Lulevi 24 - Acoli Baibul

Gwoko tara ma i kema pa Rwot

¹ Rwot owaco bot Moses ni,

² “Cik jo Icrael gukel boti moo me nyig jeituni ma giodo aoda, giliyo maber, me mac tara, wek giket mac laput obed ka lyel nino ducu ma pe to.

³ Aron myero ocaŋ mac olyel jwijwi i nyim Rwot nia otyeno nio odiko, ki woko i ŋe boŋo kicika ma umo canduk lok me caden, i kema me rwatte; meno bibedo cik matwal wa i kare pa likwayowu ducu.

⁴ En bicano laput kakare i wi okar-mac me jabu ma giliyo maber i nyim Rwot jwijwi.

Mugati me aketa i nyim Rwot

⁵ “Dok ibikwanyo moko mapwotte, ibitedo kwede capat apar wiye aryo, kun i capat acel acel bedo iye agwata moko aryo.

⁶ Ibicanogi latyeŋ aryo kun iryeyogi abicel abicel i wi meja me jabu ma giliyo maber-ri.

⁷ I kom tyen acel aoel ibiketo iye odok luban ma giliyo maten, wek obed gin me po i kom mug ati-nu, gityer ma giwaŋo ki mac bot Rwot.

⁸ I ceŋ cabit ducu Aron biryeyogi jwijwi i nyim Rwot kun gamo ki bot jo Icrael; en gicikke ma bedo matwal.

⁹ Bibedo pi Aron ki awobene: gibicamo i kabedo mo maleŋ, pien en gin maleŋ makato ma gimiye ki i kin gityer ma giwaŋo ki mac bot Rwot ma myero gimi bote dikdik.’ ”

Yeto nyiŋ Lubaŋa ki cik ma mako culo waŋ bal

¹⁰ Ceŋ mo wod pa nya jo Icrael mo ma wonne onoŋo Laejipt, okato woko i kin jo Icrael, ci ocako lwenyo ki dano mo ma Laicrael i gony.

¹¹ Wod pa nya jo Icrael meno ocako yeto nyiŋ Lubaŋa kun ceno bene, ci gitere bot Moses: Nyiŋ minne Celomit, nya pa Dibri, ma i kaka pa Dan.

¹² Ci gikete i ot kol, nio ka Rwot binyuto botgi gin ma en mito.

¹³ Rwot owaco bot Moses ni,

¹⁴ “Kel ŋat ma oceno cen woko i ŋe gony, jo ducu ma guwinyo lokke guket ciŋgi i wiye, ci wek lwak ducu gucele woko ki got.

¹⁵ Ka dok iwac ki jo Icrael ni, ŋat ma oceno Lubaŋane, balle bidok i wiye.

¹⁶ Ŋat ma oyeto nyiŋ Rwot gibineko woko; lwak ducu gibicele woko ki got; labedo kacel ki anywalli me lobo, ka oyeto Nyiŋ meno gibineke woko.

¹⁷ Ŋat ma oneko dano gibineke bene.

¹⁸ Ŋat ma oneko loo biculo acula; kwo giculo ki kwo.

¹⁹ Ka ŋat mo oketo ŋolo i kom lawote, en bene gibitime kit meno;

²⁰ turo cogo giculo ki turo cogo, waŋ giculo ki waŋ, lak giculo ki lak; kit macalo oketo ŋolo i kom dano mo-ni, en bene gibiketo ŋolo i kome.

²¹ Ŋat ma oneko loo biculo acula; ŋat ma oneko dano gibineke woko.

²² Cik bibedo acel pi labedo ki pi anywalli me lobo; pien an a Rwot Lubaŋawu.”

²³ Moses ocako lok ki jo Icrael, ci gutero dano ma oceno cen woko i ŋe gony, gucele woko ki got. Kit meno jo Icrael gutiyo kit ma Rwot ociko ki Moses.