Nekemia 4 - Acoli Baibul

Lurok gutemo balo tic pa Nekemia

¹ I kare-nu ka Canbalat owinyo ni wan Lujudaya watye ka gero cel me Jerucalem odoco, ci kiniga ki akemo madwoŋ omake, ocako cayowa.

² Ki kinigane-ni en ocako nywarowa ki i nyim luwote ki i nyim mony me Camaria kun waco ni, “Man Lujudaya ma gigoro-ni gitye ka tiyo aŋo kaa? Gitamo ni gitwero gero gaŋ man odoco? Gibityero gitum mo? Gitwero tyeko tic man i nino acel keken? Gitwero payo godi me gedo ducu ki i kom godi ma gudurre i wi odur yugi ma giwaŋo-ni?”

³ Tobia ma Laammon onoŋo ocun ka ŋete, owacci, “Kit cel aŋo ma gin twero gerone? Kadi too mamwa-ni ka owoto ki i wiye, ci muko cel gotgi-ni reto woko piny!”

⁴ Ai Lubaŋawa, winy ka gicayowa ba; lok cac ma gicayo ki wan odok i wigi, imi giyak jamigi woko ducu dok gimakgi gitergi i opii i lobo pa lurok.

⁵ Pe iwek bal megi, dok wii pe myero owil i kom balgi, pien guyetowa wan ma watye ka gedo-ni.

⁶ Kit meno wan wamedde ki gero cel; ci watyeko gero cel woko oyotoyot oo wa malo i nucu me borre ma yam con ca, Man otimme pien lwak onoŋo gitye ki cwiny me tic kikome.

⁷ Ento i kare ma Canbalat ki Tobia ki jo Arab, jo Ammon ki jo Acidod guwinyo ni watye ka wot anyim ki tic me yubo cel me Jerucalem ki dok ni wacako culo ka ma twolone woko ducu, ci kiniga omakogi matek.

⁸ Ci gucokke kacel ka piro lok me cito ka lweny i kom Jerucalem, ki kelo anyobanyoba bot dano ma gitye kunnu.

⁹ Ento wan wamedde ki lego Lubaŋawa, dok waketo co me kuro piny me gwokowa dyeceŋ ki dyewor ki i komgi.

¹⁰ Ento jo Juda gubedo ka wacci, “Kero kom luywek godi doŋ otum woko; dok yugi bene odurre iye lipim; pe doŋ watwero gero cel.”

¹¹ Lukworwa gutamo ni wan pe wabitwero nenogi dok pe wabitwero ŋeyo gin ma tye ka timme, nio ka gibio wa botwa kany, ci ginekowa dok gigiko ticwa woko,

¹² Lujudaya ma gibedo i kin lumerokwa gubedo ka bino botwa kare ki kare kun gitito botwa tyen ma romo apar kulu yub ma lumerokwa gitye kwede i komwa; kun gibino ma gia ki i kabedo ducu ka ma gibedo iye.

¹³ Oyotoyot acako poko jami lweny magi bot lwak, pala lucwan, toŋi ki atum, ci aketogi gubedo i kabedo mo ma i ŋe cel kun lubo doggolagi, ka ma pud odoŋ twolo,

¹⁴ Aneno gin ma tye ka timme, ci aa malo awaco bot ludito ma gin lutel wic, ki ludito ma giloyo lwak, ki bot lwak ducu ni, “Pe wubed ki lworo mo i kom lukworwa. Wupo ni Rwot dit dok gilworo; pienno wun wulweny matek pi jo me lobowu, pi litinowu, pi monwu, ki pi pacowu.”

¹⁵ Ka lumerokwa guwinyo ni lok me yubgi otyeko winnye botwa ci guniaŋ ni Lubaŋa oturo yubgi woko, ci wan ducu wacako dok cen ka tic i kom cel, dano acel acel odok i dog ticce.

¹⁶ Cakke i kare meno nucu pa lwakka gubedo ka’ gedo, ki nucugi mukene gumako toni, kwodi, ki atum-gu, ka guruko koti me nyonyo pi lweny, kun ludoŋo pa lwak gucwako jo me ot pa Juda ducu,

¹⁷ ma onoŋo gitye ka gero cel odoco. Jo ma gin lutin yec bene gabedo ka tic kit man, dano acel acel tiŋo jami ma mitte pi gedo ki cine acel, ki jami lwennye noŋo omako i cine tuŋ cel.

¹⁸ Ka dok dano acel acel i kinjo ma gin lugedo bedo ki pala lucwanne ma otweyo woko i pyere kun noŋo tye kwede ka gedo. Dano ma en lakut tum onoŋo bedo mere cok ka ŋeta.

¹⁹ Atito ki rwodi kacel ki ludito ma giloyb lwak i dog tic ni, “Tic doŋ onya odoko dwoŋ twatwal, omiyo kinwa odon malac ki kinwa opokke woko ki i kom cel, kin dano odoko bor ki lawote.

²⁰ I kabedo ma wuwinyo tum okok iye, myero wucokke botwa kunnu. Lubaŋawa bilweny piwa.”

²¹ Kit meno nino ducu cakke okogweno nio i dyewor ka lakalatwe otuc wabedo ka tic i kom cel, ma noŋo nucu pa lwakwa mukene gucuŋ ki toŋi i ciŋgi gikuro piny.

²² An dok awaco ki lwak i kare-nu ni, “Wek dano acel acel ki laticce gudoŋ gubut i Jerucalem, ci gubed ka kuro piny piwa i dyewor ka dok guti tic i dyeceŋ.”

²³ Pe tye dano mo i kinwa, kadi an kikoma nyo utmegina nyo lukur-piny ma gulubo kora ma olunyo boŋŋine. Dano acel acel obedo ki jami lwennye i ciŋe.