Mika 2 - Acoli Baibul

Can bipoto i kom jo ma gidiyo lucan

¹ Gibineno can, jo ma paro pi timo gin marac, ma giparo pi timo bal i wi kabutogi! Ka piny oru, ci gitimo, pien twerone tye i ciŋgi.

² Giparo potti, ci gigamo tektek; giparo odi-gu, ka dok gimayogi woko; gidiyo dano ki bura, gimayo ode, kadi wa lobo ma oleyo ki bot wonne.

³ Pi meno Rwot owaco kuman ni, Nen, aparo lok marac i kom ot man, ma pe dok wubiwoto ŋutwu ki iye; pe dok wubiwot kun wuŋatte ki wakke, pien kare meno bibedo kare marac.

⁴ I nino meno gibiwerowu ki wer aŋec, dok bene gibikoko koko me can, kun giwacci, “Giyakowa doŋ atika; lobo ma yam opoko botwa Rwot omiyo woko ki jo mukene; iuro aura kit ma en ogamo kwede ki botwa! En opoko pottiwa woko i kin jo ma guterowa i opii.”

⁵ Pi meno pe wubibedo ki ŋat mo i cokke pa Rwot, ma bibolo tol me poko nom me apura bot wu,

⁶ Gitito lok kun giwacci, “Pe wutit lok, at mo pe myero otit kit lok macalo magi; lewic pe bimakowa.”

⁷ Myero giwac man, wun jo me ot pa Yakobo? Rwot pe twero diyo cwinye? Magi ducu gin ticce? Lokka pe timo ber bot ŋat ma cwinye atir?

⁸ Ento wun wutwarre i kom jona macalo lukwor; wumayo kanyi-gu woko ki i kom jo ma gibedo mot, jo ma gikato ki i netwu ki gen, ma pe gitye ki tam mo me lweny.

⁹ Wuryemo mon pa jona woko ki i odigi ma yomo cwinygi-ni; wukwanyo deyona woko matwal ki i kom litinogi matino.

¹⁰ Wua, doŋ wuciti, pien man pe ka yweyo; pi gin ma keni ma balo dano, ma kelo bal marac twatwal.

¹¹ Ka ce dano mo woto atata, kun tye ki cwiny me goba, ma wacci, “Abitittiwu pi koŋo vino ki mat mogo makec,” en bibedo latit-lok bot jo man!

¹² Adada abicoko wun ducu, wun jo pa Yakobo, abicoko jo Icrael mudoŋ; abigurogi kacel macalo romi ma tye i dwolgi, macalo lwak romi ma gitye i olet, lwak jo ma giwo.

¹³ Ŋat ma yabo yo bitelo nyimgi; gibituro, ka gibikato woko ki i dogcel. Kabakagi bikato i nyimgi, kun noŋo Rwot telo wigi.