuŋ pi bino me nenowu keken.”

⁴ Gubedo ka cwalo kwena bota ma rom kit meno tyen aŋwen kulu, an bene adwoko botgi lagam lakite acel.

⁵ Dok Canbalat ocwalo laticce bota ki waraga i ciŋe ma pe gimwono doge lakite acel-lu pi tyen me abicce.

⁶ Lok ma gicoyo iye tye kit man ni, “Gecem otitta ni cwinyo lok tye ka wot i kin lwak ma gicok kwedwa ni meno, in kacel ki lwak pa Lujudaya wumito jemo; meno aye gin mumiyo wutye ka gero cel odoco-ni, Lok man tito bene ni in ikette keni me bedo kabakagi.

⁷ Dok bene lok man otittiwa ni in doŋ ityeko keto lunebi me tuco lok atyer i Jerucalem i komi ni, ‘Kabaka doŋ tye i Juda.’ Lok meno doŋ gibitito bot kabaka, Pienno ber ibin warib tam wayub lokke kacel kwedi.”

⁸ An dok adwoko lok bote, kun awacce ni, “Pe tye gin mo macalo meno ma otimme, lok meno wun wunwaro ki wiwu.”

⁹ Onoŋogutemme me burowa wek wagik tic, kun gitamo ni, “Komgi bidoko nyap i tic, ci bimiyo tic doŋ pe bitine.” Ento kombeddi, ai Lubaŋa, doŋ imiya abed matek.

¹⁰ Ka acito wa i ot pa Cemaya wod pa Delaya, ma wod pa Meketabel, ma pe twero weko ode, ci cut an acito ka Lime. En owacca ni, “Wek wacit kwedi kacel i kabedo maleŋ ma i ot pa Lubaŋa, ci walor doggola me ot pa Lubaŋa woko; pien gin bibino ka neki woko. I dyewor mo keken gibibino gineki woko.”

¹¹ Ento an agamo doge ni, “An pe acal ki dano ma riŋo lawote ci kanne woko. In itamo ni abitemo laro kwana ki kanne i ot pa Lubaŋa? Pe atwero cito.”

¹² Ka abedo ka tamo lok man, lacen, ci aniaŋ atir ni Lubaŋa onoŋo pe oloko kwede, ento onoŋo Tobia ki Canbalat aye kara guwile ki lim wek otit lok macalo meno me bito an.

¹³ Guwile ki lim wek obur an abed ki lworo apot i bal, wek gicak balo nyiŋa kun gicaya kwede-gu.

¹⁴ Ai Lubaŋana, po i kom Tobia ki Canbalat, pi gin ma gubedo ka timone i koma, ci iket can i komgi. Dok ipo i kom lanebi ma dako ma nyiŋe Noadia kacel ki lwak lunebi mukene ducu ma yam gutemo buro an ki miya lworo.

Agikki me tic

¹⁵ I ŋe tic pi nino pyerabic wiye aryo tic me gero cel otum woko, i nino dwe pyeraryo wiye abic me dwe me Elul.”

¹⁶ I kare ma lumerokwa ma gibedo i rok murumowa guwinyo lok man, ci lworo omakogi ma komgi oto woko lirut; pien dano acel acel onoŋo oneyo atir ni tic man otine pi kony pa Lubaŋa,

¹⁷ Ento i kare-nu ducu ludito pa Lujudaya gubedo ka coyo waraga mapol gucwalo bot Tobia, ki Tobia bene coyo waraga cwalo botgi.

¹⁸ Lwak mapol ma i Juda onoŋo gitye tuŋ bote ma gucikke bote ki kwoŋo kwoŋ, dok en onoŋo obedo oro Cekania ma wod pa Ara. Dok wode Yekokanan bene onoŋo yam onyomo nya pa Meculam wod pa Berekia.

¹⁹ Jo mogo bene guloko i nyima lok kom tic maber ma Tobia yam otiyo, ka gidwoko bote lok ducu ma an awaco botgi, Tobia yam omedde ki cwalo waraga bota pi miyo lworo bota.