Nakum 1 - Acoli Baibul

Kiniga omako Rwot i kom Nineve

¹ Man lok ma pire tek ma gicoyo ma okemo Nineve; ma Lubaŋa onyuto bot Nakum, ma en dano me Elkoc.

² Rwot en Lubaŋa ma lanyeko dok lacullakwor, Rwot culo kwor kun tye ki akemo madwoŋ; Rwot culo kwor i kom lukworre dok kano akemone pi jo ma gin lumonene.

³ Rwot kiniga pe mako oyot, en tye ki tek madwoŋ twatwal, dok pe kwanyo kop i kom lubalo. Yo me wotte tye i yamo lapiru ki i yamo kot, pol obedo apwa me tyene.

⁴ En juko nam, ci piine two woko, en miyo pii ma i kulu ducu dwoŋ woko. Olet ma i Bacan two woko, got Karmel ner bokke woko, ature me Lebanon bene ner woko.

⁵ Godi ducu giyeŋŋe ka Rwot onen, cere-gu leny i nyime; piny doŋ noŋo matar ligwek, lobo ki jo ducu ma gibedo iye komgi myel.

⁶ Ka ce akemo omako Rwot, aŋa twero cuŋ i nyime? Aŋa ma twero ciro kinigane malyetti? En onyo akemone calo mac, dok ‘muko gweŋ, ŋido woko matitino.

⁷ Rwot gire ber, en aye ka kanne i kare me caŋ; dok en ŋeyo jo ma riŋo laro bote.

⁸ Ento en bijwero lukworre doki ki lalele me pii ma mol ki teko madwoŋ twatwal; en biryemo lumonene naka wa i colpiny.

⁹ Wun jo Nineve wutye ka piro lok aŋo i kom Rwot? En bityekowu woko liweŋ; en biculo kwor kiryo i kom lukworre.

¹⁰ Gibiwaŋogi woko macalo okuto ma okadde, macalo reŋ kal mutwo.

¹¹ Dano mo nene oa ki i kinwu, ma opiro lok marac i kom Rwot, dok omiyo tam marac bot jo mukene.

¹² Rwot owaco kuman ni, “Kadi bedjo Aciria gitekmagidwoŋ niŋo, gibityekogi woko dok nyiŋgi birwenyo woko matwal. Kadi bed yam aunowu, pe dok abiunowu aye.

¹³ Kombeddi abituro okol ma jo Aciria gurwako i ŋutwu abicodo nyor ma gutweyowu kwede bene.”

¹⁴ Man aye cik ma Rwot oketo pi jo Aciria: “Nyiŋwu pe dok biwinnye matwal. Abijwero cal jogi woko liweŋ ki i ot pa lubaŋawu, abikwinyo bur lyel me yikowu, pien konywu doŋ pe.” Lok kom turo gau me Nineve

¹⁵ Koŋ wunen, tyen ŋat ma kelo lok maber tye i wi godi en tuco lok me kuc. Wun jo Juda, wukwer nino madito, dok wucob kwoŋwu, pien jo maraco pe dok gibimedde lo bino i komwu, pien doŋ gijwerogi woko matwal.