Luŋolkop 21 - Acoli Baibul

Ginoŋo mon pi jo Benjamin

¹ Onoŋo jo Icrael yam gukwoŋo kwoŋ i Mijpa ni, “Pe dano mo ki i kinwa bimiyo nyare me anyoma bot jo Benjamin.”

² Ci lwak gubino i Betel, gubedo kunnu i nyim Lubaŋa o wa otyeno, gutiŋo dwangi malo ki koko matek,

³ kun giwaco ni, “Ai Rwot Lubaŋa pa Icrael, piŋo lok man otimme i Icrael, ma tin wi kaka acel doŋ pe i Icrael?”

⁴ Ka dok orwone lwak gua odiko con ka caŋo keno tyer kunnu, ki tyero gitum awaŋa ki gityer lakwecwiny.

⁵ Ci jo Icrael guwacci, “I kin kaka me Icrael ducu jo mene ma yam pe gubino i kare ma wacokke bot Rwot?” Pien onoŋo gukwoŋo kwoŋ madit ni, “Ka dano mo pe obino bot Rwot i Mijpa gibineke woko.”

⁶ Kica omako jo Icrael i kom utmegigi jo Benjamin kun giwaco ni, “Kaka acel doŋ waŋe orwenyo woko tin ki i kin jo Icrael.

⁷ Wabitimo niŋniŋ pi noŋo mon pi jogi ma gudoŋ, ma doŋ watyeko kwoŋo kwoŋ i nyiŋ Rwot ni, pe wabimiyo nyarwa mo botgi me anyoma-ni?”

⁸ Mumiyo guwacci, “Jo mene ma i kin kaka ma i Icrael ma yam pe gubino bot Rwot i Mijpa?” Ci gunoŋo ni i kare ma gucokke dano acel mo pe obino i gony ma oa ki i Jabec-Gilead,

⁹ Pien i kare ma gikwano dano, dano acel mo pe onen ma oa ki bot jo ma bedo i Jabec-gilead.

¹⁰ Pienno lwak gucwalo twoni co ma lulweny alip apar wiye aryo kun gicikogi ni, “Wucit wunek jo ma bedo i Jabec-gilead ki pala lucwan, wa mon ki litino.

¹¹ Wubitimo kit man: co ducu ki mon ducu ma yam gubuto ki laco wubijwero woko liweŋ.”

¹² I kin jo me Jabec-Gilead gunoŋo anyira miya aŋwen ma peya gubuto ki co, gukelogi i gony ma i Cilo, ma tye i lobo Kanaan.

¹³ Ka doŋ lwak ducu gucwalo lok bot jo Benjamin ma gitye i got Rimmon kun giloko botgi lok me kuc.

¹⁴ Jo Benjamin gudwogo i kare meno ci gumiyo botgi anyira me Jabec-Gilead ma guwekogi makwo-ni; ento pe guromogi ducu.

¹⁵ Kica omako lwak i kom jo Benjamin, pien onoŋo Rwot oketo ariya i kom kaka me Icrael ducu.

¹⁶ Ka dok ludoŋo me lwak guwacci, “Wabitimo niŋniŋ pi noŋo mon pi dano mudoŋ, ma doŋ gityeko mon ma i kin jo Benjamin woko ducu-ni?”

¹⁷ Ci guwacci, “Luleyo myero nonne pi jo Benjamin ma gubwot, wek kaka mo pe gijwa woko ki Icrael.

¹⁸ Ento pe watwero miyo anyirawa botgi me bedo mongi.” Pien yam jo Icrael gukwoŋo kwoŋ ni, “Gicen ŋat ma omiyo dako mo bot jo Benjamin.”

¹⁹ Pi meno guwacci, “Nen, tye nino madit me woro Rwot ma bedo mwaka ki mwaka i Cilo.” Cilo onoŋo tye i ŋet Betel yo tuŋ acam, cok ki yo gudo ma a ki Betel cito Cekem; ka it ye Lebona, Ci lo tye yo tuŋ acuc.

²⁰ Guciko jo Benjamin ni, “Wucit wubut i potti olok, wukur dano,

²¹ ci wuki. Ka ce anyira Cilo gibino ka myel, ci wubin, wumakgi woko, kun dano acel acel mako dakone ki i kin anyira Cilo, ci wucit kwedgi wa i lobo Benjamin.

²² Ka ce wegigi nyo omegigi gibino ka laro lokke botwa, ci wabiwaco botgi ni, ‘Wutim ber wumigi botwa; pien yam pe wakelo anyira ki i mony ma romogi ducu, wun bene pe wumiyo mogo botgi; kono wumiyogi botgi, kono wuroco.’ ”

²³ Jo Benjamin gutimo kit meno; gutero mongi ma oporo welgi, ma gumako ki i kin lumyel, gutiŋo yo, gucito, gudok i lobo ma yam guleyo-ni, ka gugero gaŋgi odoco, gubedo iye.

²⁴ Jo Icrael guket woko ki kunnu i kare meno; ŋat acel acel odok i kakane ki i doggolane. Guket, gucito woko ki kenyo, kun dano acel acel ci to i lobo ma yam oleyo.

²⁵ I kare meno onoŋo kabaka pe Icrael; dano acel acel tiyo gin ma co tamo ni tye atir.