Nakum 3 - Acoli Baibul

¹ Can bipoto i kom gaŋ ma oyo remo pa dano, en gaŋ ma opoŋ ki goba ki jami magiyako, tim me yak pegik ki iye!

² Koŋ wuwiny kit ma del anino cot kwede, ki mor pa lawala, kit ma aguragura pye kwede, kacel ki mor gadigadi ma giriŋo.

³ Koŋ inen kit ma wegi aguragura gitye ka ŋwec kwede, ma noŋo pala lucwangi meny amenya lipilpil, ki tonigi bene ryeny aryenya! Lwak dano ma guneko, komgi odurre lipim; dano tye ka to medde ameda, dano woto ma giyokke ayoka ki kom jo muto!

⁴ Man ducu tye ka timme pi bit waŋ pa dako ma lakwele-ni, en yomo cwiny co ki timme me yatyat, en aye ma kelo can i kom rok mapol pi timme me kwele kwele, rwenyo jo mapol ki timme me yatyat.

⁵ Rwot me mony owaco ni, Nen, an doŋ abipwodo in gaŋ Nineve, abiwalo boŋo woko ki i pyeri aumo ki wii; abimiyo lurok gineni ka doŋ it ye munero, lewic bimaki pien ker ducu bineni.

⁶ Abinywano komi ki gin me kwer, dok abitimo tim me cac i komi; abimiyo dano giciko waŋgi i komi.

⁷ Jo ducu ma bineni gibijer woko ki boti kun giwaco ni, Nineve odoŋ obur; aŋa ma bikumo pire? En binoŋo jo ma kweyo cwinye kwene?

⁸ In mono iber ikato gaŋ Tebec ma yam tye i ŋet kulu Nail, ma pii orumo woko dyere, kun gwoke macalo cel mere?

⁹ Tek mere yam ocun i kom Etiopia, ki i kom Ejipt ma tekogi onoŋo pe gik; Put ki Libya bene yam gubedo ka konye,

¹⁰ Kadi bed kumeno, jo Tebec yam giterogi woko, giterogi woko i opii; Litinone ducu ginyotogi woko i agikki yo ducu; dok gibolo kwir pi luditogi ma giworo, jo madito ducu gitweyogi woko ki nyor,

¹¹ In ibimer, dok ibibaŋŋe woko; ibiyenyo ka larre ki i ciŋ lukworri.

¹² Cel gogoni ducu bibedo macalo yat oduro ma nyige pud cek aceka, ka giyeno yatte ci nyige poto piny i dog jo ma camo.

¹³ Nen, lulwennyi girom ki mon mamwa. Dogcel me lo boni giyabo malac i nyim lukworri, mac doŋ owaŋo rii me dogcelli woko.

¹⁴ Twom pii, iyub celli obed matek, lukworri gibibino girumi woko; pye i bur lobo inyon lobo, mak bao igo matafali!

¹⁵ Mac biwaŋi woko ki kunnu, pala lucwan bene bitoŋi woko, macalo bonyo tyeko kwede cam. Wunya wumedde giwu calo bonyo, wunya wumedde calo ocene!

¹⁶ Imedo lucat-willi doŋ gudoko mapol ma gikato lakalatwe ma i polo. Bonyo-yaro bwome, tuk cito woko.

¹⁷ Rwodini gipol macalo ocene, karani meri gidwoŋ calo lwak bonyo ma gicorre i wi cel i kare ma koyo ŋic. Ka cen doŋ otuc, ci gituk gicito woko; ŋat mo ma ŋeyo ka ma gitye iye pe.

¹⁸ In kabaka me Aciria, lukwatti gunino woko; luditoni me awora guywe woko matwal. Lwakki guket woko ata i wi godi ŋat mo ma romo cokogi kacel pe.

¹⁹ Ret ma giketo i komi pe twero caŋ, waŋ burre odet marac twatwal. Jo ducu ma giwinyo lok man i komi gidoŋo ciŋgi piri ki yomcwiny. Rac ma itimo dikdik-ki peya opoto i kom aŋa?