Lulevi 4 - Acoli Baibul

Gitum me bal

¹ Rwot owaco bot Moses ni,

² “Wac bot jo Icrael ni, Ka dano mo obalo ma pe otimo akaka, i kom gin ma yam Rwot ociko ni pe gitim, ce otimo acel mo i kingi,

³ ka ce ajwaka ma giwiro ki moo aye obalo, kun okelo bal i kom lwak, myero en otyer bot Rwot wod twon ma kome pe ki mwonyo pi bal ma en otimo, obed gitum me bal.

⁴ En bikelo wod twon i doggola kema me rwatte i nyim Rwot, biketo ciŋe i wi twon ci neko woko i nyim Rwot.

⁵ Ajwaka ma giwiro bikwanyo remo twon manok, tero i kema me rwatte;

⁶ ajwaka biluto lwet ciŋe i remo ci kiro remo tyen abiro i nyim Rwot, i nyim boŋo kicika ma umo kabedo maleŋ.

⁷ Ajwaka bireyo remo mukene i kom ten keno aŋwen me keno tyer me odok eceta ma ŋwece kur ma tye i kema me rwatte i nyim Rwot; remo twon mudonge en bionyo woko i te tedi keno tyer me gitum awaŋa ma tye i doggola kema me rwatte.

⁸ En bikwanyo dwolo ducu ki i kom twon me gitum me bal, dwolo ma oumo jam iye, ki dwolo ducu ma tye i kom jam iye,

⁹ ki olaŋ aryo ducu ki dwolo ma tye i komgi ma tye i pyere, ki okene ki i kom cwiny ma en bikwanyo woko kacel ki olaŋ aryo,

¹⁰ kit macalo gikwanyo ki i kom twon me gityer lakwecwiny; ci ajwaka biwaŋogi woko i wi keno tyer me gitum awaŋa.

¹¹ Ento pyen twon ki riŋone ducu, kacel ki wiye ki tyene ki jam iye ki wee iye,

¹² en bitero woko ki berre wa i ŋe gony i kabedo ma olony ka ma gionyo iye buru, ci biwaŋo i wi yen ki mac; i kabedo ka ma gionyo iye buru en aye gibiwaŋo iye.

¹³ “Ka lwak jo Icrael ducu gutimo bal ma pe gutimo akaka, ce lokke pe oŋene i nyim kacokke, kun gitiyo gin mo acel i kom gin ducu ma yam Rwot ociko ni pe gitim, ci gutiŋo alii;

¹⁴ ka bal ma gutimo-ni doŋ onene, ci kacokke myero otyer wod twon me gitum me bal kun gikelo i nyim kema me rwatte.

¹⁵ Ludoŋo pa lwak gibiketo ciŋgi i wi twon i nyim Rwot, ci gibineko twon i nyim Rwot.

¹⁶ Ajwaka ma giwiro bitero remo twon manok i kema me rwatte:

¹⁷ ajwaka biluto lwet ciŋe i remo ci kiro tyen abiro i nyim Rwot i nyim boŋo kicika.

¹⁸ En bireyo remo mukene i kom ten keno aŋwen me keno tyer ma tye i kema me rwatte i nyim Rwot; remo mudoŋŋe en bionyo woko i te tedi keno tyer me gitum awaŋa ma tye i doggola kema me rwatte.

¹⁹ En bikwanyo dwolone ducu ki i kome ci wano woko i wi keno tyer.

²⁰ En bitiyo ki twon man kit ma onoŋo otiyo ki twon me gitum me bal; ajwaka bitimo gin me lakwany bal ki i komgi ci Rwot biweko balgi.

²¹ Ci ajwaka bitero twon woko Wa i ŋe gony, biwaŋo kit macalo owaŋo ki twon mukwoŋo-ni; en aye gitum me bal pa lwak mucokke.

²² “Ka laloc mo aye obalo ma pe otimo akaka, kun otiyo gin mo acel i kom gin ducu ma yam Rwot Lubaŋane ociko ni pe gitim, ci otiŋo alii,

²³ ka gimiyo en oŋeyo bal ma en otimo-ni, ci en bikelo dyel pi gityerre, nyok ma kome pe ki mwonyo.

²⁴ Biketo ciŋe i wi dyel, ci neko i kabedo ma gineko iye gitum awaŋa i nyim Rwot; co aye gitum me bal.

²⁵ Ajwaka bigwelo remo me gitum me bal ki lwet ciŋe, ci reyo i kom ten keno aŋwen me keno tyer me gitum awaŋa; remo mudoŋŋe en bionyo woko i te tedi keno tyer me gitum awaŋa.

²⁶ En biwaŋo dwolone ducu i wi keno tyer, macalo dwolo me gityer lakwecwiny; kit meno ajwaka bitimo gin lakwany bal ki i kome pi balle, ci Rwot biweko balle.

²⁷ “Ka ŋat mo acel ma i kin lwak obalo ma pe otimo akaka, kun otiyo gin mo acel i kom gin ducu ma yam Rwot ociko ni pe gitim, ci otiŋo alii,

²⁸ ka gimiyo en oneyo bal ma en otimoni, ci en bikelo dyel pi gityerre, bwonne ma kome pe ki mwonyo, pi balle ma en otimo-ni.

²⁹ En biketo ciŋe i wi gitum me bal, ci neko gitum me bal i kabedo ma gineko iye gitum awaŋa,

³⁰ Ajwaka bigwelo temo ki lwet ciŋe, ci reyo ‘i kom ten keno aŋwen me keno tyer; remo mudoŋŋe en bionyo woko i te tedi keno tyer.

³¹ En bikwanyo dwolone ducu macalo gikwanyo dwolo ki i gityer lakwecwiny, ajwaka biwaŋo i wi keno tyer obed gin ma ŋwece kur me yomo cwiny Rwot; kit meno ajwaka bitimo gin me i akwany bal ki i kome, ci Rwot biweko balle.

³² “Nyo ka en mito kelo latin romo me gityerre pi gitum me bal, en bikelo bwonne ma kome pe ki mwonyo.

³³ Biketo ciŋe i wi gitum me bal, ci neko i kabedo ma gineko iye gitum awana-ni,

³⁴ Ajwaka bigwelo remo me gitum me bal ki lwet ciŋe, bireyo i ten keno aŋwen me keno tyer me gitum awaŋa; remo mudoŋŋe en bionyo woko i te tedi keno tyer.

³⁵ En bikwanyo dwolone ducu macalo gikwanyo dwolo latin romo ki i gityer lakwecwiny, ajwaka biwaŋo i wi keno tyer i kom gityer ma giwaŋo ki mac bot Rwot; kit meno ajwaka bitimo gin lakwany bal ki i kome pi bal ma en otimo-ni, ci Rwot biweko balle.