Luŋolkop 9 - Acoli Baibul

Loc pa Abimelek

¹ I kare meno Abimelek wod pa Jerubaal ocito i Cekem bot jo pa neyone ci otito botgi, ki bot jo ma i doggola pa minne ducu ni,

² “Wuwac lok wek jo ma i gaŋ me Cekem ducu guwiny ni, ‘Mene maber ki botwu? Myero awobe pa Jerubaal ma giromo pyerabiro ducu gubed lulowu, nyo myero ŋat acel aye olowu?’ Ento wupo ni, an a cogowu, dok a riŋo komwu.”

³ Jo paneyone guloko lok meno ducu pire, kun gimiyo jo Cekem ducu guwinyo; ci cwinygi olokke ka lubo kor Abimelek, pien guwacci, “En aye ominwa.”

⁴ Gimiyo bote lim ryal pyerabiro ma gikwanyo ki i ot pa Baalberit. En aye Abimelek obedo ka culo kwede jo ma kitgi atata ma lubwami ma guribbe i kome.

⁵ Ocito i gaŋ pa wonne i Opra, oneko omegine awobe pa Jerubaal, jo pyerabiro, ki i kom pata got mo acel. Ento Yocam wode matidine aye odoŋ, pien onoŋo okanne woko.

⁶ Lacen jo Cekem ducu gubino gucokke kacel, kacel ki jo Bet-millo ducu, ci gucito guketo Abimelek me bedo kabaka i ŋet kworo ma i Cekem ma wir jok ocuŋ i ŋete-ni.

⁷ Ka gitito lokke bot Yocam, en ocito ocuŋ malo i wi got Gerijim, odaŋŋe matek kun waco botgi ni. “Koŋ wuwiny lokka, wun jo Cekem, wek Lubaŋa bene owiny dogwu.

⁸ I nino mo acel lwak yadi gucito ka wiro moo ker i kom kabakagi. Guwaco bot yat jeituni ni, ‘In aye ilowa.’

⁹ Ento yat jeituni ogamo doggi ni, ‘Abiweko moona mabup-pi ma gimiyo kwede deyo bot lubaŋa ki bot dano, acit alyerre i wi yadi bo?’

¹⁰ Yadi dok guwaco bot oduro ni, ‘In aye ibin ilowa.’

¹¹ Ento oduro ogamo doggi ni, ‘Abiweko nyiga mamit-ti ki mabeco-ni, acit alyerre i wi yadi bo?’

¹² Ka yadi guwaco bot olok ni, ‘In aye ibin ilowa.’

¹³ Ento olok ogamo doggi ni, ‘Abiweko kono vinona ma yomo cwiny lubaŋa ki dano-ni, acit alyerre i wi yadi bo’?

¹⁴ Ka dok yadi ducu guwaco bot abelwinyo ni, ‘In aye ibin ilowa.’

¹⁵ Ci abelwinyo owaco bot yadi ni, ‘Ka wutye ka wira ki moo me bedo kabakawu ki cwiny me ada, ci doŋ wubin, wunon ka-larre i te tipona; ento ka pe kumeno, ci wek mac oa ki bot abelwinyo owan yadi cedar me Lebanon woko.’

¹⁶ “Doŋ apenyowu ba. I kare ma wuketo Abimelek me bedo kabaka, yam wutiyo ki cwiny me ada, kun iwu leŋ? Yam wutimo Jerubaal maber mono, kacel ki jo me ode, ma rwatte ki ticce macon ca?

¹⁷ Pien ada, wora olwenyo piwu kun odyero kome, olarowu ki iciŋ jo Midian,

¹⁸ ci tin wutwarre ka lweny i kom ot pa wora, wuneko awobene woko ma giromo pyerabiro ki i kom, pata got acel-lu, dok wuketo Abimelek ma wod pa aŋecane me bedo kabaka ma loyo Cekem pi bedo watwu.

¹⁹ Pi meno, ka wutiyo ki Jerubaal ki jo me ode ki cwiny me ada tin kun iwu leŋ, ci wubed ki yomcwiny i kom Abimelek, en bene cwinye obed yom i komwu.

²⁰ Ento ka pe kumeno, wek mac obin oa ki bot jo Cekem ki Bet-millo, owan Abimelek woko.”

²¹ Ka Yocam oriŋo gire woko, olaro kome, ci ocito wa i Beer, pi lworo ominne Abimelek.

²² Abimelek oloyo jo Icrael pi mwaka adek.

²³ Lacen Lubaŋa ocwalo cwiny marac i kin Abimelek ki jo Cekem, ci jo Cekem gucako tim me robo dog i kom Abimelek.

²⁴ Kit meno tim bwami ma yam gitimo i kom awobe pa Jerubaal ma romo pyerabiro ca opoto i kom Abimelek ma omingi-ni ma yam onekogi, wek alii me remogi obed i kome ki i kom jo Cekem ma yam gumiye tekcwiny me neko omegine.

²⁵ Jo Cekem guketo dano gubuto ka kure i yo i wi godi. Jo-nu gubedo ka yako jo ducu ma guwokgukato ki i ŋetgi i yo kunnu; ci Abimelek owinyo Jokke.

²⁶ I kare meno Gaal wod pa Ebed odako kacel ki lutugi, gubino i Cekem, ci jo Cekem gugene,

²⁷ Gucito i poto, gupwono nyig olokgi, gunyono, gubiyo pige, guyubo nino madit, gudonyo kwede i ot pa lubaŋagi, gucamo, gumato kun giyeto Abimelek.

²⁸ Gaal wod pa Ebed owacci, “Abimelek kono aŋa? Wan jo Cekem wan ana-gi? Lok aŋo kono ma miyo waworo en? Wod pa Jerubaal ki Jebul laticce yam pe guworo jo pa Kamor ma won Cekem? Piŋo myero wabed ka woro en?

