Lulevi 8 - Acoli Baibul

Kwero Aron ki awobene pi tic maleŋ

¹ Rwot owaco bot Moses ni,

² “Ter Aron kacel ki awobene, ki boŋŋi arukagi, ki moo wir, ki twon me gitum me bal, ki nyogi romi aryo, ki aduku me mugati ma to bi pe iye;

³ ci icok lwak ducu kacel i doggola kema me rwatte.”

⁴ Moses otiyo kit macalo Rwot ocike; ci lwak gucokke i doggola kema me rwatte.

⁵ Moses owaco bot lwak ni, “Man aye gin ma Rwot ociko ni giti.”

⁶ Ci Moses okelo Aron ki awobene olwokogi ki pii.

⁷ Oruko Aron ki kanyi, otweyo pyere ki kitambara latwe pyer, ka dok oruke ki jor, oketo epod i kome, otweyo pyere ki ceme me epod ma gicweyo ki diro, otweyo, orido kwede i kome,

⁸ Oketo kicaa kor i kore, ka dok oketo Urim ki Tumim i kicaa kor.

⁹ Odwalo kitambara me adwala i wiye, ka otweyo akwaya jabu i kom kitambara me wic i nyime, me bedo lalukana maleŋ: macalo yam Rwot ociko ki Moses.

¹⁰ Moses okwanyo moo wir ci owiro ki kema ki jami ducu ma, tye iye, okwerogi.

¹¹ Okiro moo i kom keno tyer tyen abiro, ci owiro keno tyer ki jami ticce ducu ki moo, kacel ki otako lwok ki tedi tere, pi kwerogi,

¹² Oonyo moo i wi Aron, owire kwede pi kwerone,

¹³ Moses dok okelo awobe pa Aron, orukogi ki kanyi, otweyo pyergi ki kitambara latwe pyer, ka otweyo gitok matino i wigi, macalo yam Rwot ociko ki Moses,

¹⁴ Lacen okelo twon me gitum me bal, ci Aron ki awobene guketo ciŋgi i wi twon me gitum me bal.

¹⁵ Moses oneko, ogwelo remone ci oreyo i kom ten keno aŋwen me keno tyer ki lwet ciŋe orumo kome ducu, olonyo kwede keno tyer, okwero pi kwanyo bal ki i kome.

¹⁶ Dok Moses okwanyo dwolo ducu ma i kom jam iye, ki okene ma i kom cwiny, ki olaŋ aryo ki dwologi ducu, owaŋogi i wi keno tyer.

¹⁷ Ento riŋo twon-nu ki pyenne ki wee iye owaŋo awaŋa ki mac woko wa i ŋe gony, macalo yam Rwot ociko ki Moses,

¹⁸ Ka man otum, okelo nyok romo me gitum awaŋa, ci Aron ki awobene guketo ciŋgi i wi nyok romo.

¹⁹ Moses oneko, ocoro remone i kom keno kyer kuy rumo kome ducu.

²⁰ Ka doŋ giŋido ruŋo nyok romo woko, Moses owaŋo wiye ki riŋo ma giŋido-ni ki dwolone.

²¹ Jam iye ki tyene ducu gilwoko ki pii lacen Moses owaŋo riŋo nyok romo woko ducu ki berre i wi keno tyer obed gitum awaŋa, gin ma ŋwece kur me yomo cwiny, gityer ma giwaŋo ki mac bot Rwot, macalo yam Rwot ociko ki Moses.

²² Lacen okelo nyok romo mukene, en nyok romo me keto dano i dog tic, ci Aron ki awobene guketo ciŋgi i wi nyok romo.

²³ Moses oneko, ogwelo remone ci oreyo i ogwilo it Aron malacuc, ki i kom twon nyig ciŋe malacuc, ki i kom twon nyig tyene malacuc.

²⁴ Gikelo awobe pa Aron ci Moses oreyo remo i ogwilo itgi malacuc, ki i kom twon nyig ciŋgi malacuc, ki i kom twon nyig tyengi malacuc; ka Moses ocoro remo i kom keno tyer kun rumo kome ducu.

²⁵ Lacen okwanyo dwolo, ki moo yibe, ki dwolo ducu ma i kom jam iye, ki okene ma tye i kom cwiny, ki olaŋ aryo ducu kacel ki dwologi, ki em malacuc.

²⁶ Ka okwanyo capat acel ma tobi pe iye ki i aduku me mugati ma tobi pe iye ma tye i nyim Rwot, ki capat acel me mugati ma girubo ki moo, ki capat acel marep, oketogi i wi dwolo ki i wi em malacuc.

²⁷ Oketo magi ducu i dye cin Aron ki i dye cin awobene, okwatogi me bedo gityer me akwata i nyim Rwot.

²⁸ Lacen Moses okwanyogi ki i ciŋgi, owaŋogi woko i wi keno tyer kacel ki gitum awaŋa, obed gityer me keto dano i dog tic, gin ma ŋwece kur me yomo cwiny, gityer ma giwaŋo ki mac bot Rwot.

²⁹ Moses okwanyo gok, okwato me bedo gityer akwata i nyim Rwot; en aye obedo waŋ wat pa Moses ma oa ki i kom nyok romo me ketogi i dog tic, macalo yam Rwot ociko ki Moses.

³⁰ Moses okwanyo moo wir ki remo man ok ma i wi keno tyer, okiro i kom Aron ki i kom boŋŋi arukane, ki i kom awo bene ki boŋŋi arukagi; kit meno okwero Aron ki boŋŋi arukane, ki awobene ki boŋŋi arukagi, gudoko maleŋ.

³¹ Moses owaco bot Aron ki awobene ni, “Wuted riŋo i doggola kema me rwatte, wucam ki kunnu, kacel ki mugati ma tye i aduku me gityer me ketowu i dog tic, macalo yam aciko kun awaco ni, ‘Aron ki awobene aye gibicamone.’

³² Riŋo ki mugati ma odoŋ myero wuwan awaŋa ki mac,

³³ Pe wubikato woko ki i doggola kema me rwatte pi nino abiro, nio ka kare me ketowu i dog tic ocobbe kakare, pien ketowu i dog tic bitero nino abiro.

³⁴ Gin ma gibedo ka tiyone tin, yam Rwot ociko ni gitim me lakwany bal ki i komwu.

³⁵ Wun wubibedo i doggola kema me rwatte pi nino abiro, kun wulubo gin ma Rwot ociko, wek pe wuto; pien gicika kit meno.”

³⁶ Aron ki awobene gutiyo gin ducu ma Rwot yam ociko ki i dog Moses.