Lulevi 26 - Acoli Baibul

Gum ma bino pi gwoko cik

¹ “Pe wutim piwu kenwu cal lubaŋa mo, pe wucib cal apaya nyo wir jok mo, pe wucib got mo ma gigoro cal i kome ocuŋ i lobowu pi ryebbe i nyime, pien an a Rwot Lubaŋawu.

² Wubigwoko cabitta dok wubiworo ot mera maleŋ; an a Rwot.

³ “Ka wubilubo cikka kun wugwoko gin ma aciko ducu, wucobo kakare,

⁴ an abimiyowu kot ma cwer i karene, lobo biceko cam, yadi ma i poto binyako nyiggi.

⁵ Kare me dino kalwu bidikke olo wa i kare me pwono otok, pwono olok bene bidikke nio wa i kare me coyo kodi. Wubicamo cam ma romowu, doŋ, ci wubibedo i lobowu ma piny okwe mot.

⁶ Abimiyo kuc bedoi lobo, wubibuto piny, dano ma miyowu lworo bibedo pe. Abikwanyo ŋuu woko ki i lobo, pala lucwan pe biwok ki i lobowu,

⁷ Wubiryemo lumerok mewu, gibito i nyimwu ki palawu.

⁸ Jo abic ki i komwu gibiryemo jo miya kulu, jo miya ki i komwu biryemo jo alip apar; lumerokwu gibito i nyimwu ki’ palawu.

⁹ Abiparo piwu, abimiyo wunywal, wunya, dok abimoko gicikkena kwedwu.

¹⁰ Wubicamo cam macon i derowu pi kare malac, wubionyo maconne woko wek kabedo odoŋ pi manyenne.

¹¹ Abiyubo kabedona i kinwu, tipo koma pe bikwerowu,

¹² Abibedo ka wot i kinwu, abibedo Lubaŋawu, wun bene wubibedo jona,

¹³ An a Rwot Lubaŋawu ma yam akwanyowu ki i lobo Ejipt wek pe wubed opiigi; aturo rii okol ma giriyo i ŋutwu, amiyowu wutirre, wuwot atir.

Can ma bino pi balo cik

¹⁴ “Ento ka pe wubiwinya, ka pe wubilubo cik magi ma aketo ducu,

¹⁵ ka ce wucayo cikka, ka iwu okworo gin ma aŋolo, ma miyo pe wubicobo gin ma aciko ducu, enro wuturo gicikkena,

¹⁶ ci abitimowu kit man: abimiyo lworo poto i komwu atura, ki aona opiyo, ki aburu ma coro wanwu kun balo komwu woko. Dok wubicoyo kodiwu noŋo, pien lumerok gibicamo.

¹⁷ Abiketo waŋa i komwu, merok bigoyowu ki i nyimgi; jo ma gidagwu aye gibiloyowu; dok wubiriŋo ata ma kun ŋat mo pe ma ryemo korwu.

¹⁸ Ka pe wuwinyo lokka kadi bed atimo kumeno, ci abimedde ki keto can i komwu tyen abiro pi balwu.

¹⁹ Abituro tek me wakkewu woko, abimiyo polo bedo tek macalo nyonyo, ki lobowu bene bedo tek macalo mola,

²⁰ Wubityeko tek komwu nono pien lobowu pe biceko cam, ki yadi bene pe gibinyako nyiggi.

²¹ “Ka wun wukemo an marac, ma pe wuwinyo lokka, ci abimedde ki kelo two mapek i komwu, ma romo lwak balwu tyen abiro.

²² Dok abicwalo ŋuu me tim i kinwu, ma bimako litinowu, ma bityeko lim makwo ma i ciŋwu, ci bijwikowu wudoko jo manok, wa yowu birido woko.

²³ “Ka pe wujukke, wudwogo bota pi kit can meno, kun pud wukemo an marac aye,

²⁴ an bene abikemowu marac, ci an ki koma abipwodowu tyen abiro pi balwu.

²⁵ Abikelo pala lucwan i komwu me lacul kwor me balo gicikkena, Ka wugurre i gaŋwu, abicwalo two gemo magwa i kinwu, ci gibimiyowu i ciŋ lumerokwu.

