Malaki 3 - Acoli Baibul

¹ Lubaŋa owacci, “Nen, acwalo lakwenana ocito anyim ka yubo yo ma peya abino, doŋ Rwot ma wuyenyo-ni bibino oyotoyot i ot mere. Lakwena me gicikke ma cwinywu yom i kome, nen, en bibino, man lok ma Rwot me mony owaco.

² Ento na ma twero ciro nino me binone, dok aŋa ma twero cuŋ ka en binen? “Pien en tye macalo mac lali ryal, ki dok calo cabun pa lalwok boŋŋi;

³ en bibedo piny macalo ŋat ma liyo ryal wek obed maleŋ, bilonyo likwayo pa Levi, dok bilonyogi gidoko leŋ macalo dano ma liyo ryal ki jabu, nio waŋ ma gibityero gityer ma myero bot Rwot.

⁴ Lacenne gityer pa jo Juda ki gityer pa jo Jerucalem biyomo cwiny Rwot macalo i kare macon ki i mwaka mapol mukato aŋec.

⁵ “Abinyiko cok botwu pi ŋolo kop; abibedo caden ma kome mit i kom lutal, i kom lutim abor, i kom jo ma kwoŋo kwon goba, i kom jo ma buro lupakaca pi mucaragi, ki ma buro mon-to ki litino kic, i kom jo ma ryemo lubedo ma i kingi gicwalogi cen, kun pe gilwora, man lok ma Rwot me mony owaco.

Culo dul acel me apar

⁶ “Pien an a ‘Rwot, pe alokke; pi meno wun likwayo pa Yakobo peya gityekowu.

⁷ Nia i kare pa kwarowu wunak ki i cik mera, pe wugwokogi. Wudwog bota, an bene abidwogo botwu, man lok ma Rwot me mony owaco. Ento wuwacci, ‘Wabidwogo niŋniŋ?’

⁸ Dano twero yako Lubaŋa? Ento wun wuyaka. Dok wuwaco ni, ‘Wayaki niŋniŋ?’ I dul acel me apar ki gityer mewu.

⁹ Gicenowu ki cen, pien wun wa ki rok mewu ducu wutye ka yaka.

¹⁰ Wukel dul acel me apar i ot kano cam, wek cam obed tye i oda; dok wutema, ka pe abiyabo botwu waŋ dirica me polo, wek aony gum ma opoŋ madwoŋ i komwu,” man lok ma Rwot me mony owaco.

¹¹ “Abijuko bonyo, wek pe otyek cam ma ocek i pottiwu; nyig olokwu pe biballe, man lok ma Rwot me mony owaco.

¹² Miyo lurok ducu gibilwoŋowu ni jo ma komgi gum, pien wubibedo i lobo me yomcwiny,” man lok ma Rwot me mony owaco.

Apokapoka ma tye i kin jo ma kitgi atir ki jo maraco

¹³ “Wuloko lok marac i koma,” man lok ma Rwot me mony owaco. “Wun wuwaco ni, ‘Walok i komi nino?’

¹⁴ Wuwaco ni, ‘Woro Lubaŋa konnye pe. Dok cobo cikke nyo bedo i nyim Rwot me mony macalo jo ma kwero cola konyo gin aŋo?

¹⁵ Nia koni walwoŋo jo ma wakke ni lugumkom; lutim maraco gin aye limgi nya; pe meno keken, ka gitemo Lubaŋa, gibwot.’ ”

¹⁶ I kare meno jo ma gilworo Rwot guloko ki luwotgi; Rwot otero ite, ci owinyogi, Gicoyo buk me po i kom jo ma yam gilworo Rwot dok ma gitamo pire.

¹⁷ Ci Rwot owacci. “Gibibedo mera, mera kikome, i nino ma abitic iye, dok abitimogi kica macalo dano timo kwede kica ki wode ma tiyo bote.

¹⁸ Miyo doki wupoko kin jo ma kitgi atir ki jo maraco, kin ŋat ma tiyo bot Lubaŋa ki ŋat ma pe tiyo bote.