Luŋolkop 3 - Acoli Baibul

Rok ma gudoŋ pi temo jo Icrael

¹ Magi aye rok ma Rwot oweko gudoŋ i lobo me temo kwede cwiny jo Icrael, makato ducu dano ma i Icrael ducu ma peya gulwenyo lweny mo i Kanaan.

² Owekogi pi lok man keken wek yalwak ma i Icrael ducu gunyebbe ki lweny, wek en opwonygi ki lweny, makato ducu jo ma yam pe guŋiyo kwede.

³ Magi aye rok ma Rwot oweko gudoŋ: rwodi pa jo Piliciti abic, jo Kanaan ducu, jo Cidon ki jo Kiv ma yam gibedo i godi me Lebanon, cakke ki i got Baal-kermon o kwede wa i yo ma donyo i Kamat,

⁴ Gin aye gubedo me temo cwiny Luicrael pi ŋeyo ka gibilubo cik pa Rwot ducu ma yam en ociko bot kwarogi ki i dog Moses.

⁵ Kit meno jo Icrael gubedo i dye jo Kanaan, jo Kit, jo Amor, jo Periji, jo Kiv ki jo Jebuc.

⁶ Gucako nyomo anyiragi, gin bene gumiyo anyiragi bot awobegi, gunyomo; ci gucako woro lwak lubaŋagi.

Otiniel olaro jo Icrael ki i elo Kucan-ricataim

⁷ Jo Icrael gutimo gin ma nen marac i waŋ Rwot, kun wigi owil woko i kom Rwot Lubaŋagi, guworo jogi Baal mapatpat ki Aciterot-gu.

⁸ Pienno omiyo kiniga omako Rwot i kom jo Icrael, ci omiyogi woko i cin Kucan-ricataim kabaka me Mecopotamia. Jo Icrael gutiyo bot Kucan-ricataim mwaka aboro.

⁹ Ento ka jo Icrael gukok bot Rwot, en omiyogi dano ma olarogi, en Otiniel wod pa Kenaj, ma omin Kaleb matidine.

¹⁰ Cwiny pa Rwot obino i kome, ci obedo ka ŋolo kop i Icrael. Ka ocito ka lweny, Rwot omiyo Kucan-ricataim kabaka me Mecopotamia i ciŋe, obwoyo Kucan-ricataim woko,

¹¹ Kit meno omiyo lobo oywe pi mwaka pyeraŋwen, ci lacen Otiniel wod pa Kenaj oto.

Ekud olaro jo Icrael ki i do jo Moab

¹² Jo Icrael dok gutimo gin ma nen marac i waŋ Rwot, ci Rwot omiyo tek bot Eglon kabaka me Moab me lweny i kom jo Icrael, pien onoŋo gutimo gin ma nen marac i waŋ Rwot.

¹³ Eglon ocoko jo Ammon ki jo Amalek, ocito kwedgi, oloyo jo Icrael, omayo gaŋ Otit woko,

¹⁴ Jo Icrael gutiyo bot Eglon kabaka me Moab pi mwaka apar wiye aboro kulu.

¹⁵ Ento ka jo Icrael gukok bot Rwot, en omiyogi dano ma olarogi, en Ekud wod pa Gera ma jo Benjamin, dano ma lacam. Jo Icrael gumiyo en aye otero mucorogi bot Eglon kabaka me Moab.

¹⁶ Ekud oteto pala lucwanne ma lake bit ryoryo ma borre oromo futi acel ki nucu, ci orwako i te boŋone, otweyo i kom eme tuŋ lacuc,

¹⁷ ocito otero mucoro bot Eglon. Eglon onoŋo obedo dano ma ocwe mada.

¹⁸ Ka Ekud otyeko miyo mot me mucoro bot kabaka, ocwalo dano ma gutiŋo mot meno gucito woko.

¹⁹ Ento en kikome, ka oo i godi ma gipayo apaya ma cok ki Gilgal, olokke odok cen, owacci, “At ye ki lok mo me muŋ ma gicwala kwede boti, kabaka.” Kabaka ociko ni, “‘Wuliŋ koŋ!” Ci lwak luticce ducu ma gucuŋ i nyime gukato woko,

²⁰ Ka Ekud obino bote, onoŋo en obedo kene i kicikane manic ma malo i wi ot. Ekud owacci, “Atye ki kwena ma oa ki bot Lubaŋa ma akelo boti,” ci kabaka oa malo ki i wi komme.

²¹ Ekud oroyo ciŋe ma lacam, omako pala lucwan, owoto ki i eme ma tuŋ lacuc, ocobo ki i kabaka.

²² Lak pala odonyo wa ki lokke, ci moo iye opuyo lak pala woko. Pe owoto pala lucwan woko ki i i kabaka, dok wee iye okatti woko.

²³ Ekud okato woko ki ka ma gidonyo kwede i ot-ti, ci oloro doggola me kicika me wi ot ka ma kabaka tye iye-ni, otweyo woko.

²⁴ Ka en doŋ ocito woko, ci lutic gubino. Ka guneno ni doggola me kicika ‘ma i wi ot doŋ gitweyo woko, ci gubedo ka tamo ni, “Laditwa tye ka konnye i ot matidi ma i kicika manic-ci.”

²⁵ Gubedo ka kurone nio ka doggi otwo woko; ento ka en pud ori kun pe oyabo doggola me kicika me wi ot, gukwanyo layab, guyabo kwede, ci nen, rwotgi obuto i dye ot ma doŋ oto,

²⁶ Ma pud gigalle, Ekud olwi oriŋo woko, okato wa i ŋe godi ma gipayo apaya ca, oriŋo olaro Ceira,

²⁷ Ka doŋ oo kunnu, okuto tum i lobo godi me Epraim; ci jo Icrael gucito kwede gua ki i lobo godi, kun en telo wigi,

²⁸ Owaco botgi ni, “Wulub kora, pien Rwot doŋ omiyo lumerokwu, jo Moab, i ciŋwu.” Gucito kwede, gumako waŋ wat me Jordan me geŋo jo Moab: pe guye dano acel mo oŋolo kulu.

²⁹ I kare meno guneko jo Moab ma mito romo alip apar, ma gin ducu twoni co matego; acel mo pe obwot.

³⁰ Kit meno gutayo jo Moab woko i nino meno, Gubedo i te loc pa jo Icrael ci lobo oywe pi mwaka pyeraboro,

Camgar olaro jo Icrael ki i ciŋ jo Piliciti

³¹ Ŋat mulubo kore en Camgar wod pa Anat ma oneko jo Piliciti miya abicel ki dim lalek dyaŋ; en bene olaro jo Icrael.