Mika 4 - Acoli Baibul

Rwot biloyo lobo ducu ki kuc

¹ Man bitimme i kare ma pud tye anyim: got me ot pa Rwot bicuŋ macalo got mabor makato godi ducu, borre bikato cere ducu; rok ducu gibimol gicito iye,

² dok lwak lurok mapol gibibino, gibiwacci, “Wubin, waitui wi got pa Rwot, i ot pa Lubaŋa pa Yakobo; wek en opwonywa kit mere, ka wek walub yone.” Pien cik bia ki i Cion, lok pa Rwot bia ki i Jerucalem,

³ En biŋolo kop i kin rok mapol, dok biŋolo kop pa lwak rok matego ma gitye ka mabor; gibiteto pala lucwangi doko lak kweri dyaŋ, ki toŋigi doko pala me ŋolo jaŋ olok; rok mo pe bitiŋo pala lucwan i kom rok wadigi, pe doŋ gibimedde ki pwonyo lweny;

⁴ ento ŋat acel acel bibedo i te olokke ki i te odurone, pe tye ŋat mo ma bimiyo gibedo lwor; pien dog Rwot me mony doŋ otuco.

⁵ Pien rok ducu giwoto kun ŋat acel acel woto nyiŋ lubaŋane, ento wan wabiworo Rwot Lubaŋawa nakanaka. Koko jo Icrael ki i opii

⁶ Rwot owaco kuman ni, I nino maca abicoko luŋolo, dok abicoko jo ma giryemogi woko, ki jo ma an kikoma doŋ atyeko unogi.

⁷ Abimiyo luŋolo gidoko jo mubwot, ki jo ma yam giryemogi gucito woko ceŋ gibidoko rok matek; Rwot biloyogi i got Cion nia i kale man nio nino ma pe tumo

⁸ In lubele me dwol romi, dok in cere pa jo Cion, locci macon bidwogo i ciŋi, ma en aye ker pa jo Jerucalem.

⁹ Koni ikok matek piŋo? Pe tye kabaka mo liŋ? Lami-tammi doŋ oto woko, mumiyo immne ki arem calo dako ma rem ki nywal?

¹⁰ Wubed ki arem, kun wucur, wun jo Cion, macalo dako ma rem ki nywal; pien koni wubia woko ki i gaŋ wubibedo i tim ata; dok wubicito i Babilon. Rwot bilarowu ki kunnu, en bilarowu ki i ciŋ lukworwu.

¹¹ Koni rok mapol gucokke ka lweny i komwu, kun giwacci, “Wek wabalgi woko wek wanen Cion.”

¹² Ento gin pe giŋeyo tam pa Rwot pe giniaŋ yubbe bene, ni en aye ocokogi macalo wit kal ma i laro moyo.

¹³ Wua malo wudin kal, wun jo Cion, macalo twon dyaŋ ma nyono wit kal me dinone, pien abimiyo tuŋwu doko nyonyo ki obon tyenwu bidoko mola; wubituro rok mapol i dul i dul, wubidyero limgi bot Rwot, doŋ bidoko lonyo pa Rwot me wi lobo ducu.