Luŋolkop 1 - Acoli Baibul

Jo Juda ki jo Cimeon gumako Adoni-bejek

¹ Ka Yocwa doŋ oto, jo Icrael gucako penyo dog Rwot ni, “Aŋa ma bikwoŋo cito piwa ka lweny i kom jo Kanaan?”

² Ci Rwot ogamo ni, “Jo Juda aye gibicito; nen, atyeko miyo lobo-ni i ciŋgi.”

³ Jo Juda guwaco bot utmegigi jo Cimeon ni, “Wubin wunywak kwedwa wot i lobo ma gipoko botwa ki kwir-ri, wek walweny i kom jo Kanaan, Wan bene wabinywako kwedwu wot kit meno i lobo ma gipoko botwu,” Mumiyo jo Cimeon gudto kwedgi.

⁴ Ka jo Juda gucito kunnu, Rwot omiyo jo Kanaan ki jo Periji i ciŋgi, ci guloyo dano alip apar i Bejek,

⁵ Gurwatte ki Adoni-bejek kabaka me Bejek i gaŋŋe kunnu, gulwenyo i kome, ci guloyo jo Kanaan ki jo Periji.

⁶ Adoni bejek oriŋo woko, ento gulubo kore, gumake, guŋolo twoni ciŋe woko, ki twoni tyene,

⁷ Adoni-bejek owacci, “Yam luker pyerabiro ma giŋolo twoni ciŋgi ki twoni tyengi gubedo ka coko ŋide cam i te mejana; kit ma yam atimo i komgi-ni, Lubaŋa oculla kit meno.” Gitere i Jerucalem, ci oto kunnu.

Jo Juda guloyo Jerucalem ki Kebron

⁸ Ka dok jo Juda gulwenyo i kom Jerucalem, gumako woko, guneko jo ma tye iye ki pala lucwan, ka guwaŋo woko ki mac.

⁹ Ka lacen jo Juda dok gucito ka lweny i kom jo Kanaan ma gibedo i lobo godi, ki i Negeb, ki i pwor got.

¹⁰ Jo Juda gucito bene ka lweny i kom jo Kanaan ma gibedo i Kebron, ci guloyo Cecai, Akiman ki Talmai. Gaŋ ma koni gilwoŋo ni Kebron, yam nyiŋe obedo Kiriat-arba.

Otiniel oloyo Debir ci gimiye Akaca obed dakone

¹¹ Ka gua ki kunnu, gucito ka lweny i kom jo ma gibedo i Debir. Nyiŋ Debir yam obedo Kiriat-ceper.

¹² Ci Kaleb owacci, “Ka ŋatti mo olwenyo i kom Kiriat-ceper ce omako, ci abimiye nyara Akaca obed dakone.”

¹³ Otiniel wod pa Kenaj, ma omin Kaleb matidine, aye omako, ci Kaleb omiye nyare Akaca obedo dakone.

¹⁴ Ka nyako ocito bot cware, ci odiye ni openy poto mo bot wonne. Opye piny ki i wi kanane ci Kaleb openye ni, “Imito gin aŋo?”

¹⁵ Nyare ogamo ni, “Miya mot mo; macalo doŋ iketa wa i lobo Negeb, dok imiya waŋ it mo bene.” Kaleb omiye waŋ it ma tuŋ malo ki waŋ it ma tuŋ piny bene,

Kabedo ma jo Juda ki Benjamin gumayo

¹⁶ Likwayo pa jo Keni, ma jo pa oc Moses, gucito kacel ki jo Juda kun gia ki i gaŋ Otit, gucito wa i tim me lobo Juda ma tye i Negeb ma cok ki Arad; gucito, gubedo kacel ki jo Amalek.

¹⁷ Jo Juda gucito kacel ki utmegigi jo Cimeon, ci guloyo jo Kanaan ma gibedo i Jepat, Gudyero gaŋ meno i ciŋ Rwot, gujwero woko; mumiyo nyiŋ gaŋ meno gilwoŋo ni Korma.

¹⁸ Juda dok omako Gaja ki lobo ma i ŋete, Acikelon ki lobo ma i ŋete ki Ekron ki lobo ma i ŋete,

¹⁹ Rwot obedo ki Juda, mumiyo ocamo lo bo godi odoko mere; ento ryemo jo ma gibedo i bar oloye, pien onoŋo gitye ki gadigadi lweny me nyonyo.

²⁰ Kebron gimiyo bot Kaleb, kit ma yam Moses ociko-ni; en oryemo likwayo pa Anak adek woko ki kunnu.

²¹ Ento jo Benjamin pe guryemo jo Jebuc ma gibedo i Jerucalem, mumiyo jo Jebuc gunywako bedo i Jerucalem kacel ki jo Benjamin o kwede wa onyoo.

Likwayo pa Yucepu gumayo Betel

²² Jo me ot pa Yucepu bene gucito ka lweny i kom Betel, ci Rwot obedo kwedgi.

²³ Gucwalo lurot-piny i Betel, meno aye gaŋ ma yam gilwoŋo ni Luj.

²⁴ Ka lurot-piny guneno dano mo ka bino kun oa ki i gaŋ, guwacce ni, “Nyut botwa yo me donyo i gaŋ ba, ci wabitimi maber.”

²⁵ En onyuto botgi yo me donyo i gaŋ, ci guneko dano ina gitye iye ki pala lucwan; ento guweko laco meno ki ludoggolane gucito.

²⁶ Dano meno ocito i lobo pa jo Kit, ogero iye gaŋ, ocako nyiŋe ni Luj; meno aye obedo nyiŋe o kwede wa onyoo.

Kabedo ma jo Manace ki jo Epraim gumayo

²⁷ Jo Manace pe guryemo jo ma gibedo i Bet-cean ki i gaŋi matino ma i ŋete, kadi jo ma gibedo i Taanak, Dor, Ibleam ki Megido ki i gaŋi matino ma i netgi; ento jo Kanaan gucerre ci gubedo i lobo-nu.

²⁸ Ka jo Icrael gudoko tek, ci gudiyo gin jo Kanaan ki tic muroni, ento pe guryemogi woko ducu.

²⁹ Jo Epraim pe guryemo jo Kanaan ma gubedo i Gejer, ento jo Kanaan gubedo i kingi i Gejer.

Kabedo ma kaka mukene gutero

³⁰ Jo Jabulon pe guryemo jo ma gibedo i Kitron, kadi jo ma gibedo i Nakalol; ento jo Kanaan gubedo i kingi, ci guketogi i tic muroni.

³¹ Jo Acer pe guryemo jo ma gibedo i Akko, kadi jo ma gubedo i Cidon, Aklab, Akijib, Kelba, Apik ki Rekob.

³² Ento jo Acer gubedo i kin jo Kanaan ma gin wegi lobo-nu, pien pe guryemogi woko.

³³ Jo Naputali pe guryemo jo ma gibedo i Bet-cemec ki Bet-anat, ento gubedo i kin jo Kanaan ma gin wegi lobo-nu. Kadi bed kumeno, guketo jo Bet-cemec ki Bet-anat i tic muroni.

³⁴ Jo Amor gudiyo jo Dan, gudwokogi wa i lobo godi, pe guye ni gucit i bar.

³⁵ Jo Amor gucerre gubedo i got Kerec, i Aijalon ki i Calabim. Ento jo me ot pa Yucepu gubedo ka diyogi matek, ci guketogi i tic muroni.

³⁶ Waŋ lobo pa jo Amor ocakke ka ma giito iye malo i Akrabim, oa ki i Cela ocito malo.