²⁶ Ka abikwanyo cam ma wukwo kwede woko, ci mon apar gibitedo mugatiwu i keno acel, dok gibipokowu mugati kun gipimowu apima; ka wubicamo; pe biyeŋowu.

²⁷ “Ka pe wuwinyo lokka kadi bed atimo kumene, ento pud wukemo an marac,

²⁸ ci an bene abikemowu malyet, kun an kikoma aketo can i komwu tyen abiro pi balwu.

²⁹ Wubicamo riŋo kom litino awobewu ki riŋo kom anyirawu.

³⁰ Abituro waŋ jogiwu ma i wi godi, abitoŋo keno tyerwu me odok eceta, kun abolo komwu ma oto i kom kom muto me cal lubaŋawu, ci tipo koma bikwerowu woko.

³¹ Abijwero gaŋwu woko ducu, abimiyo kabedowu ducu maleŋ doŋ noŋo, pe dok abiŋweyo ginwu ma ŋwece kur me yomo cwiny.

³² Abineko lobowu woko, wek lumerokwu ma bibedo iye gubed ki ur pire.

³³ Abikeyowu i kin lurokbci abiwoto pala lucwan ki i akura me lubo nkorwu, miyo lobowu bidoŋ noŋo cut, ki gaŋiwu bene gibidoŋ obur.

³⁴ “I kare meno lobo bikwero cabitte pi kare ducu ma noŋo pud giweko ata-ni, kun wun pud wutye i lobo pa lumerokwu. I kare meno lobo biywe, kun noŋo tye ka kwero karene me yweyo mot macalo i ceŋ cabit.

³⁵ Pi kare ma pud giweko ata-ni koŋ biywe, ki yweyo ma naka yam en pe onoŋo i cabitwu i kare ma onoŋo wun wubedo iye.

³⁶ Jo ma i kinwu ma bidoŋ abicwalo lworo i cwinygi i lobo pa lumerokgi, miyo gibiriŋo dwan pot oboke keken ma yamo yeno. Gibiriŋo macalo ŋat ma riŋo pala lucwan, ci gibipoto piny kun ŋat mo pe ma ryemo korgi.

³⁷ Gibiyokke kekengi ŋat man i kom lawote, macalo giriŋo lak pala lucwan, kadi bed ŋat mo pe ma ryemo korgi: pe wubibedo ki twero me cun i nyim lumerokwu.

³⁸ Wubitum woko ki i kin lurok, lobo pa lumerokwu bicamo komwu woko ducu.

³⁹ Jo ma i kinwu ma bidoŋ, komgi bilwal woko i lobo pa lumerokwu pi bal megi; dok pi bal pa kwarogi bene komgi bilwal woko macalo gin.

⁴⁰ “Ento ka gibituco balgi ki bal pa kwarogi pi tim roro ma gutimo i koma, dok pi kemo an marac,

⁴¹ ma omiyo an bene akemogi marac kun aterogi i lobo pa lumerokgi; ka gibedo jo ma gulirre i cwinygi, pe i komgi keken, ci gidoko mwol ma giculo ka waŋ balgi,

⁴² ka doŋ abipo pi gicikkena ma acikke ki Yakobo, abipo pi gicikkena ki Icaka ki gicikkena ki Abraim, dok abipo pi lobogi.

⁴³ Ento lobo bidoŋ ma gin jona pe iye, bigwoko cabitte ducu ma kun noŋo pud giweko woko ata ma dano pe iye. Ci gibiculo ka waŋ balgi, pien gubedo ka cayo gin ma aciko, dok tipo komgi okwero cikka.

⁴⁴ Ento kadi bed kumeno, ka pud noŋo gitye i lobo pa lumerokgi, pe abieayogi, tipo koma pe bikwerogi ma romo miyo atyekogi woko liweŋ kun aturo gicikkena kwedgi, pien an a Rwot Lubaŋagi,

⁴⁵ Pi gin weko abipo pi gicikkena ma acikke ki kwarogi ma yam akwanyogi woko ki i lobo Ejipt ma rok ducu gineno, wek abed Lubaŋagi; an a Rwot.”

⁴⁶ Magi aye cik ki gin ma Rwot oŋolo, ki cik ma en oketo i kin en ki jo Icrael i wi got Cinai ki i dog Moses.