Luŋolkop 10 - Acoli Baibul

Tola ki Jair

¹ Ki i ŋe Abimelek dano ma dok olaro jo Icrael en aye Tola wod pa Puwa, wod pa Dodo, ma jo Icakar. En yam bedo i Camir ma i lobo godi me Epraim.

² Obedo ka ŋolo kop i Icrael pi mwaka pyeraryo wiye adek. Ka oto, giyike i Camir.

³ Dano ma olubo kore en aye Jair ma Lagilead. En obedo laŋolkop i Icrael pi mwaka pyeraryo wiye aryo.

⁴ En yam tye ki awobene pyeradek ma giwoto ki kanagi pyeradek. Dok gibedo ki gaŋigi pyeradek bene ma pud gilwoŋo ni Kavot-jair o wa onyoo, ma grtye i lobo Gilead.

⁵ Ka Jair oto, ci giyike i Kamon.

Jo Ammon guuno jo Icrael

⁶ Jo Icrael dok gutimo gin ma nen marac i waŋ Rwot kun giworo jogi Baal mapatpat ki jogi ma mon-gu, ma gin lubaŋa pa jo Ciria, jo Cidon, jo Moab, jo Ammon ki jo Piliciti; gubwoto Rwot woko, pe dok giwore.

⁷ Pienno kiniga omako Rwot i kom jo Icrael, ci omiyogi i ciŋ jo Piliciti ki jo Ammon.

⁸ Jo-nu guninyo jo Icrael guunogi matek i mwaka meno. Gubedo ka uno jo Icrael ducu ma gibedo loka Jordan i lobo pa jo Amor ma tye i lobo Gilead pi mwaka apar wiye aboro kulu.

⁹ Jo Ammon guŋolo kulu Jordan ka lweny i kom jo Juda bene, ki jo Benjamin ki jo me doggola pa Epraim, mumiyo piny orem ki jo Icrael woko atika.

¹⁰ Lacen jo Icrael gukok bot Rwot kun giwaco ni, “Doŋ wabalo i komi, pien wabwoto Lubaŋawa woko, waworo jogi Baal mapatpat.”

¹¹ Ci Rwot owaco bot jo Icrael ni, “Yam pe an aye alarowu ki bot jo Ejipt, jo Amor, jo Ammon ki jo Piliciti?

¹² Jo Cidon bene ki jo Amalek ki jo Maon yam giunowu, ento i kare ma yam wukok bota, alarowu ki i ciŋgi.

¹³ Kadi bed kumeno, pud wubwota woko aye, wuworo lwak lubaŋa mukene. Pienno an pe dok abimedde ki larowu.

¹⁴ Wucit wukok bot lwak lubaŋa ma yam wuyero-ni, Wek gin aye gularwu ki i kare ma piny orem kwedwu.”

¹⁵ Ento jo Icrael guwaco bot Rwot ni, “Wapoto i bal: in itim i komwa kit ma imito, ento walegi ilarwa tin.”

¹⁶ Ci gubolo lwak Iubana pa lurok ma i kingi-ni woko, gucako woro Rwot; ci Rwot cwinye oton matek pi atwom ma jo Icrael gubedo kwede.

¹⁷ I kare meno jo Ammon guywayo mony, gugony i Gilead, ci jo Icrael gucokke kacel, gugony i Mijpa.

¹⁸ Ludito pa jo Gilead gucako lok kekengi ni, “Dano mene ma bicako lweny i kom jo Ammon? En bibedo lalo wi jo ma gibedo i Gilead ducu.”