Luŋolkop 5 - Acoli Baibul

Wer pa Debora gin ki Barak

¹ Debora ki Barak wod pa Abinoam guwayo wer akero i nino meno ni,

² “Luwimony gutelo wi Icrael, dano gubino ma gudyero komgi kekengi; wupwo Rwot!

³ “Wuwiny, wun luker! Wuter itwu, wun luloc! Abiywayo akero bot Rwot abiwero ki dwan mamit bot Rwot Lubaŋa pa Icrael.

⁴ “Rwot, i kare ma ikato woko ki i Ceir, i kare ma icoro la ki i dye lobo Edom, lobo ocako yeŋŋe, polo bene ocwero pii; ada do, pol ocako cwer,

⁵ Godi guyemje ki i nyim Rwot, Cinai oyeŋŋe kuca ki i nyim Rwot Lubaŋa pa Icrael.

⁶ “I kare pa Camgar wod pa Anat, ki i kare pa Yayeri, luwot gubedo pe i yo gudo, jo ma giwoto ka mo giwirre i yo matino.

⁷ Dano gutum woko ki i Icrael i kin paco, gutum, gutum woko do, nio ka in Debora ibino, ituc ma in i mego i Icrael.

⁸ I kare ma guyero lubaŋa mogo manyen, ci mony oo wa i dog gaŋ, Kwot mo, nyo toŋ, yam onen mono i kin io Icrael alip pyeraŋwen?

⁹ Cwinya olwodo lok i kom luwimony pa Icrael ma gudyero komgi i kin lwak. Wupwo Rwot!

¹⁰ “Wun lubed i wi kana makwar-ri ma wuumo komgi ki boŋŋi me bedowu, ki wun luwot ki tyenwu iyo, wutit lokke ba.

¹¹ Wuwiny dwan luwer ka ma gitwomo iye pii; kunnu gipako kit ma Rwot oloyo ki mony, kit ma danone ma ikin gaŋ guloyo ki lukworgi i Icrael. “I kare-nu jo pa Rwot gucito piny wa i dog gaŋ.

¹² “Deborawe, co woko, co woko! Co woko, co woko, icak wer! A malo, Barak, itel wi opiini ma iyako, in wod pa Abinoam!

¹³ Ludito mudoŋ gucako wot, jo pa Rwot gucito ka lwenypire i kom oteka.

¹⁴ Jo Epraim gucito gubino i nota, i korwu wunjo Benjamin ki lutuwu; luwimonypajo Makir gubino piny, lumak odoo ker gua i Jabulon.

¹⁵ Rwodi pa jo Icakar gubino ki Debora. Jo Icakar gucuŋ matek i kom Barak; gutwarre i nota i kore. Ento jo me kaka pa Reuben gubedo ki guŋ-ic.

¹⁶ Piŋo ibedo i dye dwol romi ka winyo nyamulere ma gikuto i kor lim? Jo me kaka pa Reuben gubedo ki guŋ-ic.

¹⁷ Gilead odoŋ loka Jordan; gin aŋo mumiyo Dan obedo mere i mel? Acer obedo mere mot i dog nam, obedo otoyo toke i Waŋ watte.

¹⁸ Jo Jabulon aye lwak ma gudyero komgi i to; ki jo Naputali bene i wi cere ma i dye bar.

¹⁹ Luker gubino, gulwenyo, luker me Kanaan gulwenyo matek i kare-nu i Taanak, i ŋet pii me Megido, ento pe gunoŋo lonyo me ayaka.

²⁰ Lakalatwe gulwenyo ki i polo, gulwenyo i kom Cicera kun gilubo gergi,

²¹ Kulu Kicon oterogi woko, wi biamwonyi mager-ri, Kicon mager-ri. Abimedo ki woto anyim ki tekka ducu!

²² “Aguragura gimoro piny ki oboŋ tyengi, kun gipye, gikirre kwede; aguragurane gipye, gikirre,

²³ “Lamalaika pa Rwot owacci, gicen Meroj, gicen lubedo iye matek, pien pe guriŋo i oduru pa Rwot, pi konyo Rwot ki lweny i kom oteka.

²⁴ “Yayeri gimiye gum makato mon ducu, dako pa Keber Lakeni; i kin mon ducu ma bedo i kema kome gum.

²⁵ Olego pii, dok omiye cak, okelle cak lukulu i awal maber ma ma oporre pi rwot.

²⁶ Omako loc kema i ciŋe, ciŋe malacuc otiŋo nyol pa lutic; Ogoyo wi Cicera, otyero, ocanyo, otuco tur nyime pil,

²⁷ Okulle piny, opoto, obuto lilwe ka tyene; okulle ka tyene, opoto; opoto oto ka ma okulle iye-ni.

²⁸ “Dako opiro wane ki i waŋ dirica min Cicera okiyo ki i waŋ ot, owacci, ‘Piŋo gadigadine pe odwogo oyot? Piŋo tyen gadigadine pe mor, bino oyot?’

²⁹ Mon ma luryeko gudok iye, en bene ogamo doge kene, ni,

³⁰ ‘Gunoŋo lim, gitye ka pokone, anyaka acel pi twon acel acel, nyo dodo aryo; boŋo manwala nwala pi Cicera, ma giyako, boŋo manwala nwala ma gidero, boŋŋi aryo ma gidero me abola i ŋuta.’

³¹ “Lumerokki ducu myero gutum woko kit meno, ai Rwot! Ento luremi gubed macalo cen ma tuc ki kerone.” I ŋe meno lobo oywe pi mwaka pyeraŋwen.