Lulevi 25 - Acoli Baibul

Mwaka me cabit ki mwaka me jubili

¹ Rwot owaco bot Moses i wi got Cinai ni,

² “Wac bot jo Icrael ni, Ka doŋ wuo i lobo ma abimiyowu-ni, lobo bigwoko cabit pa Rwot.

³ Wubicoyo pottiwu mwaka abicel, wubiŋolo kin jaŋ olokwu mwaka abicel, wubicoko nyige;

⁴ ento mwaka me abirone en aye bibedo cabit me yweyo mot pi lobo, en cabit pa Rwot; pe wubicoyo pottiwu, pe wubiŋolo kin jaŋ olokwu.

⁵ Gin ma otwi kene i okaŋ pe wubikayo, pe wubicoko nyig olokwu ma pe wuŋolo kin jaŋe; bibedo mwaka me yweyo mot pi lobo.

⁶ Cabit man me lobo bimiyowu cam, in ki opiini ki aŋecani ki lapakacani ki labedo ma bedo boti.

⁷ Pi lim mewu makwo bene, ki pi lee ducu ma gitye i lobowu, gin ma cek iye ducu bedo me acamagi.

⁸ “Dok ibikwano cabit abiro me mwaka bene, mwaka abiro tyen abiro; kare meno me cabit abiro me mwaka bibedo mwaka pyeraŋwen wiye aboŋwen.

⁹ I mwaka meno ibimiyo gwara kok maloŋo i kom nino dwe apar me dwe me abiro; i nino me kwanyo bal en aye wubimiyo gwara kok romo lobowu ducu.

¹⁰ Wubikwero mwaka me pyerabic obed maleŋ, kun wutito i lobowu ducu ni kuc tye pi jo ducu ma bedo iye, En aye bibedo kare me jubili mewu, ma noŋo ŋat acel acel i kinwu dok gire i dul lobone, dok ŋat acel acel i kinwu bidok i doggolagi.

¹¹ Mwaka me pyerabicce aye bibedo jubili mewu; pe wubicoyo iye kodi, pe wubikayo gin ma otwi kene, pe wubicoko nyig olok ma pe wuŋolo kin jaŋe.

¹² Pien obedo jubili, bibedo maleŋ botwu; wubicamo gin ma oa ki i poto.

¹³ “I mwaka man me jubili-ni ŋat acel acel i kinwu bidok i dul lobone.

¹⁴ Ka icato lobo mo bot lawoti, nyo iwilo lobo mo ki bote, pe wubed ka bune kekenwu.

¹⁵ Ka iwilo ki bot lawoti, welle biporo wel mwaka mulubo jubili; en bicato boti kun poro wel mwaka ma ibinoŋo iye cam.

¹⁶ Ka mwaka pud odoŋ mapol, ibimedo wel ma iculo, ka mwaka doŋ odoŋ manok, ci ibidwoko welle piny, pien gin ma en tye ka cato boti en aye mwaka me cam ma bia iye.

¹⁷ Pe wubune kekenwu, ento wulwor Lubaŋawu; pien an a Rwot Lubaŋawu.

¹⁸ “Pi meno wubilubo cikka, wubigwoko gin ma aŋolo, wubicobone, wek wubed ma lobo okwe mot.

¹⁹ Pien lobo biceko cam, wubicamo, wubiyen kwede, ci wubibedo ma piny okwe mot.

²⁰ Ka ce wuwacci, ‘Wabicamo mono gin aŋo i mwaka me abiro-nu, ka ce pe wacoyo kodi, dok pe wacoko camwa ma a iye?’

²¹ An’ abiciko gumma poto i komwu i mwaka me abicelle, wek onyak nyige ma romo pi mwaka adek kulu,

²² Ka wucoyo potowu i mwaka me aborone, noŋo pud wutye ka camo cam macon ca; nio wa i mwaka me aboŋwen i kare ma cam doŋ ocek, gikayo, noŋo pud wucamo en macon ca.

²³ Lobo pe gibicato me atera woko matwal, pien lobona gira; pien wun wuwelo, dok wun lubedona.

²⁴ I lobo ducu ma bibedo mewu wubiye ni giwar lobo.

²⁵ “Ka ce omeru odoko lacan, ce ocato lobone mo ci watgi macok aye bibino ka waro lobo meno ma ominne ocato woko-ni.

²⁶ Ka dano meno pe tye ki watgi mo ma twero warone, ce en kikome odoko lalonyo, ka onoŋo gin ma romo warone,

²⁷ wek en okwan wel mwaka nia i kare ma ocato, ocul bot dano ma owilo-nu wel ma pud odon, ci potone bidok i ciŋe,

²⁸ Ento ka pe tye ki lim ma romo dwokone i ciŋe, ci poto ma ocato-nu bidoŋ i cin lawilone nio ka mwaka me jubili oromo; gibidwoko potone i kare me jubili, bidok i ciŋe.

