Lulevi 27 - Acoli Baibul

Cik ma mako gin ma gidyero adyera

¹ Rwot owaco bot Moses ni,

² “Wac bot jo Icrael ni, Ka dano mo okwoŋo kwoŋ ma pire tek ma otiko kom dano bot Rwot, ma myero in iŋol welle,

³ ci wel ma iŋolo pi laco ma mwaka me ditte romo pyeraryo o-wa i pyerabicel bibedo cekel me ryal pyerabic, ma giporo ki cekel me kabedo maleŋ,

⁴ Ka ce dano meno ma kwon otiko obedo dako, ci ibiŋolo wel me cekel pyeradek.

⁵ Ka mwaka me ditte romo abic o wa i pyeraryo, ibiŋolo pi laco cekel pyeraryo, pi dako cekel apar.

⁶ Ka ce ditte romo dwe acel o wa i mwaka abic, ibiŋolo cekel me ryal abic pi laco, cekel me ryal adek pi nyako.

⁷ Ka mwaka me ditte romo pyerabicel nyo makato, ibiŋolo cekel apar wiye abic pi laco, pi dako apar.

⁸ Ka ce dano mo lacan twatwal, ma pe twero miyo wel ma iŋolle, ci en bitero dano ma gikwoŋo pire-ni i nyim ajwaka ci ajwaka aye biŋolle wel, kun lubo gin ma dano ma okwoŋo kwoŋ-ŋu twero noŋone.

⁹ “Ka ce kwoŋ otiko lee mo ma gityero me bedo gityer bot Rwot, lee ducu ma kit meno ma dano miyo bot Rwot bedo maleŋ.

¹⁰ En pe bilokone woko ki gin mukene, nyo gwenyo loko ki wadi mo, maberre ki maracce, nyo maracce ki maberre; nyo ka en oloko lee mo ki lee wadi, ci gin aryo ducu ma gilokogi-ni gibibedo maleŋ.

¹¹ Ka ce obedo lee mo ma keni, ma pe gityero me bedo gityer bot Rwot, ci dano meno bitero lee-nu i nyim ajwaka.

¹² Ajwaka biŋolo welle, kadi lee-nu ber kadi rac; macalo in ajwaka iŋolo welle, ci bicuŋ kit meno.

¹³ Ento ka en mito kokone woko, en bimedo acel me abic i kom welle.

¹⁴ “Ka dano mo onyero ode obed maleŋ bot Rwot, ci ajwaka biŋolo welle, ka ber ka rac; ka ajwaka oŋolo welle, ci bicuŋ kit meno.

¹⁵ Ka ce ŋat ma odyero ode-ni mito warone woko, en bimedo acel me abic i kom welle ci bidok bote.

¹⁶ “Ka dano mo odyero but lobone bot Rwot ki i kom lobo ma oleyo ki bot kwarone, ci ibiŋolo welle kun poro kodi ma gitwero coyo iye; ka romo coyo iye kodi cayiri guniya adek, Gibiŋolo iye cekel me ryal pyerabic.

¹⁷ Ka en odyero potone i mwaka me jubili, ci bicuŋ i wel kikome ma iŋolo,

¹⁸ Ento ka odyero potone lacen i ŋe jubili, ajwaka biŋolo wel-lim ma myero gicul iye kun poro wel mwaka ma pud odoŋ nio i mwaka me jubili, ci wel ma yam inolo-ni gibidwoko piny.

¹⁹ Ka ce dano ma odyero peto-ni mito warone woko, en bimedo acel me abic i kom welle, ci bidoŋ i cine.

²⁰ Ento ka en pe mito waro po to-nu, nyo ka otyeko cato poto woko bot dano mukene, pe doŋ gibiwarone matwal,

²¹ Poto meno ka gigonyo i jubili bibedo maleŋ pi Rwot, macalo poto ma gikwero matwal; ci ajwaka aye doŋ bibedo rwode.

²² “Ka odyero bot Rwot poto mo ma owilo awila, ma pe dul lobo ma oleyo ki bot kwarone,

²³ ajwaka biŋolo wene nio i mwaka me jubili, ci dano-nu bimiyo wel ma giŋolo i nino meno wek obed maleŋ pi Rwot.

²⁴ Ci i mwaka me jubili poto bidok i ciŋ ŋat ma yam giwilo ki bote-ni, en ŋat ma poto-nu obedo mere kun oleyo ki bot kwarone.

²⁵ Wel ducu ma giŋolo bilubo cekel me kabedo maleŋ, kun cekel acel romo gera pyeraryo.

²⁶ “Ento litino kayo pa lee dano pe twero dyero, pien litino kayo ducu gibedo pa Rwot; kadi bed twon nyo romo, meno pa Rwot gire.

²⁷ Ka lee ma keni, en biwilone ki boti i wel ma iŋolo, kun medo acel me abic i wiye; nyo ka pe gikoko, gibicatone acata i wel ma iŋolo.

²⁸ “Ento gin ducu ma onoŋo gidyero i ciŋ Rwot matwal, ma dano mo odyero i ciŋ Rwot matwal ki i kin gin ma tye bote, kadi dano nyo lee nyo poto ma oleyo ki bot kwarone, pe gibicato kadi ki warone; gin ducu ma gidyero iciŋ Rwot matwal bedo gin maleŋ makato pi Rwot.

²⁹ Dano mo-ni ma gidyero iciŋ Rwot matwal, ma myero ginek woko ki i kin dano, pe gitwero kokone; gibineke woko aneka.

³⁰ “Acel me apar ducu mua i lobo, kadi bed kodi ma ocek i poto nyo nyig yat ma onyak, meno jami pa Rwot gire, gin maleŋ pa Rwot.

³¹ Ka dano mo mito koko gin mo i kom gin me aparre, en bimedo dul acel me abic i wiye.

³² Dul acel me apar pa dyaŋi ki romi nyo dyegi ducu, lee me aparre ducu i kin lim ducu ma kato i te odoo pa lakwat, meno bibedo maleŋ pi Rwot.

³³ Rwode pe bipenyo ka ber nyo rac, dok pe bi koko kun gwenyo ki wadi mo; ka giloko, ci gin aryo ducuma gilokogi-ni gibibedo maleŋ; pe gibikokogi akoka.”

³⁴ Magi aye cik ma yam Rwot ociko ki Moses pi jo Icrael ki i wi got Cinai.