Luŋolkop 7 - Acoli Baibul

Jo pa Gideon guloyo jo Midian

¹ Jerubaal, ma en aye Gideon, ki jo ducu ma onoŋo gitye bote gua malo odiko con, ci gugony i ŋet waŋ pii me Karod. Gony pa jo Midian onoŋo tye i nyimgi yo tuŋ acam, i ŋet got More ki i nota.

² Rwot owaco bot Gideon ni “Jo ma gitye kwedi-ni gipol mada ki tuŋ bota. Ka abimiyo jo Midian i ciŋgi gibiwakke ginwette i koma ni meno’ ‘Ciŋa kikoma gire aye olara.’

³ Pi meno kombeddi doŋ itit bot lwak ni, ‘Ŋatti mo ma lworo omako, ma kome myel ber odok i gaŋŋe.’ ” Kit meno Gideon oomo cwinygi, ci dano alip pyeraryo wiye aryo gudok woko, ki dano alip apar gudoŋ.

⁴ Rwot dok owaco bot Gideon ni “Lwak pud pol mada; tergi i dog pii ci abitemo cwinygi ki kunnu. Ŋat ma abiwacci, ni, ‘Dano man bicito kwedi’ en aye bicito kwedi; ki ŋat ma abiwacel ni, ‘Dano man pe bicito kwedi,’ en pe bicito kwedi.”

⁵ Kit meno Gideon otero dano i dog pii; ci Rwot owaco bote ni, “Dano acel acel ma gamo pii ki lebe macalo gwok gamo kwede ibiketo en cuŋ kene; ki ŋat ma orumo coŋe piny ka mato pii bene kit meno.”

⁶ Ci wei dano ma gugamo pii kun giketo ciŋgi i doggi oromo miya adek; ento lwak jo mudoŋ ducu gurumo coŋgi ka mato pii.

⁷ Rwot owaco bot Gideon ni, “An abilarowu ki jo miya adek ma gugamo pii ki i ciŋgi-ni, pi miyo jo Midian i ciŋwu. Doŋ iwek jo mukene-ni ŋat acel acel odok gire i pacone.”

⁸ Gideon ogamo abino pa lwak wo ko ki i ciŋgi wa ki tumgi; ci ocwalo jo Icrael mudoŋ, kun dano acel acel cito i kemane. En odoŋ ki jo miya adek-ki, kun gony pa jo Midian tye piny i nota,

⁹ I dyewor meno Rwot owaco bote ni, “A malo, icit ilweny i kom gony pa jo Midian, pien doŋ atyeko miyone i ciŋi,

¹⁰ Ento ka ilworo cito piny kunnu, ci icit i gonygi kacel ki laticci Pura.

¹¹ Ibiwinyo gin ma jo-nu giloko, ci lacen cwinyi bilimo tek me cito ka monyo gonygi.” Ocito piny ki laticce Pura, ci guo i agikki gony ka ma lumony gubuto iye.

¹² Jo Midian, jo Amalek ki jo ducu ma gua wokceŋ onoŋo guryeyo gonygi i nota ma gumoo calo lwak bonyo; ki kinagagi bene welgi pe kwanne, gipol macalo kweyo me dog namo

¹³ Ka Gideon oo, dano mo ocako tito lek mo bot lawote, kun waco ni, “Nen, aleko lek mo; mugati me cayiri ma oluŋŋe opoto i gony kun lor alora, obino kwede wa i kom kema, ci oreto kema woko piny, oloko ataro, kema opyelle woko piny,”

¹⁴ Lawote ogamo ni, “Man pala lucwan pa Gideon wod pa Yoaci, Laicrael; en ennu kikome. Lubaŋa otyeko miyo jo Midian ki lwak monygi ducu i ciŋe.”

¹⁵ Ka Gideon owinyo kit ma gitito kwede lek ki kit ma gigonyo kwede tere, ci omiyo woro bot Lubaŋa. Lacen odwogo kwede i gony pa jo Icrael, ci owacci, “Wua malo, pien Rwot doŋ omiyo mony pa jo Midian woko i ciŋwu.”

¹⁶ Opoko kin jo miya adek-ki lwak buca mony adek, ka omiyo tum i ciŋgi ducu, ki abino ma igi noŋo, ki mac raa i abino ducu.

¹⁷ Ka doŋ ocikogi ni, “Wunena, ci wun bene wutim kit ma an atimo ka doŋ ao iŋet gony cok.

¹⁸ Ka akuto tum, an kacel ki jo ma atye kwedgi ducu, ci wun bene wukut tum murumo gony ducu kun wudaŋŋe ni, ‘Pi Rwot ki pi Gideon!’ ”

¹⁹ Gideon ki jo miya acel ma gitye bote guo i ŋet gony cok ki cwiny dyewor ma onoŋo pud giketo Lukur-piny aketa; ci gucako kuto tum ki tyero abino ma tye i ciŋgi ducu.

²⁰ Buca mony adek ducu gukuto tumgi, gutyero abinogi woko ci gumako mac raa i ciŋgi malacam ki tum me akuta i ciŋgi malacuc, kun gidaŋŋe kwede ni, “Pala lucwan pi Rwot ki pi Gideon!”

²¹ Dano acel acel ocuŋ mot i kabedone ma gurumo gony ducu, ci mony pa jo Midian guriŋo woko ducu; gucako daŋŋe gurigo kwede woko.

²² Ka dano miya adek ca gitye ka kuto tumgi, Rwot oloko pala lucwan pa jo. Midian i kom lutugi kekengi ki i kom monygi ducu. Monygi oriŋo o wa i Bet-cita, ma yo tuŋ Jerera, ki o kwede wa i waŋ lobo me Abel-mekola i ŋet Tabat.

²³ Gilwoŋo jo Icrael ki i Naputali, ki i Acer wa ki i Manace ducu, ci guryemo kor jo Midian.

²⁴ Gideon ocwalo kwena i lobo godi ducu me Epraim kun waco ni, “Wubin, wulweny i kom jo Midian, wukurgi i waŋ wat ducu o wa i Bet-bara ki i Jordan bene.” Kit meno gilwoŋo jo Epraim ducu ci gumako waŋ wat ducu o wa i Bet-bara ki Jordan bene.

²⁵ Gumako luker pa jo Midian aryo, Oreb ki Jeeb; ci guneko Oreb i pata got pa Oreb, ki Jeeb guneko i bur biyo olok pa Jeeb. Lacen gukelo wi Oreb ki Jeeb loka Jordan bot Gideon.