Lulevi 3 - Acoli Baibul

Gityer me lakwecwiny

¹ “Ka dano mo tyero gitum me gityer lakwecwiny, ka tyero lim ma okwanyo ki i kin dyaŋi, ma twon nyo ma roya, en bityero i nyim Rwot ma kome pe ki mwonyo.

² En biketo ciŋe i wi gityerre, ci bineko i doggola kema me rwatte; awobe pa Aron ma gin aye ajwagi gibicoro remo i kom keno tyer kun rumo kome ducu.

³ En bityero gityer ma giwaŋo ki mac bot Rwot ma okwanyo ki i kom gitum meno me gityer lakwecwiny, en aye dwolo ma oumo jam iye, ki dwolo ducu ma tye i kom jam iye,

⁴ ki olaŋ aryo ducu ki dwolo ma tye i komgi ma tye i pyere, ki okene ki i kom cwiny, ma en bi kwanyo woko kacel ki olaŋ aryo.

⁵ Awobe pa Aron biwaŋo i wi keno tyer i wi gitum awaŋa ma tye i wi yen ma i mac; en aye gityer ma giwaŋo ki mac, gin ma ŋwece kur me yomo cwiny Rwot.

⁶ “Ka gityerre bot Rwot me gityer lakwecwiny obedo lim ma okwanyo ki i kin romi, ma nyok nyo ma bwoŋ romo, en bityero ma kome pe ki mwonyo.

⁷ Ka en tyero latin romo me gityerre, en bityero i nyim Rwot,

⁸ biketo ciŋe i wi gityerre, ka doŋ neko woko i nyim kema me rwatte; ci awobe pa Aron gibicoro remone i kom keno tyer kun rumo kome ducu.

⁹ Lacen en bityero gityer ma giwaŋo ki mac bot Rwot ma okwanyo ki i kom gitum meno me gityer lakwecwiny, en aye dwolone, ki moo yibe oluu, kun giŋolo cok ki i oguro cogo ŋeye, ki dwolo ma oumo jam iye,

¹⁰ ki olan aryo ducu, ki dwolo ma tye i komgi ma tye i pyere, ki okene ma i kom cwiny ma en bikwanyo woko kacel ki olaŋ aryo.

¹¹ Ci ajwaka biwaŋo woko i wi keno tyer, obed cam ma gityero ki mac bot Rwot.

¹² “Ka ce gityerre obedo dyel, en bityero i nyim Rwot,

¹³ biketo ciŋe i wiye, ka doŋ neko woko i nyim kema me rwatte; awobe pa Aron gibicoro remone i kom keno tyer rumo kome ducu.

¹⁴ Lacen en bityero jami magi ma okwanyo ki i kome gubed gityer ma giwaŋo ki mac bot Rwot, en aye dwolo ma oumo jam iye, ki dwolo ducu ma i kom jam iye,

¹⁵ ki olaŋ aryo ducu, ki dwolo ma i komgi ma tye i pyere, ki okene ma i kom cwiny ma en bikwanyo woko kacel ki olan aryo.

¹⁶ Ajwaka biwaŋogi i wi keno tyer obed cam ma gityero ki mac, ma ŋwece kur. Dwolo ducu bedo pa Rwot.

¹⁷ Bibedo cik matwal nio wa i kare pa likwayowu ducu, wa i kabedo ma wubedo iye ducu, ni, pe wucam dwolo nyo remo.”