Luŋolkop 17 - Acoli Baibul

Mika ki cal apayane

¹ Yam tye dano mo i lobo godi me Epraim ma nyiŋe Mika.

² Owaco bot minne ni, “Lim ryal alip apar wiye acel ma yam gikwalo ki boti-ni, ma yam iloko iceno iye dano-ni, kun an bene awinyo, nen, ryal-lu tye bota, an aye yam akwanyo.” Minne ogamo ni. “Rwot omiyi gum, latinna.”

³ Odwoko lim ryal alip apar wiye acel bot minne, ci minne owaco ni, “An kikoma adyero ryal man bot Rwot pi woda me timo cal apaya ki cal ryal ma giliyo aliya; ci kombeddi doŋ omiyo adwoko boti.”

⁴ Mika dok odwoko lim bot minne, ci minne okwanyo lim ryal miya aryo, omiyo bot latet ryal, en otiyo ki cal apaya ma gimwono kome ki ryal, ki cal ryal ma giliyo aliya, ci giketo i ot pa Mika.

⁵ Laco man, Mika, onoŋo tye ki ot woro Lubaŋa i gaŋŋe, ci otiyo epod ki cal lubaŋa, oketo wode acel me bedo ajwakane.

⁶ I kare meno onoŋo kabaka pe i Icrael; dano acel acel tiyo gin ma en tamo ni tye atir.

⁷ I kare meno onoŋo tye latin laco mo ma bedo i Beterekem, i lobo Juda. En onoŋo Lalevi ci bedo kunnu macalo welo.

⁸ En odak oa woko ki i Beterekem ma i Juda wek ecibed i kabedo mo ma ebinoŋo, Ka owoto, ci oo i lobo godi me Epraim, i gaŋ pa Mika.

⁹ Mika openye ni, “In ia ki kwene?” Ogamo ni” “An Lalevi me Beterekem ma i Juda, abibedo i kabedo mo ma abinoŋone.”

¹⁰ Ci Mika owaco bote ni, “Bed doŋ bota, wek ibed wora ki ajwakana, ci abimini litn ryal apar mwaka ki mwaka, ki boŋŋi me aruka, dok abigwoki.”

¹¹ Lalevi oye bedo bote; ci latin laco meno ocako bedo kwede macalo ŋat acel i kom litinone.

¹² Mika oketo Lalevi me bedo ajwakane, ci obedo i gaŋ pa Mika.

¹³ I kare-nu Mika owacci, “Kombeddi doŋ aŋeyo ni Rwot bibedo kweda maber, pien doŋ atye ki Lalevi me bedo ajwakana.”