²⁹ “Ka dano mo ocato ode ma tye i gaŋ madit ma gicelo ki cel, en twero warone ma peya mwaka acel oromo; bibedo ki twer me warone kadi pi mwaka kulu.

³⁰ Ka pe giwaro ma peya mwaka acel oromo, ci ot meno ma tye i gaŋ madit ma gicelo-ni gibimoko ni doŋ bedo pa ŋat muwilo-ni matwal, wa i kare pa likwayone ducu; pe gibidwoko i kare me jubili.

³¹ Ento odi ma i caro ata ma pe gicelo ki cel ma orumogi gibikwanogi kacel ki potti ma i caro; gitwero warogi, dok gibidwokogi ceŋ i kare me jubili.

³² “I gaŋi pa Lulevi odi ma i gaŋi ma gimiyogi me bedo megi-ni Lulevi gitwero warogi i kare ducu.

³³ Ka ce ŋat mo i kin Lulevi pe owaro, ci ot ma gicato i gaŋ mo ma omiyogi obed megi bidok bot rwode i kare me jubili, pien odi ma i gaŋ pa Lulevi meno jami megi ma gimiyogi i kin jo Icrael.

³⁴ Ento olet ma orumo gaŋi megi pe gicato; meno lobogi matwal.

³⁵ “Ka ce omeru ma bedo ka ŋeti odoko lacan ma pe twero konnye kekene, in ibikonye; en bibedo boti macalo weloni nyo labedo.

³⁶ Pe igam lim mo me magoba ki bote nyo pe imed wiye, ento lwor Lubaŋani, wek omeru obed kwo ki ka ŋeti,

³⁷ Pe ibimiyo en mako banya boti wek inoŋ iye magoba, pe imiye cam wek odwok boti kun omedo wiye.

³⁸ An a Rwot Lubaŋawu ma yam akwanyowu ki i lobo Ejipt wek amiwu lobo Kanaan, abed Lubaŋawu.

³⁹ “Ka omeru ma bedo ka ŋeti odoko lacan, ci ocatte boti kekene, pe ibimiyo en tiyo boti macalo opii;

⁴⁰ en bibedo boti macalo lapakaca nyo labedo. En bitic boti nio wa i mwaka me jubili;

⁴¹ ka lacen en bia woko ki boti, en kacel ki litinone bene. Bidok cen i doggolane, bidok i lobo pa kwarogi.

⁴² Pien gin luticca ma yam akwanyogi woko ki i lobo Ejipt; pe gibicatogi me bedo opii.

⁴³ Pe ibiloyo en ki loc magwa, ento ibilworo Lubaŋani,

⁴⁴ “Lok i kom opiini ki aŋecani ma ibibedo kwedgi; itwero wilo opii ki aŋeca ki bot lurok ma orumo ka ŋetwuni.

⁴⁵ Wutwero wilo ki i kin lubedo ma bedo botwu, dok ki i kin doggolagi ma bedo botwu, ma ginywalogi i lobowu; gibidoko limwu.

⁴⁶ Wutwero miyogi bot litino awobewu ma bilubowu, gubed ginaleyagi matwal. Wutwero miyogi gibedo opiiwu, ento omegiwu ma jo Icrael pe wubiloyogi kit meno kun ŋat man loyo wadi ki loc magwa.

⁴⁷ “Ka welo mo nyo labedo mo ma tye boti odoko lalonyo, kun omeru ma tye ka ŋete odoko lacan, ci ocatte kekene bot welo nyo labedo ma tye boti-ni, nyo ocatte bot wat ma i doggola pa welo meno,

⁴⁸ ka doŋ otyeko catte, ci gitwero koko; ŋat mo ma i kin omege twero koke woko.

⁴⁹ Nyo omin wonne nyo latin pa omin wonne twero koke, nyo watgi mo ma i doggolagi twero koke; nyo ka en odoko lalonyo, ci kokke gire kene.

⁵⁰ En bikwano wel kacel ki ŋat ma con owile-nu, kun cako i mwaka ma yam owile iye nio wa i jubili, Wel me gonye bibedo ma poro wel mwaka; kare ma en obedo kwede bot rwode gibikwano macalo kare pa lapakaca.

⁵¹ Ka ce mwaka pud odoŋ mapol, en biculo lim me koke ma oporo ki wel mwaka, kun kwanyo ki i kom wel lim ma yam giwile kwede.

⁵² Ka pud odoŋ mwaka manok mo i mwaka me jubili, en bikwano wel ki dano ma owile-nu; ci biculo lim me koke ma oporo wel mwaka me ticce ma pud odon.

⁵³ En bibedo bot rwode macalo lapakaca ma giculo mwaka ki mwaka; pe gibiloye ki loc magwa kun in ineno.

⁵⁴ Ka ce pe gikoke i kit yo meno, ci gibigonye i mwaka me jubili, en kacel ki litinone bene.

⁵⁵ Pien jo Icrael gin aye lutic ma tuŋ ciŋa; gin aye luticca ma yam akwanyogi woko ki i lobo Ejipt; an a Rwot Lubaŋawu.