²⁹ Kono jo kany tye i te locca, kono akwanyo Abimelek woko. Kono awaco bot Abimelek ni, ‘Med monnyi ci ikatti woko!’ ”

³⁰ Ka Jebul ma lalo gaŋ meno owinyo lok pa Gaal wod pa Ebed, ci kiniga omake cut.

³¹ Ocwalo kwena bot Abimelek i Aruma kun waco bote ni, “Nen, Gaal wod pa Ebed ki lutugi gubino i Cekem, gitye ka rubo gaŋ woko pi lweny i komi.

³² Pi meno wua woko, in kacel ki jo ma tye boti, ibut ikurgi i poto.

³³ Odiko ka ceŋ pud tuc atuca-ni, a woko con, ipot i kom gaŋ, Ka en ki jo ma tye bote gubino ka lweny i komi, ci in doŋ itimgi ka komgi owee.”

³⁴ Abimelek ki jo ma gitye kwede ducu gua i dyewor, gucito gubuto pi lweny i kom Cekem kun noŋo opoko buca monnye i dul aŋwen,

³⁵ Gaal wod pa Ebed okato woko, ocuŋ ka ma gidonyo kwede i dog gaŋ; ci Abimelek ki dano ma gitye bote gua ki ka ma gubuto iye ka kurogi-ni.

³⁶ Ka Gaal oneno jo-nu, owaco bot Jebul ni, “Nen dano ca ma gibino gilor piny ki i wi godi!” Ento Jebul owaco ni, “In ibeneno meri tipo godi macalo dano-ni.”

³⁷ Gaal dok owacci, “Nen, dano gitye ka lor piny ki i dye lobo malo ca, kun buca acel bino a ki i yo tuŋ te Kworo Waŋ Ayweya ca.”

³⁸ Jebul dok owaco bote ni, “Dogi dok tye kwene tin, in ma yam iwacci, ‘Abimelek kono aŋa, wek wawore?’ Meno pe gin jo ma in icayogini? Koŋ ikat woko kombeddi, icilweny kwedgi.”

³⁹ Ci Gaal ocito kun telo wi, mony pa jo Cekem, ocako lweny i kom Abimelek.

⁴⁰ Abimelek ocako ryeme, ci oriŋo olaro kome. Jo mapol gupoto ma ret omakogi, o wa i dog gaŋ,

⁴¹ Abimelek odok obedo Aruma; ci Jebul oryemo Gaal ki lutugi woko, pe dok gubedo i Cekem.

⁴² Orwone dano dok gucito i potogi, ci gitito pire bot Abimelek.

⁴³ Ocito ki jone, opokogi i buca adek, ci gubuto gukuro yo poto. Oneno dano gibino gia ki i gaŋ, ci oa opoto i komgi, onekogi woko.

⁴⁴ Abimelek ki dul dano ma gitye bote gucorre anyim, gucuŋ i dog gaŋ ka ma gidonyo ki iye-ni, kun buca aryo mukene-ni gicorre i kom jo ducu ma grtye I poto, ginekogi woko.

⁴⁵ Abimelek olwenyo i kom gaŋ meno dyeceŋ benebene, omako woko, oneko jo ma gitye iye, omuko odi woko liweŋ, opworo kado i ŋom.

⁴⁶ Ka jo ducu ma gibedo Migdalcekem guwinyo lokke, ci gudonyo i kicika ma gigolo piny ma i ot pa jokgi El-berit.

⁴⁷ Ci gitito bot Abimelek ni, jo ducu me Migdal-cekem gucokke kacel.

⁴⁸ Abimelek ocito i wi got Jalmon, en kacel ki jo ducu ma gitye bote, ci Abimelek omako laton i cine, ocito otoŋo kwede riddo yen, otino i wi gwoke ci owaco bot jo ma gitye kwede ni, “Kit ma wuneno atimo-ni, wun bene wutim oyot kumene.”

⁴⁹ Kit meno dano acel acel otono riddo yen, olubo ki kor Abimelek, Guketo i wi kabedo matek ma gigolo piny-nyi, gucwinyo mac i kom jo-nu, mumiyo dano ducu ma gubedo i Migdal-cekem guto woko, ma mito romo ka alip acel, co wa ki mon.

⁵⁰ Abimelek dok ocito Tebej, oguro woko, omako.

⁵¹ Yam tye ot matek ma ocudo malo i dye gaŋ meno, ci lwak dano ma i gaŋ ducu guriŋo gularo iye, co ducu wa ki mon, ci gucego wigi woko iye, gucito malo wa i dan ot ma ocudo malo-ni.

⁵² Ento Abimelek ocito i ot ma ocudo malo-ni, ocako lweny i kome, ci onyiko cok ki doggolane wek eciwan woko ki mac.

⁵³ Ci dako mo obayo lakidi rego madit, ocelo wi Abimelek, otyero, obaro cogo wiye woko.

⁵⁴ Oyotoyot olwoŋo awobi ma tiŋo jami lwennye, owaco bote ni, “Wot pala lucwanni, ineka woko, wek dano pe guwacci, ‘Dako mamwa-ni aye oneke.’’’ Awobi-nu ocobo kome pil, oneke woko.

⁵⁵ Ka jo Icrael guneno ni Abimelek oto woko, ci guket, kun dano acel acel dok i gaŋŋe,

⁵⁶ Kit meno Lubaŋa oculo waŋ bal ma Abimelek otimo i kom wonne pi neko omegine pyerabiro.

⁵⁷ Dok Lubaŋa odwoko tim pa jo Cekem maracce ducu i wigi, omiyo lok pa Yocam wod pa Jerubaal ma ocenogi kwede ocobbe i komgi kakare.