Malaki 1 - Acoli Baibul

Mar pa Rwot pi jo Icrael

¹ Man lok ma pire tek ma Rwot oloko bot jo Icrael ma Malaki otito.

² “Doŋ atyeko marowu,” man Rwot aye owaco. Ento wun wuwacci, “In ityeko marowa niŋniŋ?” Rwot ogamo ni, “Ecau pe omin Yakobo? Ento yam amaro Yakobo

³ akwero Ecau; abalo lobone ma obedo gotgot, dok amiyo lobo ma en oleyo bot too me tim.”

⁴ Ka jo Edom guwacci, “Giŋinyowa woko piny, ento wabigedo odoco i wi obur,” Rwot me mony odok iye ni, “Gwok nyo gibigero gaŋi, ento an abireto odigi ducu woko piny, nio waŋ ma gibilwoŋo ni, lobo pa lubalo, ki jone gibilwoŋo jo ma kiniga bimako Rwot i komgi nakanaka.”

⁵ Wubineno man ki waŋwu, dok wubiwaco ni, “Rwot dit, wa i ŋe apokki waŋ lobo me Icrael.”

Rwot ojuko ajwagi

⁶ “Latin woro wonne, ki opii woro laditte. Ka an a wonwu, piŋo pe wuwora? Ka an ladit, ci piŋo pe wulwora? Man: lok ma Rwot me mony aye oloko botwu, wun ajwagi, ma wucayo nyiŋa. Wuwaco ni, ‘Wacayo nyiŋi niŋniŋ?’

⁷ Pi tyero cam me kwer i wi keno tyerra, Dok wuwaco ni, ‘Watimo tim me kwer iye niŋniŋ?’ Kun wutamo ni meja pa Rwot myero obed gin acaya.

⁸ Ka wutyero lee ma waŋgi oto me gitum, meno pe bal? Dok wutyero gin ma oŋol nyo ma two, meno pe bal? Ka wumiyo meno bot laloc mewu, cwinye bibedo yom i komwu? Dok bitimowu ber? Man lok ma Rwot me mony aye oloko.

⁹ Doŋ kombeddi wukwa kica pa Lubaŋa, wek otimwa ber. Ki ka wukelo mot macalo meno bote, en binyuto ber mere bot ŋat mo i kinwu? Man lok ma Rwot me mony owaco.

¹⁰ Kono onoŋo tye ŋat mo i kinwu ma bieego doggola, wek pe wumok mac i keno tyer mera nononono! Cwinya pe yom i komwu, dok pe abigamo gityer ki i ciŋwu. Man lok ma Rwot me mony owaco.

¹¹ Pienno wuŋe ni cakke tuŋ wokceŋ nio tuŋ potoceŋ nyiŋa dit i kin lurok, dok i kabe do acel acel giwaŋo iye gin ma ŋwece kur, pi nyiŋa, ki gityer maber ma myero; pien nyiŋa dit i kin lurok, man lok ma Rwot me mony owaco.

¹² Ento wun wupyedo nyiŋa, ka wuwaco ni, meja pa Rwot odoko gin me kwer, dok kadi wa cam ma wutyero iye wucayo acaya.

¹³ Dok wun wuwaco ni, ‘Nen, gin man olo dano rom kwene!’ Dok bene wujwiya, man lok ma Rwot me mony owaco. Wukelo gin ma gimayo tektek, nyo ma oŋol, nyo gin ma two, wukelo macalo gityerwu, Abigamo gityer ma kit meno ki i ciŋwu? Man lok ma’ Rwot me mony owaco.

¹⁴ Ŋat ma laram myero gicen, ka tye ki nyok i kin romine, kun kwoŋo ni ebityero, ento tyero bot Rwot gin ma roc tye i kome; pien an kabaka madit, nyiŋa bene gilworo i kin lurok. Man lok ma Rwot me mony owaco.