Lulevi 9 - Acoli Baibul

Aron otyero gitum mapatpat

¹ I nino me aborone Moses olwoŋo Aron ki awobene ki ludoŋo pa jo Icrael,

² ci owaco bot Aron ni, “Kwany wod twon, pi gitum me bal, ki nyok romo pi gitum awaŋa, ma pe komgi ki mwonyo ducu, wek ityergi i nyim Rwot.

³ Dok iwac bot jo Icrael ni, ‘Wukwany nyok dyel pi gitum me bal, wod twon ki latin romo ma ditogi mwaka acel acel ma pe komgi ki mwonyo ducu, pi gitum awaŋa,

⁴ ki twon ki nyok romo pi gityer lakwecwiny, me atuma i nyim Rwot, ki gityer me moko kwon ma girubo ki moo; pien Rwot binen botwu tin.’ ”

⁵ Gukelo gin ma Moses ociko i nyim kema me rwatte; ci lwak ducu gunyiko cok, gucuŋ i nyim Rwot.

⁶ Moses owaco ni, “Man aye gin ma Rwot ociko ni wuti, ci deyo pa’ Rwot binen botwu.”

⁷ Moses dok owaco bot Aron ni, “Nyik cok ki keno tyer, wek ityer gitum me balli ki gitum awaŋani, ci itim gin lakwany bal ki i komi ki i kom lwak. Dok ikel gityer pa lwak itim gin lakwany bal ki i komgi macalo yam Rwot ociko.”

⁸ Aron ocako nyiko cok kt keno tyer ci oneko wod twon me gitum me bal ma onoŋo tye pire kikome.

⁹ Ka awobe pa Aron gumiyo remo bote, en oluto lwet cine i remo ci oreyo kom ten keno aŋwen me keno tyer, ka oonyo remo i te tedi keno tyer.

¹⁰ Ento dwolo ki olan aryo ki okene ma tye i kom cwiny ma okwanyo ki i kom gitum me bal en owaŋo woko i wi keno me tyer, macalo yam Rwot ociko ki Moses.

¹¹ Riŋone ki pyenne en owano awaŋa ki mac woko i ne gony.

¹² Ka oneko gitum awaŋa, ci awobe pa Aron gumiyo remo bote, en ocoro i kom keno tyer kun rumo kome ducu.

¹³ Ka dok gumiyo gitum awaŋa bote i kit ma giŋido kwede, kacel ki wic ci en owanogi i wi keno tyer.

¹⁴ En olwoko jam iye ki tyene ducu, ci owanogi i wi keno tyer kacel ki gitum awaŋa.

¹⁵ Ka man otum, otyero gityer pa lwak, Okwanyo dyel me gitum me bal ma onoŋo tye pi lwak, ci oneko, otyero pi bal, macalo gitum me bal mukwono.

¹⁶ Ka dok omiyo gitum awaŋa, otyero kun lubo cik.

¹⁷ Ka otyero gityer me moko kwon, ojobo poŋ ciŋe, owaŋo i wi keno tyer, omedo i kom gitum awaŋa me odiko.

¹⁸ Oneko twon ki nyok romo bene en gitum me gityer lakwecwiny ma onoŋo tye pi lwak. Awobe pa Aron gumiyo remo bote, ci en ocoro i kom keno tyer kun rumo kome ducu.

¹⁹ Ka dok gumiye dwolo me twon ki me nyok romo, ki moo yibe, dwolo ma oumo jam iye, olan aryo, ki okene ki i kom cwiny.

²⁰ Guketo dwolo i wi gok, ci owaŋo dwolo i wi keno tyer,

²¹ ento gok ki em malacuc Aron okwato me bedo gityer akwata i nyim Rwot, macalo Moses ociko.

²² Ka doŋ Aron otiŋo ciŋe malo tuŋ bot lwak, ci olamo gum i komgi, ci olor piny nia ki ka tyero gitum me bal ki gitum awaŋa ki gityer lakwecwiny ducu.

²³ Lacen Moses ki Aron gudonyo i kema me rwatte; ka gukatti woko, ci gulamo gum i kom lwak, ci deyo pa Rwot onen bot lwak ducu.

²⁴ Ka mac oa ki i nyim Rwot obino owaŋo gitum awaŋa ki dwolo ma i wi keno tyer, otyeko woko ducu. Ka lwak ducu oneno gudaŋŋe ki woo, gupoto piny aryeba ic.