Mika 1 - Acoli Baibul

Koko pi Camaria ki Jerucalem

¹ Man lok pa Rwot ma ceŋ obino bot Mika Lamorecet ma en oneno okemo Camaria ki Jerucalem, i kare pa Yocam, Akaj, ki Kejekia, luker me Juda.

² Wuwiny, wun rok, wun ducu; cik iti in lobo, ki gin ducu ma tye iye, wek Rwot Lubaŋa obed caden ma nyuto bal i komwu, kun lokke winnye ki i ot mere maleŋ,

³ Pien nen, Rwot tye ka bino nia ki i kabedone, bibino piny, binyono wi cere mutiŋŋe i wi lobo.

⁴ Godi bileny i te tyene luŋ bibarre, macalo odok kic ma i ŋet mac, macalo pii ma corre cito i luŋ.

⁵ Man ducu bibino pi tim aranyi pa Yakobo ki pi bal me ot pa Icrael. Tim aranyi pa Yakobo en gin aŋo? Pe en aye Camaria? Ki bal me ot pa Juda en gin aŋo? Pe en aye Jerucalem?

⁶ Pi meno abiloko Camaria doko obur ma i dye tim, bidoko kabedo me pito olok; dok abicoro gweŋine piny i luŋ, ka doŋ abiyabo te gutine.

⁷ Cal apayane ducu gibiŋido woko matitino, mucarane bene ducu gibiwaŋo ki mac, ki cal jogine-gu ducu abibalo woko; pien ocokogi ki lim ma giculo ki malaya, gibidok ceŋ i mucara pa malaya.

⁸ Pi man abikumo, dok abikok; abiwot ki tyena noŋo, kun atye munero; abikok calo too, dok abikumo macalo udu.

⁹ Pien waŋ rette doŋ pe twero caŋ; otyeko bino i Juda, doŋ oo i dogcel pa jona, wa i Jerucalem.

¹⁰ Pe wutit pire i Gat, pe wukoki; wuŋenne piny i apwa i Bet-le-apra.

¹¹ Wucit anyim, wun jo Capir, kun wuwoto munero ma lewic omakowu marac; wun jo ma bedo i Jaanan pe wukat woko; koko ma winnye a ki i Bet-ejel nyuto ni ka-larrewu doŋ pe kunnu,

¹² Jo ma bedo i Marot gitye ka kuro gin maber ki par madwoŋ, pien gin marac ma oa ki bot Rwot doŋ oo wa i dogcel me Jerucalem,

¹³ Wutwe aguragura i kom gadigadi lweny madwir, wun jo Lakic; wun aye mukwoŋo kelo bal i kom jo Cion, tim aranyi pa jo Icrael ceŋ ginoŋo i komwu.

¹⁴ Pi meno wubimiyo mot me pokke bot Morecet-gat; odi me Akijib bidoko gin bwola bot luker me Icrael.

¹⁵ Dok abikelo i komwu dano ma bwoyowu, wun jo Mareca; deyo pa Icrael bicito i Adulam.

¹⁶ Wulyel yer wiwu woko, wek wiwu obed maleŋ, pi litino ma yomo cwinywu; wuwek wiwu otal woko macalo wi acut, pien litino gibiwekowu, gibiterogi woko i opii.